Numbers 15

Kamba (MBIVILIA ŨVOO MŨSEO)

← Chapter 14 Jump to: Chapter 16 →

1Mwĩai Ngai nĩwaneenie na Mwose amwĩa atĩĩ,

2“Neena na andũ ma Ĩsilaeli ũmee kana mwamina kũlika nthĩ ĩla ngũmũnenga yĩthĩwe ũtũo wenyu,

3mũkambumĩasya nyie Mwĩai Ngai nthembo kuma indonĩ syenyu. Nthembo isu ikeethĩawa syĩ sya kũvĩvw'a kana nthembo ingĩ syumĩtw'e nĩ kana mũndũ eanĩĩsye mawĩvĩto make ala wĩvĩtĩte, kana nthembo yumĩtw'e na ngoo ya kwenda, kana nthembo ila syumaw'a ĩvindanĩ ya mboka syenyu ila itw'ĩtwe. Nthembo isu ikaumaw'a nĩ kana syumye mũuke mũseo ũla ũmbendeeasya nyie Mwĩai Ngai.

4Mũndũ ũla ũkũmbumĩsya nthembo yake nyie Mwĩai Ngai akamĩetanĩsya na nthembo ya ngetha ya mbaa mbeke ya kĩlo kĩmwe kya mũtu mũvinyu ũvulanĩtw'e na lita ũmwe wa mauta.

5Ũla ũkumya mbũi kana ĩlondu yĩthĩwe nthembo ya kũvĩvw'a kana nthembo ya mũthemba ũngĩ, nĩaumanĩsye kĩla ĩmwe na lita ũmwe wa ndivai yĩthĩwe nthembo ya kũnyuwa.

6Yĩla mũndũ ũkumya nthembo ya ndũũme nĩamyumanĩsye na nthembo ya ngetha ya mbaa mbeke ya kĩlo ilĩ sya mũtu mũvinyu ũvulanĩtw'e na mauta ma lita ĩmwe na nyusu.

7O ta ũu nĩamyumanĩsye na ndivai ya lita ũmwe na nyusu. Mũuke mũseo wa nthembo isu nũmbendeeasya nyie Mwĩai Ngai.

8Yĩla mũndũ ũkumya kasalũ kethĩwe nthembo ya kũvĩvw'a kana nthembo ya kwĩanĩĩsya wĩvĩto kana nthembo ya ngwatanĩo,

9nĩamyumanĩsye na nthembo ya ngetha ya mbaa mbeke ya mũtu mũvinyu wa kĩlo itatũ ũvulanĩtw'e na mauta ma lita ilĩ.

10O ta ũu nĩamyumanĩsye na ndivai ya lita ilĩ. Mũuke mũseo wa nthembo isu nũmbendeeasya nyie Mwĩai Ngai.

11“Kĩla nthembo ya kasalũ, ndũũme, katena ka ĩlondu kana katena ka mbũi ikaumaw'a kwa nzĩa ĩsu.

12Yĩla mũndũ ũkumya nyamũ mbee wa ĩmwe, nthembo ĩla yĩumanĩw'a nasyo yongelwe kwĩanana na ũndũ ũtalo wa nyamũ isu wĩana.

13Andũ onthe ma Ĩsilaeli maatĩĩae walany'o ũsu yĩla mekũmbumĩsya nthembo sya kũvĩvw'a. Mũuke mũseo wa nthembo isu nũmbendeeasya nyie Mwĩai Ngai.

14Ethĩwa ĩvindanĩ o na yĩva yĩla yũkĩte kũkeethĩwa mũndũ mũeni katĩ wenyu; e kyalonĩ kana atw'ĩe nthĩ yenyu, na nũkwenda kumya nthembo ya kũvĩvw'a, yĩthĩwe na mũuke mũseo ũla ũmbendeeasya nyie Mwĩai Ngai, no nginya aatĩĩe walany'o ũsu inyw'ĩ mũkaatĩĩaa.

15Andũ ma Ĩsilaeli makaatĩĩaa mĩao ĩsu, o vamwe na aeni ala matwĩe katĩ woo. Ũsu nĩ mwĩao wa tene na tene kwa nzyawa syonthe ila ikoka. Kwakwa nyie Mwĩai Ngai, vaikethĩawa kĩvathũkany'o katĩ wenyu na aeni ala makekalanasya nenyu.

16Mĩao na motw'ĩo ala mwĩĩthĩawa mũkĩatĩĩa nomo meatĩĩawa nĩ aeni ala matwĩe katĩ wenyu.”

17Mwĩai Ngai nĩwaneenie na Mwose amwĩa atĩĩ,

18“Neena na andũ ma Ĩsilaeli ũmee kana mwamina kũlika nthĩ ĩla nyie nĩmũtwaĩte,

19na mũiya lĩu ũla mũkethete nthĩ ĩsu, mbumĩasyei ũmwe wa lĩu ũsu wĩthĩwe nthembo kwakwa nyie Mwĩai Ngai.

20Yĩla mũkũua mĩkate na mũtu wa ũsyao wenyu wa mbee wa mbaa mbeke, ũmwe wa mĩkate ĩsu nĩwumw'e wĩthĩwe ta nthembo ĩla yumaw'a kuma kĩvũĩonĩ kya ngetha.

21Ĩvindanĩ yonthe yĩla yũkĩte, mũkambumĩasya nyie Mwĩai Ngai nthembo isu kuma ũsyaonĩ wenyu wa mbee wa mbaa mbeke.

22“Ethĩwa mũndũ ateĩvangĩte nĩwalea kũatĩĩa motw'ĩo asu nyie Mwĩai Ngai nĩnengete Mwose,

23kana ethĩwa ĩvindanĩ yũkĩte andũ nĩmalea kwĩanĩsya maũndũ onthe ala nyie Mwĩai Ngai neeaie kwĩsĩla kũla kwĩ Mwose,

24ethĩwa ĩvĩtyo yĩu yeekwa nĩ andũ kwa kũlea kũmanya, andũ asu mathembe kasalũ kethĩwe nthembo ya kũvĩvw'a yĩ mũuke mũseo ũla ũmbendeeasya nyie Mwĩai Ngai. Kasalũ kau kaumanĩw'e na nthembo ila itw'ĩtwe sya ngetha ya mbaa mbeke na ya ndivai. O ta ũu nĩmaumye nthenge yĩthĩwe nthembo ya ũekeo wa naĩ.

25Mũthembi nĩathembe nthembo ya wĩw'anĩthyo nĩ kana andũ onthe ma Ĩsilaeli maekewe, nũndũ mavĩtĩtye matesĩ na nĩmambumĩsye nyie Mwĩai Ngai nthembo ya lĩu, na nthembo kwondũ wa ũekeo wa naĩ.

26Andũ onthe ma Ĩsilaeli na aeni ala matwĩe katĩ woo makaekewa naĩ yoo, nũndũ kĩla mũndũ nĩwĩkĩte ĩvĩtyo yĩu.

27“Ĩndĩ ethĩwa mũndũ ũmwe nĩwe wĩkĩte naĩ atavangĩte kũmĩka, nĩaumye mbaika yĩna ũkũũ wa mwaka ũmwe yĩthĩwe nthembo kwondũ wa ũekeo wa naĩ.

28Nĩvo ĩndĩ mũthembi wĩumya nthembo ya ũekeo wa naĩ nĩ kana mũndũ ũsu ũvĩtĩtye atavangĩte aekewe naĩ yake. Mũndũ ũsu nũkũekewa naĩ yake.

29Mũndũ o na wĩva wa andũ ma Ĩsilaeli kana mũeni ũla ũtwĩe katĩ wenyu, avĩtya atesĩ akaatĩĩaa mwĩao ũsu.

30“Ĩndĩ ethĩwa ũmwe wa andũ ma Ĩsilaeli kana mũeni ekĩte naĩ na ngũlũ, ethĩawa amũuma Mwĩai Ngai na aĩlĩte kũawa,

31nũndũ nũvũthĩtye ndeto ya Mwĩai Ngai na nũtũlĩte mwĩao wake. Mũndũ ũsu no nginya oawe nũndũ wa ĩvĩtyo yĩla we mwene wĩkĩte.”

32Ĩvinda yĩmwe, andũ ma Ĩsilaeli maendee na kwĩkala weũnĩ, nĩmoonie mũndũ ũmwe ayuna ngũ mũthenya wa Savato.

33Andũ ala mamwonie ayuna ngũ nĩmamũkwatie na mamũtwaa kũla kwĩ Mwose, Alũni na andũnĩ ala angĩ onthe.

34Nĩmamũvingĩie vandũ nũndũ mayeesĩ kwa w'o mũndũ ũsu aĩlĩte kwĩkwa ata.

35Nĩvo Mwĩai Ngai weeie Mwose atĩĩ, “Mũndũ ũsu no nginya oawe. Andũ onthe ma Ĩsilaeli nĩmamũtwae ũtee wa maeema na maimũkimanga na mavia.”

36Kwoou andũ onthe nĩmatwaie mũndũ ũsu ũtee wa maeema na mamũkimanga na mavia nginya akw'a, kwĩanana na ũndũ Mwĩai Ngai wamwĩaĩĩte Mwose.

37Mwĩai Ngai nĩwaneenie na Mwose amwĩa atĩĩ,

38“Neena na andũ ma Ĩsilaeli na ũimea nĩmaseũvye manyenze na kũmatumĩĩa ndiivonĩ sya ngũa syoo. Nĩmekĩe mũkumbũ wa langi wa mbuluu kĩla ĩnyenzenĩ. Makeekaa ũu ĩvindanĩ yonthe yĩla yũkĩte.

39Manyenze asu makeethĩawa ta ũlilikany'o, na kĩla ĩvinda mwamasisya mũkalilikanaa mĩao yakwa na mũimĩatĩĩa. Kwa kwĩka ũu mũkeanĩasya mĩao yakwa, na kũlea kwĩanĩsya mawendi menyu.

40Manyenze asu makamũlilikanasya kũatĩĩaa mĩao yakwa yonthe, nenyu mũyĩthĩwa andũ makwa atheu.

41Ninyie Mwĩai Ngai, Ngai wenyu ũla wamumisye nthĩ ya Misili nĩ kana nĩthĩwe Ngai wenyu. Ninyie Mwĩai Ngai, Ngai wenyu.”

← Chapter 14 Jump to: Chapter 16 →