Numbers 28

Kamba (MBIVILIA ŨVOO MŨSEO)

← Chapter 27 Jump to: Chapter 29 →

1Mwĩai Ngai nĩwaneenie na Mwose amwĩa atĩĩ,

2“Ĩaĩe andũ ma Ĩsilaeli ũmee nĩmũmbumĩasye ĩvindanĩ yĩla yaĩlĩte nthembo sya lĩu ila ivĩvĩaw'a kĩthembeonĩ, syĩ mũuke mũseo ũla ũmbendeeasya nyie Mwĩai Ngai.

3Matavye kana ii nĩsyo nthembo ila ivĩvĩaw'a kĩthembeonĩ ila nyie Mwĩai Ngai naĩlĩte kumĩw'a: Nthembo ya kũvĩvw'a ya kĩla mũthenya ya tũtena twĩlĩ twa ĩlondu twĩ na ũkũũ wa mwaka ũmwe tũte kĩema.

4Katena kamwe kaumaw'e kwakya na kala kangĩ kayumaw'a ĩa mawĩoo.

5Kĩla katena ka ĩlondu kaumanĩaw'e na nthembo ya ngetha ya mbaa mbeke ya mũtu mũvinyu wa kĩlo kĩmwe ũvulanĩtw'e na mauta ma lita ũmwe.

6Ĩsu nĩyo nthembo ya kũvĩvw'a ya kĩla mũthenya ĩla yambĩĩie kũthembwa Kĩĩmanĩ kya Sinaĩ, kwa kũvĩvw'a yĩthĩwe mũuke mũseo ũla ũmbendeeasya nyie Mwĩai Ngai.

7Katena ka ĩlondu kala kethembawa kwakya kathembanĩaw'e na nthembo ya kũnyuwa ya lita ũmwe wa ndivai ĩla ĩketawa kĩthembeonĩ.

8Ĩa mawĩoo mũkanthembeaa katena kala ka kelĩ ke vamwe na nthembo yako ya ngetha ya mbaa mbeke, na nthembo ya kũnyuwa ya ndivai. O nako kakeethĩawa nthembo ĩvĩvĩtw'e na mwaki yĩ mũuke mũseo ũla ũmbendeeasya nyie Mwĩai Ngai.

9“Mũthenyanĩ wa Savato mwĩnthembeaa tũtena twĩlĩ tũũme twa ĩlondu twĩ na ũkũũ wa mwaka ũmwe tũte kĩema. Tũtena tũu tumanĩaw'e na nthembo ya ngetha ya mbaa mbeke ya mũtu mũvinyu wa kĩlo ilĩ ũvulanĩtw'e na mauta, vamwe na nthembo ya kũnyuwa ya ndivai.

10Nthembo ĩsu ya kũvĩvw'a ĩkaumaw'a kĩla mũthenya wa Savato o vamwe na nthembo ya kĩla mũthenya. Nthembo ĩsu yumanĩaw'e na nthembo ya kũnyuwa ya ndivai.

11“Kĩla mũthenyanĩ wa mbee wa Mwei mũkambumĩasya nthembo ii sya kũvĩvw'a: Tũsalũ twĩlĩ, ndũũme ĩmwe na tũtena mũonza tũũme twa ĩlondu twĩ na ũkũũ wa mwaka ũmwe. Syonthe syĩthĩwe ite kĩema.

12Kĩla kasalũ kakaumanĩaw'a na nthembo ya ngetha ya mbaa mbeke ya mũtu mũvinyu wa kĩlo itatũ ũvulanĩtw'e na mauta. Nayo ndũũme ĩkaumanĩaw'a na nthembo ya ngetha ya mbaa mbeke ya mũtu mũvinyu wa kĩlo ilĩ ũvulanĩtw'e na mauta.

13O ta ũu kĩla katena ka ĩlondu kaumanĩaw'e na ngetha ya mbaa mbeke ya mũtu mũvinyu wa kĩlo kĩmwe ũvulanĩtw'e na mauta. Ĩsu nĩ nthembo ya kũvĩvw'a yĩ mũuke mũseo nthembewe nyie Mwĩai Ngai kwa kũvĩvw'a na mwaki.

14Kĩla kasalũ kaumanĩaw'e na nthembo ya kũnyuwa ya lita ilĩ sya ndivai. Nayo ndũũme yumanĩaw'e na nthembo ya kũnyuwa ya lita ĩmwe na nyusu. O ta ũu kĩla katena ka ĩlondu kaumanĩaw'e na nthembo ya kũnyuwa ya lita ĩmwe. Ĩsu nĩyo nthembo ya kũvĩvw'a ĩla ĩkaumaw'a kĩla mũthenyanĩ wa mbee wa mwei mwakanĩ w'onthe.

15Mũthenyanĩ ũsu mũkambumĩasya nthenge ĩmwe yĩthĩwe nthembo kwondũ wa ũekeo wa naĩ, vamwe na nthembo ĩla ya kĩla mũthenya ya kũvĩvw'a na nthembo ĩla yumanĩaw'a nayo ya kũnyuwa ya ndivai.

16“Mboka ya Vasaka ya kũnenga Mwĩai Ngai ndaĩa ĩkatanĩawa mũthenyanĩ wa ĩkũmi na inya wa mwei wa mbee.

17Mũthenyanĩ wa ĩkũmi na itano mweinĩ o ũsu kũkeethĩawa na mboka. Mboka ĩsu ĩkaendeeaa vandũ va mĩthenya mũonza, na ĩvindanĩ yĩu andũ makaĩsaa mĩkate ĩte mbota.

18Mũthenyanĩ wa mbee wa mboka ĩsu mwĩũmbanaa mũkathaitha, na mũyaĩlĩte kũtethya wĩa.

19Mũthenyanĩ ũsu mbumĩsyaei nyie Mwĩai Ngai nthembo ya kũvĩvw'a na mwaki, nthembo ya kũvĩvw'a ya tũsalũ twĩlĩ, ndũũme ĩmwe na tũtena mũonza tũũme twa ĩlondu twĩ na ũkũũ wa mwaka ũmwe; syonthe syĩthĩwe ite kĩema.

20Kĩla kasalũ kaumanĩaw'e na nthembo ya ngetha ya mbaa mbeke ya mũtu mũvinyu wa kĩlo itatũ ũvulanĩtw'e na mauta, nayo ndũũme yumanĩw'e na nthembo ya ngetha ya mbaa mbeke ya mũtu mũvinyu wa kĩlo ilĩ ũvulanĩtw'e na mauta.

21O ta ũu kĩla katena ka ĩlondu kaumanĩaw'e na nthembo ya ngetha ya mbaa mbeke ya mũtu mũvinyu wa kĩlo kĩmwe.

22Ũu wĩ o vo mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ nĩ kana andũ mathew'e.

23Mũkambumĩasya nthembo isu vamwe na nthembo sya kũvĩvw'a ila ithembawa kĩla kĩoko.

24Kwa nzĩa o ĩsu vandũ va mĩthenya mũonza, mũkambumĩasya nyie Mwĩai Ngai nthembo ya lĩu yĩna mũuke ũla ũmbendeeasya. Mũkambumĩasya nthembo ĩsu vamwe na nthembo ĩla ya kĩla mũthenya ya kũvĩvw'a na nthembo ĩla yumanĩaw'a nayo ya kũnyuwa ya ndivai.

25Mũthenyanĩ wa mũonza mwĩũmbanaa mũkathaitha na mũikatethasye wĩa.

26“Mũthenyanĩ wa mbee wa Mboka ya Ngetha, ĩla mwĩĩthĩawa mũimbumĩsya nyie Mwĩai Ngai nthembo ya ngetha ya ũsyao wa mbee wa mbaa mbeke, mwĩũmbanaa vamwe mũkathaitha, na mũikatethasye wĩa.

27Mũthenyanĩ ũsu mwĩmbumĩasya nthembo ya kũvĩvw'a yĩna mũuke mũseo ũla ũmbendeesya ya tũsalũ twĩlĩ, ndũũme ĩmwe, na tũtena tũũme mũonza twa ĩlondu twĩ na ũkũũ wa mwaka ũmwe.

28Kĩla kasalũ kaumanĩw'e na ngetha ya mbaa mbeke ya mũtu mũvinyu wa kĩlo itatũ ũvulanĩtw'e na mauta. Nayo ndũũme yumanĩw'e na nthembo ya ngetha ya mbaa mbeke ya mũtu mũvinyu wa kĩlo ilĩ ũvulanĩtw'e na mauta.

29O ta ũu kĩla katena ka ĩlondu kaumanĩw'e na nthembo ya ngetha ya mbaa mbeke ya mũtu mũvinyu wa kĩlo kĩmwe ũvulanĩtw'e na mauta.

30Ũu wĩ o vo mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ nĩ kana andũ mathew'e.

31O vamwe na kumya nthembo isu syĩ na nthembo sya kũnyuwa ya ndivai, mwĩumasya nthembo sya kũvĩvw'a na nthembo sya ngetha ya mbaa mbeke ila syumaw'a kĩla mũthenya. Nyamũ isu sya nthembo iikethĩwe syĩ kĩema.

← Chapter 27 Jump to: Chapter 29 →