Hosea 5

Kamba (Mbivilia) 1956

← Chapter 4 Jump to: Chapter 6 →

1Ĩw’ai ũũ, inyw’ĩ athembi, na ĩthukĩĩsye, nyũmba ya Isilaeli, na tea kũtũ, nyũmba ya mũsumbĩ; nũndũ ũsilĩlo nũmwelekele; nũndũ mũtw’ĩkĩte kĩtei ku Misiva, na kĩtei kyalanĩtw’e ĩũlũ wa Tavoli.

2Na alei nĩmalikĩte mũno ũainĩ; ĩndĩ nyie nĩ mũkan’ya wa onthe.

3Nĩnĩmwĩsĩ Evalaimu, na Isilaeli ndembithĩte; nũndũ yu, we Evalaimu, nĩwĩkĩte ũmalwaya, Isilaeli nũvukĩtw’e.

4Meko moo maikamaeka methyũũĩe Ngai woo; nũndũ veva wa ũmalwaya wĩ nthĩnĩ woo, na maimwĩsĩ Yeova.

5Na ngathĩĩo sya Isilaeli nĩkũsĩĩaa mbee wa ũthyũ wake: kwondũ wa ũu Isilaeli na Evalaimu makalulutĩka ũthũkunĩ woo; nake Yuta akalulutĩka vamwe nao.

6Makaenda na ndĩthya syoo sya mbũi na malondu na ndĩthya syoo sya ng’ombe mamũmanthe Yeova; ĩndĩ matikamwona: nĩwĩvathanĩte nao.

7Nĩmekĩte Yeova ũseleke; nũndũ nĩmasyaĩte syana ngeni: yu mwei mũtisu ũkamamina vamwe na mĩũnda yoo.

8Vuvĩai soo mũkelemu Ngivea, na soo Lama: na mũivuvĩa soo wĩ wasya wa kũtĩsya Mbethi‐aveni; ĩtina waku, we Mbenyamini.

9Evalaimu akatw’ĩka ĩanzo mũthenya wa ũkan’yo: katĩ wa mbaĩ sya Isilaeli nĩnĩtavanĩtye ũndũ wĩĩthĩwa vate ndĩi.

10Anene me mbee ũsumbĩnĩ ma Yuta mailyĩ ta ala makũĩĩasya kyambo kya mũvaka: ngamonoesya kũthilĩka kwakwa ta kĩw’ũ.

11Evalaimu nũthĩnĩtw’e, nũtumbĩĩwe ũsilĩlonĩ; nĩkwĩthĩwa nĩwendeew’e nĩ kũatĩĩa mwĩao wa mũndũ.

12Kwondũ wa ũu nyie kwa Evalaimu nĩilyĩ lungulu, na kwa nyũmba ya Yuta nĩilyĩ wou.

13Yĩla Evalaimu wonie ũwau wake, na Yuta wonie wũkite wake, nĩvo Evalaimu waendie Asuli, na atũmana kwa mũsumbĩ Yalevu: ĩndĩ ndatonya kũkũvosya, o na ndakakũvosya wũkite waku.

14Nũndũ ngeethĩwa kwa Evalaimu nĩilyĩ mũnyambũ, na ta mũnyambũ wa mũika kwa nyũmba ya Yuta: nyie, o nyie, ngatembũanga na ngĩthi; ngakua ndwae, na kũikethĩwa wa kũtangĩĩa.

15Ngaenda nĩsyoke vandũ vakwa, mũvaka meetĩkĩla ĩvĩtyo yoo, na kũmantha ũthyũ wakwa: thĩnanĩ woo makamantha na kĩthing’ĩĩsyo.

← Chapter 4 Jump to: Chapter 6 →