Numbers 34

Kamba (MBIVILIA ŨVOO MŨSEO)

← Chapter 33 Jump to: Chapter 35 →

1Mwĩai Ngai nĩwaneenie na Mwose amwĩa atĩĩ,

2“Ĩaĩe andũ ma Ĩsilaeli ũmee kana mwamina kũlika nthĩ ya Kanaani, nthĩ ĩla mũũnengwa yĩthĩwe ng'ũndũ yenyu, ĩkeethĩwa na mĩvaka ta ũũ:

3Mũvaka wa ngalĩko ya ĩtheo wĩĩthĩwa wumĩte weũnĩ wa Nzini ũkesĩla ũtee wa nthĩ ya Etomu. Mũvaka ũsu wĩĩthĩwa wumĩte ngalĩko ya wumĩlonĩ wa syũa ngalĩko ya ĩtheo ya Ũkanga Mũkw'ũ.

4Nĩvo mũvaka ũsu wĩvĩndũka welekele ngalĩko ya ĩtheo ya kyambato kya Akilavimu na ũiendeea wĩsĩlĩte weũnĩ wa Nzini nginya kũthi kũvika ndũanĩ ya Katesi-mbalinea. Mũvaka ũsu nũũsyoka ũthi Asali-atali na ũivĩta ũthi kũvika Asimoni,

5vala ũũvĩndũka welekele kalũsĩnĩ kala ke mũvakanĩ wa nthĩ ya Misili ũthi ũkatine Ũkanga wa Menditelenia.

6“Mũvaka wa ngalĩko ya ũthũĩlonĩ wa syũa wĩĩthĩwa wĩ Ũkanga wa Menditelenia.

7“Ngalĩkonĩ ya ĩũlũ ya nthĩ ya Kanaani mwĩĩkĩa mũvaka mũlũngalu kuma Ũkanganĩ wa Menditelenia kũthi kũvika Kĩĩmanĩ kya Olu,

8na kuma vau ũithi kũtina nzĩa ĩla ĩlikĩte Amathi. Mũvaka ũsu ũkaendeea kũvika Nzetati,

9na kũvika Nziviloni, na ũithelela Asali-enani.

10“Mwĩĩkĩa mũvaka wa ngalĩko ya wumĩlonĩ wa syũa kuma Asali-enani kũthi kũvika Seviamu.

11Mũvaka ũsu wĩtheea kuma Seviamu kũthi kũvika ndũanĩ ya Livila ĩla yĩ ngalĩko ya wumĩlonĩ wa syũa wa ndũa ya Aini, na ũiendeea wĩsĩlĩte ivaũũkonĩ ila syĩ ngalĩko ya wumĩlonĩ wa syũa wa Ĩia ya Kalilii.

12Mũvaka ũsu ũkatheea wĩsĩlĩte Ũsĩnĩ wa Yolotani ũkatine Ũkanga Mũkw'ũ. “Ĩsu nĩyo mĩvaka ĩna ya nthĩ ĩla ĩkwĩthĩwa yenyu.”

13Nĩvo ĩndĩ Mwose weeie andũ ma Ĩsilaeli atĩĩ, “Ĩsu nĩyo nthĩ ĩla yĩtw'ĩka ng'ũndũ yenyu ĩla mwĩnengwa kwa nzĩa ya kũkũna kula, na ĩla Mwĩai Ngai wĩaĩte yĩnengwa andũ ma mbaĩ kenda na nyusu.

14Andũ ma mbaĩ ya Lũveni na ya Ngandi na nyusu ya andũ ma mbaĩ ya Manase nĩmakwatĩte kĩsio kya ng'ũndũ yoo kĩaanĩtw'e kwĩanana na mĩsyĩ yoo,

15kĩla kĩ ngalĩko ya wumĩlonĩ wa syũa ya Ũsĩ wa Yolotani, mũingo ũla ũngĩ wa Yeliko.”

16Mwĩai Ngai nĩwaneenie na Mwose amwĩa atĩĩ,

17“Mũthembi Eleasali na Yosua mwana wa Nuni nĩmo meaanĩsya andũ ma Ĩsilaeli nthĩ ya Kanaani.

18Nyuva mũtongoi ũmwe kuma kĩla mbaĩnĩ mamatetheesye kũaany'a nthĩ ĩsu.

19Masyĩtwa ma atongoi asu nĩ: Kalevu mwana wa Yevune kuma mbaĩnĩ ya Yuta,

20Semũeli mwana wa Amiuti kuma mbaĩnĩ ya Simioni,

21Elitati mwana wa Kisiloni kuma mbaĩnĩ ya Mbengyameni,

22Mbuki mwana wa Yokili kuma mbaĩnĩ ya Ndani,

23Anieli mwana wa Evoti kuma mbaĩnĩ ya Manase mwana wa Yosevu,

24Kemũeli mwana wa Sivitani kuma mbaĩnĩ ya Evalaimu mwana wa Yosevu,

25Elisavani mwana wa Valanaki kuma mbaĩnĩ ya Nzevuluni,

26Valitieli mwana wa Asiani kuma mbaĩnĩ ya Isakali,

27Aiuti mwana wa Selomi kuma mbaĩnĩ ya Aseli,

28na Vetaeli mwana wa Amiuti kuma mbaĩnĩ ya Navutalĩ.”

29Asu nĩmo andũ ala Mwĩai Ngai wanengie wĩa wa kũaanĩsya andũ ma Ĩsilaeli isio sya ng'ũndũ sya nthĩ ya Kanaani.

← Chapter 33 Jump to: Chapter 35 →