bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Krio
/
Krio (Krio Fɔs Oli Baybul)
/
2 Samuel 15
2 Samuel 15
Krio (Krio Fɔs Oli Baybul)
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 16 →
1
Afta sɔm tɛm, Absalɔm bigin waka wit ɔs ɛn karej dɔn i kin gɛt fifti man fɔ de bifo am fɔ klia di rod.
2
I grap kwik wan mɔnin go tinap na di rod we fɔ waka go na di siti in get. Ɛnibɔdi we kam fɔ le kɔmplen to di kiŋ, i go aks am usay i kɔmɔt ɛn di pɔsin in go ansa Absalɔm se i kɔmɔt na wan pan di Izrɛl fambul dɛn,
3
dɔn Absalɔm go tɛl am se i rayt, bɔt di kiŋ nɔ put nɔbɔdi we go lisin to in kes.
4
Dɔn i go ad se if in na bin jɔj na Izrɛl, in bin fɔ gɛt tɛm fɔ lisin ɔlman in kes ɛn mek shɔ se i gɛt in rayt.
5
We ɛnibɔdi we go nia am ɛn want fɔ butu fɔ sho se i rɛspɛkt am, i go ol di pɔsin in an, es am ɔp ɛn kis am so dat i go ebul gɛt am.
6
Na so i bin de biev to ɔl udat kam to di kiŋ wit in prɔblɛm so dat i go win dɛn at.
7
We Absalɔm dɔn tek fo ia afta i kam bak na Jerusɛlɛm, i beg in papa fɔ lɛf am fɔ go Ɛbrɔn so dat i go kip di prɔmis we i bin mek to PAPA GƆD.
8
I tɛl in papa se we i bin de Gɛshɔ na Eram i tɛl PAPA GƆD se if i mek i kam bak na Jerusɛlɛm, in go go bak na Ɛbrɔn fɔ wɔship PAPA GƆD.
9
Di kiŋ gri ɛn tɛl am mek i go saful. So i lɛf go Ɛbrɔn.
10
Da sem tɛm de Absalɔm sɛn man dɛn, sikrit wan, fɔ go ɔl rawnd Izrɛl ɛn Juda ɛn tɛl di Izrɛl fambul dɛn fɔ ala se, “Na Absalɔm na kiŋ na Ɛbrɔn”, wɛn dɛn yɛri trɔmpɛt dɛn de blo.
11
Absalɔm bin dɔn invayt tu ɔndrɛd man frɔm Jerusɛlɛm fɔ go wit am bɔt dɛn nɔ bin no wetin i bin wan du.
12
We Absalɔm de rɛdi fɔ mek di sakrifays, i sɛn kɔl Aitofɛl we na Devid in advaysa kɔmɔt nain siti na Gaylo. So dat mek mɔ ɛn mɔ pipul tay bagin fɔ mek Absalɔm bi kiŋ.
13
Sɔmbɔdi go tɛl Devid se di Izrɛlayt dɛn at dɔn kɔmɔt to am ɛn dat na Absalɔm naw dɛn at de to.
14
So Devid tɛl ɔl di ɔfisa dɛn we de wit am na Jerusɛlɛm fɔ lɛ dɛn rɔnawe. I se if dɛn lɛf de, dɛn nɔn nɔ go ebul kɔmɔt na Absalɔm in an bikɔs i go kil dɛn ɔl, so dɛn nɔ fɔ westɛm bɔt dɛn fɔ lɛf de wantɛm.
15
Di ɔfisa dɛn gri ɛn tɛl di kiŋ se dɛn rɛdi fɔ du wetin i want.
16
Di kiŋ ɛn in wanol os lɛf fɔ go bɔt i lɛf tɛn pan in smɔl wɛf fɔ de luk in os.
17
Di kiŋ ɛn in pipul lɛf fɔ go. Wɛn dɛn dɔn rich fa usay di las os de na di siti, Devid tinap mek in man dɛn pas go bifo.
18
Ɔl in man dɛn waka go bifo am wit dɛn Kɛrɛthayt ɛn Pɛlɛtayt ɛn siks ɔndrɛd Gitayt we bin fala am frɔm Gath.
19
Di kiŋ tɛl wan Gitayt we nem Itay se mek i tɔn bak go Jerusɛlɛm fɔ de wit Kiŋ Absalɔm as in na fɔrina ɛn nɔ bawn fɔ de wit Kiŋ Devid sins i de ɛgzayl.
20
Devid tɛl am se na di de bifo da de de nɔmɔ nain i kam so i nɔ go fia fɔ lɛ in pas ɔp ɛn dɔŋ wit dɛn we in nɔ no usay i de go, so i go bɛtɛ if i tɔn bak na Jerusɛlɛm. Devid pre mek PAPA GƆD de wit am ɛn sho am aw i gud ɛn fethful.
21
Bɔt Itay se wans PAPA GƆD de ɛn Kiŋ Devid nɔ day yet, in go de wit Devid ivin if i min se i gɛt fɔ day fɔ dat.
22
Devid gri ɛn tɛl am fɔ pas bifo am wit in ami. So Itay di Gitayt ɛn ɔl in man dɛn wit dɛn famili dɛn mach go bifo Devid.
23
Na so di wan ol kɔntri de kray bita wan we Devid ɛn di pipul we de wit am de pas. Di kiŋ ɛn di pipul krɔs Kidrɔn Vali go bay di land we pɔsin nɔ go ebul tap.
24
Zedɔk ɛn Abiata we na man dɛn we de mek sakrifays fɔ pipul sin, dɛnsɛf bin de wit Devid. Di Livayt dɛn we bin de wit dɛn bin tot di ak ɔf di Kɔvinant. Dɛn put di ak dɔŋ ɛn Abiata mek sakrifays. Dɔn dɛn tot di ak bak we ɔlman dɔn pas kɔmɔt insay Jerusɛlɛm.
25
Bɔt di kiŋ tɛl Zedɔk mek i lɛ dɛn kɛr di ak go bak na Jerusɛlɛm. I se, if PAPA GƆD gladi wit am, i go briŋ am kam bak so dat i go si di ak ɛn usay dɛn kip am.
26
I se, if PAPA GƆD se i nɔ gladi wit am dɛn in rɛdi fɔ mek i du wetin i wan du wit am.
27
Di kiŋ tɛl Zedɔk ɛn Abiata we na man dɛn we de mek sakrifays fɔ pipul sin fɔ tek dɛn bɔypikin dɛn dat na Aimaaz we na Zedɔk in pikin ɛn Jonɛthan we na Abiata in yon pikin ɛn tɔn bak go na Jerusɛlɛm.
28
I se in go wet na di rod we pipul de krɔs di riva fɔ go na di land usay pɔsin nɔ go ebul tap, te in gɛt wɔd frɔm dɛn bɔt aw di go de go.
29
So Zedɔk ɛn Abiata kɛr di ak go bak na Jerusɛlɛm ɛn lɛf de.
30
So Devid klem go ɔp Mawnt Ɔliv de kray as i de go; i kɔba in ed ɛn nak in tɛn to. Ɔl di pipul we bin de wit am kɔba dɛnsɛf yon fes ɛn bin de kray as dɛnsɛf de go fɔ sho aw dɛn fil am.
31
Devid bin dɔn yɛri se Aitofɛl jɔyn Absalɔm pan di kuskas so i pre mek PAPA GƆD mek i gi Absalɔm fulish advays.
32
Wɛn Devid rich rayt ɔp Mawnt Ɔliv, usay pipul kin go fɔ wɔship PAPA GƆD, Ushay we na Akayt go mit am de. I bin dɔn chɛr in klos ɛn put dɔti nain ed.
33
Devid tɛl Ushay se i nɔ go mek i fala am bikɔs Ushay nɔ go ɛp am wan.
34
Devid tɛl am se di onli we we i go ɛp am na if i tɔn bak go na di siti to Absalɔm. I se Ushay fɔ tɛl Absalɔm se i bin dɔn wok fɔ in papa bɔt rɛdi fɔ wok fɔ am as kiŋ. Devid se na so i go ebul fɔ ɛp am bikɔs if i de de i go de mek shɔ se Absalɔm nɔ tek Aitofɛl in tɔk mek natin.
35
Devid tɛl Ushay se Zedɔk ɛn Abiata we na man dɛn we de mek sakrifays fɔ pipul sin go de insay Jerusɛlɛm so i kin tɛl dɛn ɛnitin we i yɛri frɔm di pipul na di kiŋ in os.
36
Devid se Aimaaz we na Zedɔk in bɔypikin ɛn Jonɛthan we na Abiata in yon bɔypikin, dɛnsɛf go de na Jerusɛlɛm so dɛn go kam tɛl am ɛnitin we i fɔ no.
37
So na di de we Absalɔm go insay Jerusɛlɛm, nain Devid in padi we na Ushay insɛf rich de.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 16 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
Recommended Reading
Commentary
2 Samuel Commentaries
→
Devotional
2 Samuel Devotional Guide
→
Get This Bible
Krio (Krio Fɔs Oli Baybul) Study Bible
→