Numbers 29

Kamba (MBIVILIA ŨVOO MŨSEO)

← Chapter 28 Jump to: Chapter 30 →

1“Mũthenyanĩ wa mbee wa mwei wa mũonza mwĩũmbanaa na kũthaitha, na mũyaĩlĩte kũtethya wĩa. Ũsu ũkeethĩawa wĩ mũthenya wenyu wa kũvuva masoo.

2Mũthenyanĩ ũsu mbumĩasyei nyie Mwĩai Ngai nthembo ya kũvĩvw'a yĩna mũuke ũla ũmbendeeasya ya kasalũ kamwe, ndũũme ĩmwe, na tũtena tũũme mũonza twa ĩlondu twĩ na ũkũũ wa mwaka ũmwe. Isu syonthe syĩthĩwe ite kĩema.

3Kasalũ kau kaumanĩaw'e na nthembo ya ngetha ya mbaa mbeke ya mũtu mũvinyu wa kĩlo itatũ ũvulanĩtw'e na mauta, nayo ndũũme yumanĩaw'e na nthembo ya ngetha ya mbaa mbeke ya mũtu mũvinyu wa kĩlo ilĩ ũvulanĩtw'e na mauta.

4O ta ũu kĩla katena ka ĩlondu kaumanĩaw'e na nthembo ya ngetha ya mbaa mbeke ya mũtu mũvinyu wa kĩlo kĩmwe ũvulanĩtw'e na mauta.

5Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ nĩ kana andũ mathew'e.

6O vamwe na kumya nthembo isu mũkaumasya nthembo sya kũvĩvw'a ila ithembawa kĩla mũthenya, na ila ithembawa mũthenyanĩ wa mbee wa mwei, vamwe na nthembo syasyo sya ngetha ya mbaa mbeke, na ĩla ya kũnyuwa ya ndivai kwĩanana na ũndũ kwĩaĩtwe ĩũlũ wasyo. Nthembo isu sya kũvĩvw'a na mwaki syĩ mũuke mũseo ũla ũmbendeeasya nyie Mwĩai Ngai.

7“Mũthenyanĩ wa ĩkũmi wa mwei wa mũonza mwĩũmbanaa mũkathaitha. Mũyaĩlĩte kũtethya wĩa na mũikaye lĩu o na ũmwe.

8Mũthenyanĩ ũsu mbumĩasyei nyie Mwĩai Ngai nthembo ya kũvĩvw'a yĩna mũuke mũseo ũla ũmbendeeasya ya kasalũ kamwe, ndũũme ĩmwe, na tũtena mũonza tũũme twa ĩlondu twĩ na ũkũũ wa mwaka ũmwe. Isu syonthe syĩthĩawe ite kĩema.

9Kasalũ kau kaumanĩaw'e na nthembo ya ngetha ya mbaa mbeke ya mũtu mũvinyu wa kĩlo itatũ ũvulanĩtw'e na mauta. Nayo ndũũme yumanĩaw'e na ngetha ya mbaa mbeke ya mũtu mũvinyu wa kĩlo ilĩ ũvulanĩtw'e na mauta.

10O ta ũu kĩla katena ka ĩlondu kaumanĩaw'e na nthembo ya ngetha ya mbaa mbeke ya mũtu mũvinyu wa kĩlo kĩmwe ũvulanĩtw'e na mauta.

11Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ. Mũkambumĩasya nthembo isu vamwe na nthembo ya nthenge ĩla yumaw'a nĩ kana andũ mathew'e naĩ syoo, vamwe na nthembo ya kũvĩvw'a ĩla yumaw'a kĩla mũthenya, yĩna nthembo syayo ya ngetha ya mbaa mbeke na ĩla ya kũnyuwa ya ndivai.

12“Mũthenyanĩ wa ĩkũmi na itano wa mwei wa mũonza mwĩũmbanaa mũkathaitha. Mũkatanĩaa mboka ĩno ya Tũsũmba twa Matũ vandũ va mĩthenya mũonza kwondũ wa kũnenga ndaĩa nyie Mwĩai Ngai. Mĩthenyanĩ ĩsu mũonza mũyaĩlĩte kũtethya wĩa.

13Mũthenyanĩ wa mbee wa mboka ĩsu mũkambumĩasya nthembo ya kũvĩvw'a yĩ mũuke mũseo ũla ũmbendeeasya ya tũsalũ ĩkũmi na tũtatũ, ndũũme ilĩ, na tũtena ĩkũmi na tũna tũũme twa ĩlondu twĩ na ũkũũ wa mwaka ũmwe. Isu syonthe syĩthĩwe ite kĩema.

14Kĩla kasalũ kaumanĩaw'e na nthembo ya ngetha ya mbaa mbeke ya mũtu mũvinyu wa kĩlo itatũ ũvulanĩtw'e na mauta. Kĩla ndũũme yumanĩaw'e na nthembo ya ngetha ya mbaa mbeke ya mũtu mũvinyu wa kĩlo ilĩ ũvulanĩtw'e na mauta.

15O ta ũu kĩla katena ka ĩlondu kaumanĩaw'e na nthembo ya ngetha ya mbaa mbeke ya mũtu mũvinyu wa kĩlo kĩmwe ũvulanĩtw'e na mauta, vamwe na nthembo ĩla ĩtw'ĩtwe ya kũnyuwa ya ndivai.

16Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ, o vamwe na nthembo ya kũvĩvw'a ĩla yumaw'a kĩla mĩthenya, yĩna nthembo syayo sya ngetha ya mbaa mbeke na nthembo ya kũnyuwa ya ndivai.

17“Mũthenyanĩ wa kelĩ mũkathembaa tũsalũ ĩkũmi na twĩlĩ, ndũũme ilĩ na tũtena ĩkũmi na tũna tũũme twa ĩlondu twĩ na ũkũũ wa mwaka ũmwe. Isu syonthe syĩthĩwe ite kĩema.

18Mũkaumasya nthembo ya ngetha ya mbaa mbeke, na nthembo ya kũnyuwa syĩ vamwe na tũsalũ tũu, ndũũme isu, na tũtena tũu twa ĩlondu kwĩanana na ũtalo wasyo, na mwĩao ũla ũnenganĩtwe.

19Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ, o vamwe na nthembo ya kũvĩvw'a ĩla yumaw'a kĩla mũthenya, yĩna nthembo syayo sya ngetha ya mbaa mbeke na ĩla ya kũnyuwa.

20“Mũthenyanĩ wa katatũ mũkathembaa tũsalũ ĩkũmi na kamwe, ndũũme ilĩ, na tũtena ĩkũmi na tũna tũũme twa ĩlondu twĩ na ũkũũ wa mwaka ũmwe. Isu syonthe syĩthĩwe ite kĩema.

21Mũkaumasya nthembo ya ngetha ya mbaa mbeke, na nthembo ya kũnyuwa syĩ vamwe na tũsalũ tũu, ndũũme isu na tũtena tũu twa ĩlondu kwĩanana na ũtalo wasyo na mwĩao ũla ũnenganĩtwe.

22Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ, o vamwe na nthembo ya kũvĩvw'a ĩla yumaw'a kĩla mũthenya, yĩna nthembo ya yo ya ngetha ya mbaa mbeke na ĩla ya kũnyuwa.

23“Mũthenyanĩ wa kana mũkathembaa tũsalũ ĩkũmi, ndũũme ilĩ na tũtena ĩkũmi na tũna tũũme twa ĩlondu twĩ na ũkũũ wa mwaka ũmwe. Isu syonthe syĩthĩwe ite kĩema.

24Mũkaumasya nthembo ya ngetha ya mbaa mbeke na nthembo ya kũnyuwa syĩ vamwe na tũsalũ tũu, ndũũme isu, na tũtena tũu twa ĩlondu kwĩanana na ũtalo wasyo na mwĩao ũla ũnenganĩtwe.

25Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ, o vamwe na nthembo ya kũvĩvw'a ĩla yumaw'a kĩla mũthenya, yĩna nthembo syayo sya ngetha ya mbaa mbeke na ĩla ya kũnyuwa.

26“Mũthenyanĩ wa katano mũkathembaa tũsalũ kenda, ndũũme ilĩ na tũtena ĩkũmi na tũna tũũme twa ĩlondu twĩ na ũkũũ wa mwaka ũmwe. Isu syonthe syĩthĩwe ite kĩema.

27Mũkaumasya nthembo ya ngetha ya mbaa mbeke, na nthembo ya kũnyuwa syĩ vamwe na tũsalũ tũu, ndũũme isu na tũtena tũu twa ĩlondu kwĩanana na ũtalo wasyo na mwĩao ũla ũnenganĩtwe.

28Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ, o vamwe na nthembo ya kũvĩvw'a ĩla yumaw'a kĩla mũthenya, yĩna nthembo syayo sya ngetha ya mbaa mbeke na ĩla ya kũnyuwa.

29“Mũthenyanĩ wa thanthatũ mũkathembaa tũsalũ nyanya, ndũũme ilĩ, na tũtena ĩkũmi na tũna tũũme twa ĩlondu twĩ na ũkũũ wa mwaka ũmwe. Isu syonthe syĩthĩwe ite kĩema.

30Mũkaumasya nthembo ya ngetha ya mbaa mbeke, na nthembo ya kũnyuwa syĩ vamwe na tũsalũ tũu, ndũũme isu na tũtena tũu twa ĩlondu kwĩanana na ũtalo wasyo na mwĩao ũla ũnenganĩtwe.

31Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ, o vamwe na nthembo ya kũvĩvw'a ĩla yumaw'a kĩla mũthenya, yĩna nthembo syayo sya ngetha ya mbaa mbeke na ĩla ya kũnyuwa.

32“Mũthenyanĩ wa mũonza mũkathembaa tũsalũ mũonza, ndũũme ilĩ, na tũtena ĩkũmi na tũna tũũme twa ĩlondu twĩ na ũkũũ wa mwaka ũmwe. Isu syonthe syĩthĩwe ite kĩema.

33Mũkaumasya nthembo ya ngetha ya mbaa mbeke, na nthembo ya kũnyuwa syĩ vamwe na tũsalũ tũu, ndũũme isu na tũtena tũu twa ĩlondu kwĩanana na ũtalo wasyo na mwĩao ũla ũnenganĩtwe.

34Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ, o vamwe na nthembo ya kũvĩvw'a ĩla yumaw'a kĩla mũthenya yĩna nthembo syayo sya ngetha ya mbaa mbeke na ĩla ya kũnyuwa.

35“Mũthenyanĩ wa nyanya mwĩũmbanaa mũkathaitha, na mũyaĩlĩte kũtethya wĩa.

36Mũthenyanĩ ũsu mbumĩasyei nyie Mwĩai Ngai nthembo ya kũvĩvw'a yĩ mũuke mũseo ũla ũmbendeeasya ya kasalũ kamwe, ndũũme ĩmwe, na tũtena mũonza tũũme twa ĩlondu twĩ na ũkũũ wa mwaka ũmwe. Isu syonthe syĩthĩwe ite kĩema.

37Mũkaumasya nthembo ya ngetha ya mbaa mbeke, na nthembo ya kũnyuwa syĩ vamwe na kasalũ kau, ndũũme ĩsu na tũtena tũu twa ĩlondu kwĩanana na ũtalo wasyo na mwĩao ũla ũnenganĩtwe.

38Ũu wĩ o vo, mwĩmbumĩasya nthenge ĩmwe yĩthĩwe nthembo kwondũ wa ũekeo wa naĩ, o vamwe na nthembo ya kũvĩvw'a ĩla yumaw'a kĩla mũthenya yĩna nthembo syayo sya ngetha ya mbaa mbeke na ĩla ya kũnyuwa.

39“Asu nĩmo motw'ĩo ĩũlũ wa nthembo sya kũvĩvw'a, nthembo sya ngetha ya mbaa mbeke, na nthembo sya kũnyuwa sya ndivai, ila mwaĩlĩte kũmbumĩasya nyie Mwĩai Ngai mĩthenyanĩ ya mboka syenyu ila itw'ĩtwe. Mũkaumasya nthembo isu vamwe na nthembo ila mwĩumasya yĩla mũkwĩanĩsya mawĩvĩto, nthembo sya kumya na ngoo ya kwenda na nthembo sya ngwatanĩo.”

40Mwose nĩwatavisye andũ ma Ĩsilaeli maũndũ onthe ala Mwĩai Ngai wamwĩaĩĩte.

← Chapter 28 Jump to: Chapter 30 →