Hosea 12

Kamba (Mbivilia) 1956

← Chapter 11 Jump to: Chapter 13 →

1Evalaimu nũĩsaa kĩseve, na kũatĩĩa kĩesve kyumĩte wumĩlonĩ wa syũa: nake aendeeaa kwingĩvya movũngũ na wanangĩko; na nĩmeũtianĩa ũtianĩo na Asuli, na mauta nĩmatwaawa Misili.

2O na ĩngĩ Yeova e na ngananĩo na Yuta, na akasilĩla Yakovo kwĩanana na mĩendele yake; kwĩanana na mĩkĩle yake akamũĩva.

3E ĩvunĩ amũkwatie mwana‐ainyia kĩtiinyo; na e mũndũ mũima aĩ na ũtonyi kwa Ngai:

4ĩĩ, aĩ na ũtonyi ĩũlũ wa mũlaĩka, na akĩlya vinya; aĩa, na amwĩsũva: amwĩthĩa Mbethi‐eli, na nĩvo waneenee naitũ,

5o Yeova, Ngai wa nguthu; Yeova nĩ syĩtwa yake ya ũlilikan’yo.

6Kwondũ wa ũu ĩthyũũĩe Ngai waku: sũvĩa ũseo na ũsili wa katĩ, na ũkyeteelaa Ngai waku mavinda onthe.

7We nĩ mũtandĩthya, ithimi sya ũkengani syĩ kw’okonĩ kwake: endete kũthĩn’ya.

8Na Evalaimu asya, Nĩ w’o, nĩndw’ĩkĩte mũthwii, nyie nĩnĩyoneete ũthwĩĩ: kũthĩnanĩ kwakwa kw’onthe kwa wĩa maikona ũthũku nthĩnĩ wakwa ũla wĩthĩwa naĩ.

9Ĩndĩ ninyie Yeova Ngai waku o kuma nthĩ ya Misili; ngatuma ũtũa maeemanĩ o ĩngĩ, o ta mĩthenyanĩ ya mboka ĩtw’ĩtwe.

10O na ĩngĩ nĩneenete na athani, na nĩningĩvĩtye mawoni; na kwondũ wa ũthũkũmi wa athani nĩnĩelekanĩtye na ngelekan’yo.

11Ngileati nĩ ũthũku? Mo nĩ akengani vyũ; kũu Ngilikali nĩmeũthemba tũsalũ twa mũew’a; ĩĩ, ithembeo syoo nĩ ta mbumbu mĩkaonĩ ya mĩũnda.

12Na Yakovo akĩa athi nthĩ ya Alamu, na Isilaeli athũkũma nĩ kana one kĩveti, na nĩ kana one kĩveti aĩthasya malondu.

13Na Yeova amumya Isilaeli Misili na kw’oko kwa mwathani, o na nĩwasũvĩiwe na kw’oko kwa mwathani.

14Evalaimu nũthatĩtye ũthatu wĩ woo mũno: kwondũ wa ũu nthakame yake ĩkatiwa ĩũlũ wake, na kĩvũthya kyake Mwĩaĩi wake akamũtũngĩa.

← Chapter 11 Jump to: Chapter 13 →