Numbers 32

Kamba (MBIVILIA ŨVOO MŨSEO)

← Chapter 31 Jump to: Chapter 33 →

1Andũ ma mbaĩ ya Lũveni na ya Ngandi maĩ na indo mbingĩ. Yĩla mamanyie kana nthĩ ya Yaseli na ya Ngileati nĩ nzeo kwa kũĩthĩsya indo,

2nĩmaendie vala ve Mwose, mũthembi Eleasali na atongoi ma andũ ma Ĩsilaeli na mamea atĩĩ,

3“Ndũa sya Atalothi, Ndivoni, Yaseli, Namila, Esivoni, Eleale, Sevamu, Nevo, na Mbeoni,

4ila syĩ kĩsionĩ kya nthĩ kĩla Mwĩai Ngai watetheeisye andũ ma Ĩsilaeli makwata na kũtũa nĩ nthĩ nzeo kwa kũĩthĩsya indo, na ithyĩ twĩ na indo mbingĩ.

5Twĩmwĩsũva mũtũnenge kĩsio kĩĩ kya nthĩ kĩthĩwe ng'ũndũ yaitũ, na mũikatũtwae tũkatũe mũingo wa Ũsĩ wa Yolotani.”

6Mwose nĩwamakũlilye atĩĩ, “Mwĩenda andũ ala angĩ ma Ĩsilaeli mathi kũkita mũilyĩ vaa?

7Nĩkĩ mũkwenda kũaa andũ ala angĩ ma Ĩsilaeli ngoo nĩ kana maikainge Ũsĩ wa Yolotani mathi nthĩ ĩla Mwĩai Ngai ũmanengete?

8Ũu nĩw'o aaĩthe menyu meekie yĩla namatũmie kuma Katesi-mbalinea nĩ kana makamanye kwa nzĩa ya kĩmbithĩ ũndũ nthĩ ya Kanaani ĩilyĩ.

9Nĩmaendie nginya mwandanĩ wa Esikoli na moona nthĩ ĩsu, ĩndĩ yĩla masyokie, nĩmooaie andũ ma Ĩsilaeli ngoo nĩ kana maikalike nthĩ ĩla Mwĩai Ngai wamanengete.

10Mũthenya ũsu Mwĩai Ngai nĩwathatie na eevĩta ayasya atĩĩ,

11‘Vai ũmwe wa aũme ala maumie nthĩ ya Misili e na ũkũũ wa myaka mĩongo ĩlĩ na mbee ũkona nthĩ ĩla neevĩtie kana nganenga Avalaamu, Isaka na Yakovo, nũndũ mayaambĩw'a vyũ.’

12Kalevu mwana wa Yevune ũla Mũkenisi na Yosua mwana wa Nuni nomo makona nthĩ ĩsu nũndũ nĩmamwĩw'aa Mwĩai Ngai vyũ.

13Mwĩai Ngai nĩwathatiw'e nĩ andũ ma Ĩsilaeli na atuma manganga weũnĩ vandũ va myaka mĩongo ĩna nginya nzyawa sya andũ ala mamũvĩtĩsye syakw'a syathela vyũ.

14Yu inyw'ĩ ũsyao mweũ wa andũ mekaa naĩ, mũilyĩ o ta aaĩthe menyu na nĩmũũtuma Mwĩai Ngai athatĩa andũ ma Ĩsilaeli mũno ĩngĩ.

15Ethĩwa nĩmũũlea kũmwĩw'a Mwĩai Ngai, nũkũtia andũ ma Ĩsilaeli onthe kũũ weũnĩ ĩngĩ, na ninyw'ĩ mũũtuma maminwa.”

16Andũ asu ma mbaĩ ya Ngandi na ya Lũveni nĩmookie vala ve Mwose na mamwĩa atĩĩ, “Twĩenda kwaka itũũ vaa kwondũ wa indo sitũ na ndũa kwondũ wa iveti na syana sitũ.

17Ĩndĩ ithyĩ nĩtũkwosa mĩio ya kaũ na tũithi mbee wa andũ ala angĩ ma Ĩsilaeli, na tũimatongoesya kũkita nginya matũe nthĩ ĩla ĩkethĩwa yoo. Ĩvindanĩ yĩu iveti na syana sitũ ikekala kũũ ndũanĩ mbiĩĩe nĩ kana isũvĩwe kuma andũnĩ ma nthĩ ĩno.

18Tũisyoka mĩsyĩnĩ yaitũ nginya andũ onthe ma Ĩsilaeli makwate ng'ũndũ yoo.

19Tũikwata ng'ũndũ vamwe na andũ ala angĩ ma Ĩsilaeli mũingo wa Ũsĩ wa Yolotani, nũndũ nĩtũkwatĩte ng'ũndũ yaitũ ngalĩko ĩno ya wumĩlonĩ wa syũa ya Ũsĩ wa Yolotani.”

20Mwose nĩwamasũngĩie amea atĩĩ, “Ethĩwa kwa w'o nĩmũkwĩka ũndũ mwasya, yu mwĩ vaa mbee wa Mwĩai Ngai ĩyũmbany'ei kũthi kaũnĩ.

21Aũme menyu onthe ma kũkita nĩmainge Ũsĩ wa Yolotani me ungu wa ũtongoi wa Mwĩai Ngai na mayũkita amaitha maitũ nginya Mwĩai Ngai amasinde.

22Mwamina kũsinda andũ ma nthĩ kwa vinya wa Mwĩai Ngai nĩmũtonya kũsyoka, nũndũ mwĩĩthĩwa mũte na ĩvĩtyo mbee wake, na andũ ala angĩ ma Ĩsilaeli. Nĩvo ĩndĩ Mwĩai Ngai wĩmũnenga nthĩ ĩno yĩ ngalĩko ya wumĩlonĩ wa syũa ya Ũsĩ wa Yolotani yĩthĩwe ng'ũndũ yenyu.

23Ĩndĩ mwalea kwĩka ũu, mwĩĩthĩwa mũimũvĩtĩsya Mwĩai Ngai, na manyai vate ndĩi kana mũkakanw'a nũndũ wa naĩ yenyu.

24Akai ndũa kwondũ wa iveti na syana syenyu, na itũũ kwondũ wa indo syenyu, ĩndĩ mũyĩka ũndũ mwasya.”

25Andũ ma mbaĩ ya Ngandi na ya Lũveni nĩmeeie Mwose atĩĩ, “Mũnene, nĩtũkwĩka ũndũ watwĩaĩa.

26Iveti na syana sitũ, mbũi na malondu na ng'ombe sitũ niũtiwa vaa ndũanĩ sya Ngileati.

27Ĩndĩ ithyĩ athũkũmi maku nĩtwĩyũmbanĩtye kũthi kũkita tũtongoew'e nĩ Mwĩai Ngai. Nĩtũkũinga Ũsĩ wa Yolotani tũkokite o tondũ wasya.”

28Kwoou Mwose nĩwanengie mũthembi Eleasali, Yosua na atongoi ala angĩ ma andũ ma Ĩsilaeli mĩao ĩũlũ wa andũ asu.

29Nĩwameie atĩĩ, “Ethĩwa andũ ma mbaĩ ya Ngandi na ya Lũveni nĩmekũinga Ũsĩ wa Yolotani meyũmbanĩtye kũkita matongoew'e nĩ Mwĩai Ngai, na ethĩwa nĩmeũmũtetheesya mũsinde andũ ma nthĩ ĩsu, mwĩmanenga nthĩ ya Ngileati yĩthĩwe ng'ũndũ yoo.

30Ĩndĩ malea kũinga Ũsĩ wa Yolotani makokite me vamwe nenyu, menengwa kĩlungu kya nthĩ ya Kanaani mamesye o tondũ inyw'ĩ mwĩnengwa.”

31Andũ ma mbaĩ ya Lũveni na ya Ngandi nĩmasũngĩie masya atĩĩ, “Mũnene, nĩtũkwĩka kwĩanana na ũndũ Mwĩai Ngai wĩaĩte.

32Tũtongoew'e nĩ Mwĩai Ngai nĩtũkũinga tũthi nthĩ ya Kanaani, na kĩsio kya nthĩ kĩla kĩ ngalĩko ya wumĩlonĩ wa syũa ya Ũsĩ wa Yolotani nĩkĩkũendeea kwĩthĩwa kĩ kitũ.”

33Nĩvo ĩndĩ Mwose wanengie andũ ma mbaĩ ya Ngandi, mbaĩ ya Lũveni na nyusu ya andũ ma mbaĩ ya Manase mwana wa Yosevu kĩsio kĩla kyasumbĩkĩtwe nĩ mũsumbĩ Sioni wa Aamoli, na kĩsio kĩla kyasumbĩkĩtwe nĩ Oku mũsumbĩ wa Mbasani. Isio ĩsu syaĩ vamwe na ndũa na isio ila syaithyũlũlũkĩte.

34Andũ ma mbaĩ ya Ngandi nĩmaakie ĩngĩ ndũa mbiĩĩe sya Ndivoni, Atalothi, Aloeli,

35Atilothi-sovani, Yaseli, Yokivea,

36Mbethi-nimila na Mbethi-aalani. O ta ũu nĩmaakie itũũ kwondũ wa indo syoo.

37Andũ ma mbaĩ ya Lũveni nĩmaakie ĩngĩ ndũa mbiĩĩe sya Esivoni, Eleale, Kiliathaimu,

38Nevo, Mbaali-meoni (masyĩtwa ma ndũa ii nĩmaalyũlilwe) na ndũa ya Sivina. Nĩmanengie ndũa isu maakie ĩngĩ masyĩtwa meũ.

39Nzyawa sya Makili mwana wa Manase nĩsyaendie nthĩ ya Ngileati syamĩkwata na syalũngya Aamoli onthe ala matwĩe kw'o.

40Kwoou Mwose nĩwanengie nzyawa sya Makili nthĩ ya Ngileati nasyo syatũa vo.

41Mwana wa Manase ũla weetawa Yaili nĩwakwatie motũi ma Aamoli na eeta motũi asu Avothi-yaili.

42Nova nĩwakwatie ndũa ya Kenathi na motũi ala mamĩthyũlũlũkĩte na eeta ndũa ĩsu Nova ũndũ we Mwene weetawa.

← Chapter 31 Jump to: Chapter 33 →