Numbers 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1Mwĩai Ngai nĩwaneenie na Mwose amwĩa atĩĩ,

2“Neena na andũ ma Ĩsilaeli ũmee kana ethĩwa mũndũ-ũme kana mũndũ mũka nĩweevĩta kwa nzĩa ya mwanya, wĩvĩto wa kũvathwa kwondũ wa Mwĩai Ngai ethĩwe Mũnasili,

3ndakanyw'e ndivai kana kĩndũ o na kĩva kĩla kĩmilaa. Ndakanyw'e ndivai ngaatu ĩseũvĩtw'e kuma nzavivũnĩ kana kĩndũ kĩngĩ o na kĩva kĩmilaa. Ndakanyw'e ngoyoo ya nzavivũ kana kũya nzavivũ mbĩu kana ila mbovu.

4Mĩthenyanĩ yonthe ya kwĩvatha kwake ethĩwe Mũnasili, ndakaaye kĩndũ o na kĩva kĩseũvĩtw'e kuma nzavivũnĩ, o na ndakaaye ngii kana masyũo masyo.

5“Ĩvindanĩ yonthe yĩla mũndũ ũendee kwĩanĩsya wĩvĩto ũsu, ndakenze nzw'ĩĩ yake. No nginya ethĩwe e mũtheu ĩvindanĩ yonthe yĩla wĩvathĩte kwondũ wa Mwĩai Ngai. Nĩaekane na nzw'ĩĩ ya mũtwe wake ĩasave.

6Ĩvindanĩ yonthe yĩla wivathĩte kwondũ wa Mwĩai Ngai, ndaĩlĩte kũthengeea mũndũ mũkw'ũ.

7O na ethĩwa ĩthe, inyia, mwana-a-inyia, kana mwĩĩtu-a-inyia wake nĩwakw'a, ndaĩlĩte kwĩvukya nũndũ woo, nũndũ wonany'o wa kwĩvatha kwake kwondũ wa Ngai nĩ nzw'ĩĩ ya mũtwe wake.

8Ĩvinda yonthe ya kwĩvatha kwake ethĩawa e mũtheu kwondũ wa Mwĩai Ngai.

9“Ethĩwa nzw'ĩĩ ya Mũnasili nĩyavukw'a nũndũ mũndũ nĩwakw'a kwa kĩthũlũmũko e vakuvĩ nake, mũthenyanĩ wa mũonza wa kũthew'a kwake no nginya enzwe nzw'ĩĩ yake.

10Mũthenyanĩ wa nyanya etwaĩa mũthembi ndumbũ ilĩ kana maswii elĩ ma ĩvũĩ mũvĩanĩ wa Ĩeema ĩtheu ya kũkomanĩa na Mwĩai Ngai.

11Mũthembi akaumya ĩmwe ya nyũnyi isu yĩthĩwe nthembo ya ũekeo wa naĩ, na ĩla ĩngĩ aimyumya yĩthĩwe nthembo ya kũvĩvw'a nĩ kana aekewe naĩ syake, nũndũ nĩwĩkĩte naĩ kwa kũthengeea mũndũ mũkw'ũ. Mũthenyanĩ ũsu no nginya athesye mũtwe wake ĩngĩ,

12na kwĩvatha ĩngĩ kwondũ wa Mwĩai Ngai vandũ va ĩvinda yĩla ũnavangĩte kwĩvatha. Nĩaumye katena kaũme ka ĩlondu kena ũkũũ wa mwaka ũmwe kethĩwe nthembo kwondũ wa ĩvĩtyo yake. Ĩndĩ mĩthenya ĩla mĩvĩtũku ndĩtalwa, nũndũ avukĩtw'e ĩvindanĩ ya kũvathwa kwake.

13“Mũnasili amina ĩvinda yake ya kũvathwa akaatĩĩa mwĩao ũũ: Nĩathi mũvĩanĩ wa Ĩeema ĩtheu ya kũkomanĩa na Ngai.

14E vau nĩaumĩsye Mwĩai Ngai syĩndũ ii: Katena kaũme ka ĩlondu kate kĩema kena ũkũũ wa mwaka ũmwe kethĩwe nthembo ya kũvĩvw'a, katena kaka ka ĩlondu kate kĩema kena ũkũũ wa mwaka ũmwe kethĩwe nthembo ya ũekeo wa naĩ, ndũũme ĩte kĩema yĩthĩwe nthembo ya ngwatanĩo.

15O ta ũu nĩaumye kĩkavũ kĩna mĩkate ĩte mbota, mĩkate ĩngĩ ĩseũvĩtw'e na mũtu mũvinyu ũvulanĩtw'e na mauta, tũmĩkate tũvũthũ tũte mbota na tũvake mauta vamwe na nthembo ila itw'ĩtwe sya ngetha ya mbaa mbeke na ya ndivai.

16“Mũthembi nĩatwae nthembo isu syonthe mbee wa Mwĩai Ngai na ayumĩsya mũndũ ũsu nthembo ya ũekeo wa naĩ na nthembo ya kũvĩvw'a.

17Nĩaumĩsye Mwĩai Ngai ĩla ndũũme yĩthĩwe nthembo ya ngwatanĩo, na aimyumanĩsya na ĩla mĩkate ĩte mbota yĩ kĩkavũnĩ. O ta ũu nĩaumye ila nthembo sya ngetha ya mbaa mbeke na ya ndivai.

18E vau mũvĩanĩ wa Ĩeema ĩtheu ya kũkomanĩa na Ngai, Mũnasili nĩenze nzw'ĩĩ yake na aimĩkĩa mwakinĩ ũla ũũvĩvya nthembo ĩsu ya ngwatanĩo.

19“Mũnasili amina kwenza nzw'ĩĩ ĩsu ya kwonany'a kana nĩmũvathe, mũthembi nĩamwilĩĩle mokonĩ make nyama ya kw'oko kwa ĩla ndũũme kwĩ kũtheũkye, mũkate ũte mbota ũuĩtwe na mũtu mũvinyu, na kamũkate kavũthũ kate mbota kuma kĩkavũnĩ.

20Mũthembi nĩose syĩndũ isu na aisyũkĩlĩlya Mwĩai Ngai syĩthĩwe nthembo ya kũkĩlw'a. Syĩndũ isu nĩ ntheu na nĩ sya mũthembi, o vamwe na nyama ya kĩng'eng'eeto ĩla yũkĩlilwe na nyama ya kũũ ĩla yumiw'e. Maũndũ asu mamina kwĩkwa, Mũnasili e na ũthasyo wa kũnyw'a ndivai.

21“Ĩsu nĩyo mĩao ĩla Mũnasili waĩlĩte kwĩanĩsya, ĩndĩ ethĩwa nĩwathana kumya nthembo nene mbeange wa ĩla ĩtw'ĩtwe kwondũ wa wĩvĩto wake, no nginya eanĩsye kĩla wathanie kana akaumya.”

22Mwĩai Ngai nĩwaneenie na Mwose amwĩa atĩĩ,

23“Tavya Alũni na ana make nĩmaathimae andũ ma Ĩsilaeli na ndeto ii:

24Mwĩai Ngai amũathime na kũmũsũvĩa;

25Mwĩai Ngai nĩamwĩw'ĩe tei na kũmusũsya na mumo wake;

26Mwĩai Ngai nĩamwony'e ũseo wake na kũmũnenga mũuo.

27“Ũu nĩw'o makawetaa ĩsyĩtwa yakwa kũla kwĩ andũ ma Ĩsilaeli, nakwa ngĩmaathima.”

← Chapter 5 Jump to: Chapter 7 →