bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Numbers 4
Numbers 4
Kamba (MBIVILIA ŨVOO MŨSEO)
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 5 →
1
Mwĩai Ngai nĩwaneenie na Mwose na Alũni amea atĩĩ,
2
“Talai nzyawa sya Koathi ala nĩ ĩmwe ya mbaĩ sya Alivai. Matalei kwĩanana na mbaĩ na mĩsyĩ yoo.
3
Talai aũme onthe ala me na ũkũũ wa myaka mĩongo ĩtatũ kũvika mĩongo ĩtano ala makokaa kũtethya wĩa Ĩeemanĩ yakwa.
4
Wĩa woo Ĩeemanĩ yĩu nĩ kũsũvĩa syĩndũ ila ntheu mũno.
5
“Yĩla andũ ma Ĩsilaeli mekwambĩĩsya kyalo, Alũni na ana make makalikaa Ĩeemanĩ ĩtheu ya kũkomanĩa na Ngai, na mayumya ĩla suka ya kũvitha Ĩsandũkũ ya Ũtianĩo na kũvw'ĩka Ĩsandũkũ yĩu nayo.
6
Makayĩvw'ĩkaa na kĩthuma kĩseo kyololo, na mayilĩĩla kĩtambaa kya langi wa mbuluu ĩũlũ wayo na ĩndĩ maiyĩkĩa ĩla mĩtĩ ya kũyĩkua.
7
“Makalanasya kĩtambaa kya langi wa mbuluu ĩũlũ wa mesa ya kwilĩĩla mĩkate ĩthembewe Mwĩai Ngai, na kwilĩĩla ĩũlũ wayo masaani, mbakũli sya kwĩkĩa ũvani, mbakũli na ngilasi sya kwĩkĩa nthembo ya kũnyuwa ya ndivai. Mĩkate ĩla yilĩĩlawa mesanĩ ĩsu kĩla ĩvinda o nayo ĩkeethĩwa vo.
8
Makavw'ĩkaa syĩndũ isu syonthe kĩtambaa kitune mũno, na mayongela kũvw'ĩka kĩthuma kĩseo kyololo na ĩndĩ mayĩkĩa mĩtĩ ya kũkua mesa ĩsu.
9
“Makoosaa kĩtambaa kya langi wa mbuluu na kũvw'ĩka kĩla kĩndũ kya kwilĩĩla taa, taa syakyo, syĩndũ sya kũvosya taa, masaani ma kwĩkĩa mũu wa ndambi, na syĩndũ syonthe sya kwĩkĩa mauta ma taa isu.
10
Nĩvo ĩndĩ makalingaa kĩndũ kĩu kya kwilĩĩla taa vamwe na syĩndũ isu syakyo syonthe na kĩthuma kĩseo kyololo na maikilĩĩla mbwaũnĩ sya kũkĩkua.
11
“Ĩtina wa ũu makalanasya kĩtambaa kya langi wa mbuluu ĩũlũ wa kĩla kĩthembeo kya thaavu, maikĩvw'ĩka na kĩthuma kĩseo kyololo na ĩndĩ maikĩkĩa ĩla mĩtĩ ya kũkĩkua.
12
Makoosaa mĩio ĩla ĩtũmĩawa Ĩeemanĩ ĩtheu na kũmĩlinga na kĩtambaa kya langi wa mbuluu, na o ta ũu maimĩvw'ĩka na kĩthuma kĩseo kyololo na kũmilĩĩla mbwaũnĩ sya kũmĩkua.
13
Makaumasya mũu ũla wĩ kĩthembeonĩ na kũkilĩĩla kĩtambaa kya langi ũilyĩ ta mũtune.
14
Nĩvo ĩndĩ makakilĩĩlaa syĩndũ syonthe ila itũmĩawa kũtethya wĩa kĩthembeonĩ, nasyo nĩ: Masaani ma kwoka mwaki, syĩndũ sya kũtonya nyama, mĩko na tũlaĩ.
15
Alũni na ana make mamina kũvw'ĩka syĩndũ ntheu syonthe sya Ĩeema, na andũ mayĩthĩwa meyũmbanĩtye kũthi, nĩvo ĩndĩ nzyawa sya Koathi syĩũkaa kũkua syĩndũ isu ntheu syonthe. Andũ ma mbaĩ ya Koathi mayaĩle kũkwata syĩndũ isu ntheu maikese kũkw'a. Isu nĩsyo syĩndũ sya Ĩeema ĩtheu ila andũ ma mbaĩ ya Koathi maĩlĩte kũkua.
16
“Eleasali mwana wa mũthembi Alũni nĩwe wĩĩthĩawa aũngamĩe Ĩeema ĩtheu yonthe, mauta ma taa, ũvani, nthembo sya ngetha ya mbaa mbeke, mauta ma kwĩtĩkĩsya, na syĩndũ ila ingĩ syonthe syĩ Ĩeemanĩ iminĩtwe kũvathwa kwondũ wa Mwĩai Ngai.”
17
Mwĩai Ngai nĩwaneenie na Mwose na Alũni amea atĩĩ,
18
“Mũikaeke nzyawa sya Koathi iminwe kuma mbaĩnĩ ya Alivai.
19
Nĩ kana mũmasiĩĩe maikakw'e mathengeea syĩndũ isu ntheu mũno mũkeekaa ũũ: Alũni na ana make makalikaa Ĩeemanĩ Ĩtheu na kũaĩa kĩla mũndũ wĩa wake, na kũmũtavya kĩla waĩlĩte kũkua.
20
Ĩndĩ nzyawa isu sya Koathi iikaalike Ĩeemanĩ ĩvinda o na yĩva na kũsisya syĩndũ isu ntheu mũno maikese kũkw'a.”
21
Mwĩai Ngai nĩwaneenie na Mwose amwĩa atĩĩ,
22
“Tala nzyawa sya Ngelisoni kwĩanana na mbaĩ na mĩsyĩ yoo.
23
Tala aũme onthe ala me na ũkũũ wa myaka mĩongo ĩtatũ kũvika mĩongo ĩtano, ala makokaa kũtethya wĩa Ĩeemanĩ yakwa.
24
Wĩa wa nzyawa sya Ngelisoni Ĩeemanĩ ĩtheu ũkeethĩawa wa kũkua syĩndũ ii:
25
Ĩeema ĩtheu ya kũkomanĩa na Mwĩai Ngai, itambaa syayo, syĩndũ syayo sya kũyĩvw'ĩka, kĩla kĩthuma kĩseo kyololo kya kũyĩvw'ĩka, suka ila syaĩ mũvĩanĩ wa kũlika Ĩeemanĩ,
26
suka na makanda ala matũmĩawa kũseũvya kĩwanza kĩla kyathyũlũlũkĩte Ĩeema ĩtheu na kĩthembeo, suka ila syaĩ mũvĩanĩ wa Ĩeema, na syĩndũ ila ingĩ syonthe syatũmĩawa kwamba Ĩeema yĩu. Makatethasya wĩa w'onthe ũla ũkonetye syĩndũ isu.
27
Alũni na ana make nĩmo makonasya nzyawa sya Ngelisoni ũndũ mekwĩka yĩla meũkua syĩndũ isu kana mekũtethya wĩa ũngĩ o na wĩva.
28
Ũsu nĩw'o wĩa wa nzyawa sya Ngelisoni Ĩeemanĩ ĩtheu ya kũkomanĩa na Mwĩai Ngai. Makeeaĩawa ũndũ mekwĩka nĩ Ĩthamali mwana wa mũthembi Alũni.”
29
Mwĩai Ngai nĩwaneenie na Mwose amwĩa atĩĩ, “Tala nzyawa sya Melali kwĩanana na mbaĩ na mĩsyĩ yoo.
30
Tala aũme onthe ala me na ũkũũ wa myaka mĩongo ĩtatũ kũvika mĩongo ĩtano ala makokaa kũtethya wĩa Ĩeemanĩ yakwa.
31
Wĩa ũla makatethasya Ĩeemanĩ ĩtheu yĩu nĩ kũkua mbwaũ, mĩamba, ituĩ, na matina ma kwamba Ĩeemanĩ ya kũkomanĩa na Mwĩai Ngai.
32
O ta ũu makakuaa ituĩ, matina, syambo, na makanda ma kũseũvya nza ĩla ithyũlũlũkĩte Ĩeema, na kũkua syĩndũ ila ingĩ syonthe itũmĩawa wĩanĩ ũsu w'onthe. Nenga kĩla mũndũ syĩndũ ila waĩlĩte kũkua.
33
Ũsu nĩw'o wĩa wa nzyawa sya Melali Ĩeemanĩ ĩtheu ya kũkomanĩa na Ngai. Makeeaĩawa ũndũ mekwĩka nĩ Ĩthamali mwana wa mũthembi Alũni.”
34
Mwose, Alũni na atongoi ma andũ ma Ĩsilaeli nĩmatalile nzyawa sya Koathi kwĩanana na mbaĩ na mĩsyĩ yoo.
35
Ũtalo wa aũme onthe ala maĩ na ũkũũ wa myaka mĩongo ĩtatũ kũvika mĩongo ĩtano, ala mookaa kũtethya wĩa Ĩeemanĩ ĩtheu ya kũkomanĩa na Ngai,
36
ala matalilwe kwĩanana na mbaĩ syoo maĩ ngili ilĩ, maana mũonza na mĩongo ĩtano.
37
Ũsu nĩw'o waĩ ũtalo wa nzyawa syonthe sya Koathi ala mookaa kũtethya wĩa Ĩeemanĩ ĩtheu ya kũkomanĩa na Ngai. Mwose na Alũni nĩmamatalile kwĩanana na ũndũ Mwĩai Ngai wamwĩaĩĩte Mwose.
38
Nzyawa sya Ngelisoni nĩsyatalilwe kwĩanana na mbaĩ na mĩsyĩ yoo.
39
Ũtalo wa aũme onthe ala maĩ na ũkũũ wa myaka mĩongo ĩtatũ kũvika mĩongo ĩtano ala mookaa kũtethya wĩa Ĩeemanĩ ĩtheu ya kũkomanĩa na Ngai,
40
ala matalilwe kwĩanana na mbaĩ na mĩsyĩ yoo maĩ ngili ilĩ, maana thanthatũ na mĩongo ĩtatũ.
41
Ũsu nĩw'o waĩ ũtalo wa nzyawa syonthe sya Ngelisoni ala mookaa kũtethya wĩa Ĩeemanĩ ĩtheu ya kũkomanĩa na Ngai. Mwose na Alũni nĩmamatalile kwĩanana na ũndũ Mwĩai Ngai wamwĩaĩĩte Mwose.
42
Nzyawa sya Melali nĩsyatalilwe kwĩanana na mbaĩ na mĩsyĩ yoo.
43
Ũtalo wa aũme onthe ala maĩ na ũkũũ wa myaka mĩongo ĩtatũ kũvika mĩongo ĩtano ala mookaa kũtethya wĩa Ĩeemanĩ ĩtheu ya kũkomanĩa na Ngai,
44
ala matalilwe kwĩanana na mbaĩ syoo maĩ ngili itatũ na maana elĩ.
45
Ũsu nĩw'o waĩ ũtalo wa nzyawa syonthe sya Melali. Mwose na Alũni nĩmamatalile kwĩanana na ũndũ Mwĩai Ngai wamwĩaĩĩte Mwose.
46
Kwoou Mwose, Alũni, na atongoi ma andũ ma Ĩsilaeli nĩmatalile Alivai onthe kwĩanana na mbaĩ na mĩsyĩ yoo.
47
Ũtalo wa aũme onthe ala maĩ na ũkũũ wa myaka mĩongo ĩtatũ kũvika mĩongo ĩtano ala mookaa kũthũkũma na kũkua Ĩeema ĩtheu ya kũkomanĩa na Ngai,
48
waĩ ngili nyanya, maana atano na mĩongo nyanya.
49
Kĩla ũmwe wa Alivai nĩwaaĩiwe wĩa ũla waĩlĩte kũtethya na atavw'a kĩla waĩlĩte kũkuaa kwĩanana na mwĩao wa Mwĩai Ngai kwĩsĩla vala ve Mwose. Kwoou Alivai nĩmatalilwe kwĩanana na ũndũ Mwĩai Ngai wamwĩaĩĩte Mwose.
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 5 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36