Numbers 13

Kamba (MBIVILIA ŨVOO MŨSEO)

← Chapter 12 Jump to: Chapter 14 →

1Mwĩai Ngai nĩwaneenie na Mwose amwĩa atĩĩ,

2“Nyuva ũmwe wa atongoi ma kĩla mbaĩ ya andũ ma Ĩsilaeli na ũimatũma kwa kĩmbithĩ mathi makamanye ũndũ andũ ma nthĩ ya Kanaani matũaa. Nthĩ ĩsu nĩyo ngũnenga andũ ma Ĩsilaeli.”

3Kwoou Mwose nĩwatũmie atongoi asu kuma weũnĩ wa Valani kwĩanana na ũndũ Mwĩai Ngai wamwĩaĩĩte. Andũ asu onthe maĩ atongoi ma mbaĩ sya Ĩsilaeli.

4Aa nĩmo masyĩtwa moo: Samua mwana wa Nzakuli kuma mbaĩnĩ ya Lũveni.

5Savati mwana wa Oli kuma mbaĩnĩ ya Simioni.

6Kalevu mwana wa Yevune kuma mbaĩnĩ ya Yuta.

7Ĩkali mwana wa Yosevu kuma mbaĩnĩ ya Isakali.

8Osea mwana wa Nuni kuma mbaĩnĩ ya Evalaimu.

9Valiti mwana wa Lavu kuma mbaĩnĩ ya Mbengyameni.

10Ngatieli mwana wa Soti kuma mbaĩnĩ ya Nzevuluni.

11Ngatiti mwana wa Susi kuma mbaĩnĩ ya Manase (mbaĩ ya Yosevu).

12Amieli mwana wa Ngemali kuma mbaĩnĩ ya Ndani.

13Sethuli mwana wa Mikaeli kuma mbaĩnĩ ya Aseli.

14Navi mwana wa Vovisi kuma mbaĩnĩ ya Navutalĩ.

15Ngeũeli mwana wa Maki kuma mbaĩnĩ ya Ngandi.

16Asu nĩmo masyĩtwa ma andũ ala Mwose watũmie mathi makamanye kwa kĩmbithĩ ũndũ andũ ma nthĩ ya Kanaani matũaa. Mwose nĩwaalyũlile ĩsyĩtwa ya Osea mwana wa Nuni amwĩta Yosua.

17Yĩla Mwose watũmaa atongoi asu nĩwameie atĩĩ, “Kuma vaa ambatai mũkalikĩle weũnĩ wa nthĩ ya Kanaani ũla wĩ ngalĩko ya ĩtheo ĩla yĩtawa Nengevu nginya mũkavike nthĩ ĩla yĩ iĩma.

18Endai mũkamanye ũndũ nthĩ ĩsu ĩilyĩ, na kana andũ ala matũaa vo me vinya kana nĩ onzu, nĩ aingĩ kana nĩ anini.

19Endai mũkamanye kana nthĩ ĩsu nĩ nzeo kana nĩ nthũku, na kana ndũa sya andũ ala matũaa vo nĩmbiĩĩe kana ti mbiĩĩe.

20O ta ũu endai mũkamanye kana mũthanga wa nthĩ ĩsu nĩ mũnou kana nĩ mũmosu, na kana nthĩ ĩsu yĩ mĩtĩ kana ndĩ mĩtĩ. Tatai ũndũ mũtonya mũete matunda amwe ma ala mavandawa nthĩ ĩsu.” Ĩvindanĩ yĩu nzavivũ syaĩ inambĩĩa kwĩw'a.

21Andũ asu nĩmambatie mathi kũmanya ũndũ nthĩ ĩsu ĩilyĩ kuma weũnĩ wa Nzini ũla wĩ ngalĩko ya ĩtheo ya nthĩ ĩsu, kũthi kũvika Leovu vakuvĩ na nzĩa ya kũlika ndũanĩ ya Amathi.

22Mbee nĩmaendie ngalĩko ya ĩtheo ya nthĩ ĩsu ĩla yĩtawa Nengevu mavika ndũanĩ ya Eviloni vala andũ ma mbaĩ sya Aimani, Sesai na Talimai matũaa. Andũ ma mbaĩ isu maĩ nzyawa sya Anaki na maĩ anene mũno. Ndũa ya Eviloni yaakiwe myaka mũonza mbee wa kwakwa kwa ndũa ya Nzoani ĩla yĩ nthĩ ya Misili.

23Yĩla mavikie mwandanĩ wa Esikoli nĩmatemie ũvonge waĩ na kĩtũngo kĩmwe kya nzavivũ kyaĩ kĩito nginya kyakuanĩlwa nĩ andũ elĩ kyoveewe mũtĩnĩ makwatanĩe. O ta ũu nĩmasyokie makuĩte matunda ma makũngũmanga na ma makũyũ.

24Vandũ vau veetiwe Mwanda wa Esikoli nũndũ wa kĩtũngo kĩu kya nzavivũ andũ asu ma Ĩsilaeli matemie vo.

25Ĩtina wa mĩthenya mĩongo ĩna, atongoi asu mamina kũmanya ũndũ nthĩ ĩsu yailyĩ, nĩmasyokie

26ndũanĩ ya Katesi ĩla yĩ weũnĩ wa Valani vala Mwose, Alũni na andũ ala angĩ onthe ma Ĩsilaeli maĩ. Nĩmamatavisye maũndũ ala moonie, na mamony'a matunda ala maetie kuma nthĩ ĩsu.

27Nĩmeeie Mwose atĩĩ, “Nĩtũnaendie nthĩ ĩla ũnatũtũmie na twamanya ũndũ ĩilyĩ. Nĩ nthĩ yĩ ũthwii mwingĩ na nou, na aa nĩ amwe ma matunda kuma nthĩ ĩsu.

28Ĩndĩ andũ ala matũaa nthĩ ĩsu me vinya mũno, na ndũa syoo nĩ nene mũno na nĩ mbiĩĩe nesa. Ũu wĩ o vo nĩtwonie nzyawa sya Anaki; andũ anene mũno ala matũaa kw'o.

29Aamaleki matũaa ngalĩko ya ĩtheo ya nthĩ ĩsu ĩla yĩtawa Nengevu. Aititi, Ayevusi, na Aamoli matũaa nthĩ ĩla yĩ iĩma, namo Akanaani matũaa vakuvĩ na Ũkanga wa Menditelenia, na ndeenĩ sya Ũsĩ wa Yolotani.”

30Ĩndĩ Kalevu nĩwakilĩthisye andũ asu maĩ vakuvĩ na Mwose na amea atĩĩ, “Yu twaĩlĩte kũthi kũkita na tũyosa nthĩ ĩsu; twĩ na ũtonyi wa kũsinda andũ mayo.”

31Ĩndĩ andũ ala maendanĩtye na Kalevu nĩmaisye atĩĩ, “Aiee, tũi na ũtonyi wa kũkita na andũ asu; andũ ma nthĩ ĩsu me na ũtonyi mwingĩ kwĩ ithyĩ.”

32Kwoou atongoi asu nĩmambĩĩie kũnyaĩĩkya ndeto sya ũvũngũ andũnĩ ala angĩ ma Ĩsilaeli ĩũlũ wa nthĩ ĩsu maendete kũmanya kwa kĩmbithĩ ũndũ ĩilyĩ. Nĩmameie atĩĩ, “Nthĩ ĩsu nĩtumaa andũ ala matũaa vo mathela. Andũ onthe ala twonie kw'o nĩ aasa mũno.

33O na nĩtwonie ala andũ anene mũno kw'o metawa Nevilimu, ila nzyawa sya Anaki. Twĩĩw'aa twĩ anini ta itooli, namo no nginya methĩwe meũtwonaa tũilyĩ ũu.”

← Chapter 12 Jump to: Chapter 14 →