Hosea 8

Kamba (Mbivilia) 1956

← Chapter 7 Jump to: Chapter 9 →

1Tinĩĩsya soo kanyw’anĩ waku. Nĩwũkĩle ĩũlũ wa nyũmba ya Yeova ta ndiũ, nĩkwĩthĩwa nĩmavĩtĩtye ũtianĩo wakwa, na kũvĩtan’ya mĩao yakwa.

2Makeengaĩla, makyasya, Ngai wakwa, ithyĩ Isilaeli nĩtũkwĩsĩ.

3Isilaeli nĩwekisye ũtee kĩla kĩseo: mũmaitha akamũatĩĩa.

4Nĩmokĩlĩtye asumbĩ, ĩndĩ ti ũndũ wakwa; nĩmaiĩte anene me mbee ũsumbĩnĩ, na ndyaamanya: nĩmeeseũvĩsye mĩvw’anano na vetha na thaavu woo, nĩ kana mese kũvetwa.

5Nake nĩwekisye kasaũ kaku ũtee, we Samalia; ũthatu wakwa nĩwakanĩtw’e ĩũlũ woo: kũkeethĩwa ĩvinda yĩana ata asu makĩvika vala mate na ĩvĩtyo?

6Nũndũ o ko kaumie kwa Isilaeli: ndũĩka nĩkaseũvĩtye, nako ti Ngai; ĩĩ, kasaũ ka Samalia kakatilangwa tũlungu.

7Nũndũ mavuĩaa kĩseve, na makaketha kĩlingi: nde na lĩu ũtũĩtye; mũmea ndũkasyaa lĩu; ethĩwa ũkasyaa, aeni makoomelya.

8Isilaeli nĩ mũmelye: yu me katĩ wa i mbaĩ o ta mũio ũte mũndũ ũwenda.

9Nũndũ nĩmambatie Asuli, ta ĩng’oi ya kĩthekanĩ yĩ yoka: Evalaimu nĩwethooee endwa.

10Ĩĩ, o na kau mathooaa katĩ wa i mbaĩ, yu ngamomban’ya; na nĩmekwambĩlĩlya kũoleka nũndũ wa mũio wa mũsumbĩ wa anene me mbee ũsumbĩnĩ.

11Nĩkwĩthĩwa Evalaimu nĩwaingĩvisye ithembeo ekae naĩ, ithembeo nitw’ĩkĩte kwake kũndũ kwa naĩ.

12Namũandĩkĩe maũndũ ngili ĩkũmi ma mĩao yakwa; ĩndĩ nĩmatalĩtwe o ta kĩndũ kĩeni.

13Ũvoonĩ wa kũthemba nthembo syakwa, nĩmathembaa nyama na makiya; ĩndĩ Yeova ndametĩkĩlaa: yu akalilikana ũthũku woo, na kũsilĩla naĩ syoo; makasyoka Misili.

14Nũndũ Isilaeli nĩwũlĩtwe nĩ Mũmbi wake, na akaka nyũmba nene mbanakavye; na Yuta nĩwaingĩvisye ndũa mbiie; ĩndĩ ngaete mwaki ndũanĩ syake, na ũkamina nyũmba nene syĩ iemo syasyo.

← Chapter 7 Jump to: Chapter 9 →