2 Chronicles 23

Khmer (ព្រះគម្ពីរបរិសុទ្ធកែសម្រួល ២០១៦)

← Chapter 22 Jump to: Chapter 24 →

1នៅឆ្នាំទីប្រាំពី នោះយេហូ‌យ៉ា‌ដា លោកចម្រើនអំណាចឡើង ក៏នាំឲ្យពួកមេ‌ទ័ពចុះសញ្ញានឹងលោក គឺអ័សារា ជាកូនយេរ៉ូ‌ហាំ អ៊ីស‌ម៉ា‌អែល ជាកូនយ៉ូ‌ហា‌ណាន អ័សារា ជាកូនអូបិឌ ម្អា‌សេ‌យ៉ា ជាកូនអ័ដាយ៉ា និងអេលី‌សាផាត ជាកូនស៊ីក‌គ្រី

2គេក៏ដើរទៅមកក្នុងស្រុកយូដា ប្រមូលពួកលេវីពីគ្រប់ទាំងទីក្រុងស្រុកយូដា ព្រមទាំងពួកជាប្រធាន ក្នុងវង្សា‌នុវង្សនៃសាសន៍អ៊ីស្រា‌អែលឲ្យមូលមកឯក្រុងយេរូ‌សាឡិម

3រួចក្រុមជំនុំទាំងអស់គ្នាក៏ចុះសញ្ញានឹងស្តេច នៅក្នុងព្រះ‌ដំណាក់របស់ព្រះ។ យេហូ‌យ៉ា‌ដាមានប្រសាសន៍ទៅគេថា៖ «មើល៍! នេះជា‌រាជ‌បុត្ររបស់ស្តេច សូមឲ្យទ្រង់បានសោយ‌រាជ្យឡើង ដូចព្រះ‌យេហូវ៉ាបានមានព្រះ‌បន្ទូលអំពីដំណើររាជវង្សរបស់ព្រះបាទដាវីឌ។

4ឯអ្នករាល់គ្នាត្រូវធ្វើយ៉ាងដូច្នេះ ចំណែកពួកសង្ឃ និងពួកលេវី ក្នុងពួកអ្នករាល់គ្នាដែលចូលមកនៅថ្ងៃឈប់សម្រាក នោះត្រូវឲ្យមួយភាគក្នុងបីចាំយាមនៅមាត់ទ្វារ

5មួយភាគក្នុងបីទៀត ត្រូវនៅឯដំណាក់នៃស្តេច ហើយមួយភាគក្នុងបីទៀត ត្រូវនៅត្រង់ទ្វារជើងជញ្ជាំង ឯបណ្ដា‌ជនទាំង‌ឡាយ ត្រូវនៅក្នុងទី‌លានព្រះ‌វិហាររបស់ព្រះ‌យេហូវ៉ាវិញ

6កុំឲ្យអ្នកណាចូលទៅក្នុងព្រះ‌វិហាររបស់ព្រះ‌យេហូវ៉ាឡើយ លើកតែពួកសង្ឃ និងពួកអ្នកដែលជាជំនួយដល់ពួកលេវីប៉ុណ្ណោះ អ្នកទាំងនោះចូលទៅបាន ព្រោះគេបរិសុទ្ធទាំងអស់ តែបណ្ដា‌ជនទាំង‌ឡាយត្រូវរក្សាបញ្ញើនៃព្រះ‌យេហូវ៉ាវិញ

7ត្រូវឲ្យពួកលេវីឈរព័ទ្ធជុំ‌វិញស្តេច ដោយកាន់គ្រឿងសស្ត្រា‌វុធគ្រប់ៗគ្នា បើមានអ្នកណាចូលមកក្នុងព្រះ‌វិហារ នោះត្រូវសម្លាប់បង់ អ្នករាល់គ្នាត្រូវនៅជាប់នឹងស្តេច នៅអស់វេលាដែលទ្រង់យាងចេញចូល»។

8ដូច្នេះ ពួកលេវី និងពួកយូដាទាំងអស់គ្នា ក៏ធ្វើតាមបង្គាប់សង្ឃយេហូ‌យ៉ា‌ដាគ្រប់ជំពូក គេនាំយកពួកគេរៀងខ្លួន ទាំងពួកដែលត្រូវចូលនៅថ្ងៃឈប់សម្រាក និងពួកដែលចេញនៅថ្ងៃឈប់សម្រាកដែរ ដ្បិតសង្ឃយេហូ‌យ៉ា‌ដា លោកមិនឲ្យពួកវេនណាឈប់ទេ

9លោកប្រគល់លំពែង និងខែលធំតូច ជារបស់ព្រះបាទដាវីឌពីដើម ដែលទុកនៅក្នុងព្រះ‌ដំណាក់នៃព្រះ ដល់ពួកមេ‌ទ័ព។

10រួចលោកដាក់មនុស្សទាំងអស់ឲ្យឈរព័ទ្ធនៅជុំ‌វិញស្តេច ទាំងកាន់គ្រឿងសស្ត្រា‌វុធរបស់គេរៀងខ្លួន ចាប់តាំងពីខាងស្តាំព្រះ‌វិហារ រហូតទៅដល់ខាងឆ្វេង ក្បែរអាស‌នា និងព្រះ‌វិហារ

11នោះគេនាំបុត្រានៃស្តេចចេញមក បំពាក់មកុដលើទ្រង់ ហើយថ្វាយសេចក្ដីសញ្ញា រួចតាំងទ្រង់ឡើងជាស្តេច ឯយេហូ‌យ៉ា‌ដា និងពួកកូនរបស់លោកក៏ចាក់ប្រេងថ្វាយទ្រង់ ហើយពោលថា៖ «សូមឲ្យព្រះ‌ករុណាមានព្រះជន្មយឺនយូរ!»។

12ពេលព្រះ‌នាងអ័ថា‌លាបានឮសូរអឺង‌កងពីពួកបណ្ដា‌ជនដែលរត់ទៅមក ទាំងសរសើរដល់ស្តេច នោះព្រះ‌នាងក៏យាងចូលទៅឯគេ ក្នុងព្រះ‌វិហាររបស់ព្រះ‌យេហូវ៉ា។

13ព្រះ‌នាងទតឃើញស្ដេចឈរនៅលើវេទិកាត្រង់ផ្លូវចូល ព្រមទាំងពួកមេ‌ទ័ព និងពួកផ្លុំត្រែនៅអមទ្រង់ ឯពួកអ្នកស្រុកទាំងអស់គ្នា គេមានអំណរ ហើយផ្លុំត្រែឡើង។ ពួកចម្រៀងក៏កាន់ប្រដាប់ភ្លេង ហើយនាំមុខគេច្រៀងទំនុកសរសើរ ពេលនោះ ព្រះ‌នាងក៏ហែកព្រះ‌ពស្ត្រ ដោយសវនីយ៍ថា៖ «នេះជាការក្បត់ គឺជាការក្បត់ហើយ»។

14ពេលនោះ សង្ឃយេហូ‌យ៉ា‌ដានាំពួកមេដែលត្រួតលើកង‌ទ័ពចេញមកប្រាប់ថា៖ «ចូរនាំព្រះ‌នាងចេញទៅក្រៅទៅ ហើយបើអ្នកណាតាមព្រះ‌នាង នោះត្រូវសម្លាប់ដោយដាវ» ដ្បិតលោកបានហាមថា៖ «កុំសម្លាប់ព្រះ‌នាងនៅក្នុងព្រះ‌វិហាររបស់ព្រះ‌យេហូវ៉ាឡើយ»។

15ដូច្នេះ គេក៏ចៀសផ្លូវឲ្យព្រះ‌នាងចេញទៅ ហើយព្រះ‌នាងយាងចេញទៅតាមទ្វារ ដែលសេះចូលទៅឯដំណាក់ស្តេច រួចគេធ្វើគុតនៅទីនោះ។

16រីឯយេហូ‌យ៉ា‌ដា និងពួកបណ្ដា‌ជន ហើយស្តេចក៏ចុះសញ្ញានឹងគ្នាថា នឹងធ្វើជាប្រជា‌រាស្ត្ររបស់ព្រះ‌យេហូវ៉ា។

17បន្ទាប់មក បណ្ដា‌ជនទាំង‌ឡាយគេចូលទៅរំលំវិហាររបស់ព្រះ‌បាលអស់ទៅ ហើយបំបាក់បំបែកអស់ទាំងអាស‌នា និងរូបព្រះឲ្យខ្ទេច‌ខ្ទី ក៏សម្លាប់ម៉ាត់‌ថាន ជាសង្ឃរបស់ព្រះ‌បាល នៅមុខអាស‌នានោះដែរ។

18លោកយេហូ‌យ៉ា‌ដាក៏តាំងឲ្យមានពួកអ្នកថែ‌ទាំមើលព្រះ‌វិហាររបស់ព្រះ‌យេហូវ៉ា នៅក្រោមបង្គាប់ពួកសង្ឃលេវី និងពួកលេវីដែលដាវីឌបានតម្រូវឲ្យបំពេញមុខងារនៅក្នុងព្រះដំណាក់ររបស់ព្រះ‌យេហូវ៉ា សម្រាប់ថ្វាយតង្វាយដុតដល់ព្រះ‌យេហូវ៉ា ដូចជាមានសេចក្ដីចែងទុកក្នុងក្រឹត្យ‌វិន័យរបស់លោកម៉ូសេ គឺដោយសេចក្ដីរីក‌រាយសប្បាយ ហើយច្រៀងចម្រៀង តាមបង្គាប់របស់ព្រះបាទដាវីឌ។

19លោកក៏ដាក់ពួកឆ្មាំទ្វារ នៅតាមអស់ទាំងទ្វារព្រះ‌វិហាររបស់ព្រះ‌យេហូវ៉ា ដើម្បីនឹងឃាត់មិនឲ្យអ្នកណាដែលមិនស្អាតក្នុងការអ្វីមួយចូលទៅ។

20រួចលោកប្រមូលពួកមេ‌ទ័ព ពួកអ្នកធំ ពួកចៅ‌ហ្វាយលើបណ្ដា‌ជន និងពួកអ្នកស្រុកទាំងអម្បាល‌ម៉ានមក ហើយនាំស្តេចចុះពីព្រះ‌វិហាររបស់ព្រះ‌យេហូវ៉ា ដង្ហែចូលទៅក្នុងព្រះ‌រាជ‌ដំណាក់តាមទ្វារខាងលើ លើកតម្កល់លើបល្ល័ង្ក‌រាជ្យ។

21ដូច្នេះ ពួកអ្នកស្រុកទាំងអស់គ្នាក៏មានសេចក្ដីរីក‌រាយសប្បាយ ហើយទីក្រុងបានសេចក្ដីសាន្ត‌ត្រាណ ឯព្រះ‌នាងអ័ថា‌លា គេបានធ្វើគុតដោយដាវ។

← Chapter 22 Jump to: Chapter 24 →