bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Krio
/
Krio (Krio Fɔs Oli Baybul)
/
2 Samuel 20
2 Samuel 20
Krio (Krio Fɔs Oli Baybul)
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 21 →
1
Wan fɛn plaba man bin de de we nem Shiba ɛn na bin Bikray in bɔypikin dɔn insɛf na Bɛnjaminayt. Wantɛm i jɛs grap blo trɔmpɛt ɛn se ɔlman we kɔmɔt na Izrɛl fɔ go bak nain yon os. I se dɛn nɔ ivin fambul to Devid we na Jɛsi in bɔypikin so dɛn nɔ fɔ miks pan wetin i de du.
2
So di man dɛn we kɔmɔt Izrɛl jɛs lɛf Devid ɛn fala Shiba we na Bikray in bɔypikin bɔt di man dɛn we kɔmɔt Juda nɔ kɔmɔt biɛn dɛn kiŋ. Dɛn de wit am frɔm Riva Jɔdan te rich Jerusɛlɛm.
3
Wɛn Devid rich nain os na Jerusɛlɛm i put dɛn in tɛn smɔl wɛf we i bin lɛf fɔ de luk in os na wan os ɛn lɛf sikyɔriti fɔ de wach dɛn. I bin de gi dɛn ɔl wetin dɛn want bɔt nɔ gɛt natin fɔ du wit dɛn igen. Na de i lɛf dɛn te dɛn day. Dɛn bin de de lɛk uman dɛn we dɛn man bin dɔn day.
4
Wande di kiŋ tɛl Amasa se i de gi am tri de fɔ lɛ i gɛda ɔl di man dɛn na Juda fɔ mit wit am ɛn in di Amasa sɛf fɔ de de.
5
Bɔt Amasa tek pas tri de fɔ gɛda di man dɛn.
6
So Devid tɛl Abishay se if dɛn sidɔm so, Shiba we na Bikray in bɔypikin go fɛn trɔbul fɔ dɛn pas wetin Absalɔm bin du. Devid se Abishay fɔ rɔnata Shiba wit sɔm pan in yon sojaman dɛn ɔ nɔ so i go go fɛn siti we gɛt wɔl we i go go ayd pan dɛn.
7
So Joab in man dɛn, dɛn Kɛrɛthayt, dɛn Pɛlɛtayt ɛn ɔl dɛn tɔf tɔf sojaman rɔn afta Shiba ɛn dɛn bin go wit Abishay. Dɛn ɔl kɔmɔt na Jerusɛlɛm fɔ go kech Shiba we na Bikray in bɔypikin.
8
As dɛn de go Amasa mit dɛn bay di big ston we de na Gibiɔn. Joab bin drɛs prɔpa wan fɔ go fɛt wa wit in bɛlt rawnd in wes ɛn in daga insay di klos fɔ daga. As i waka go bifo smɔl di daga fɔdɔm kɔmɔt na di klos we i bin wɛr.
9
Joab kɔl Amasa in brɔda ɛn aks am if i ɔrayt. So Joab grip Amasa nain biabia wit in raytan lɛk aw dɛn kin du fɔ tɛl am adu ɛn kis am.
10
Amasa nɔ bin de drim sɛf se na ɛnitin, so i nɔ bin gɛt natin fɔ protɛkt am. So Joab chuk in bɛlɛ wit in daga dɔn ɔl in gɔt kɔmɔt fɔdɔm na grɔn we mek Joab nɔ bin gɛt fɔ chuk am tu tɛm sɛf. Na so i tek day. Dɛn Joab ɛn in brɔda Abishay rɔnata Shiba we na Bikray in bɔypikin.
11
Wan pan Joab in man dɛn tinap bay Amasa in bɔdi ɛn se udat de fɔ Devid ɛn rɛdi fɔ wok wit Joab fɔ fala Joab go.
12
Amasa bin lidɔm day wan wit in blɔd ɔl ova in bɔdi so we di sojaman dɛn de pas, dɛn kin tinap de smɔl as i bin de midul rod. Wɛn wan man si wetin de apin, i drɛg di dedebɔdi go na bush mek i kɔmɔt na rod ɛn kɔba am wit lapa.
13
Afta di man dɔn pul Amasa in dedebɔdi kɔmɔt na rod, ɔl di man dɛn jɛs fala Joab fɔ rɔnata Shiba we na Bikray in bɔypikin.
14
Joab pas to ɔl di fambul dɛn na Izrɛl te rich Ebɛl Bɛth Maaka ɛn insay ɔl di eria we di Bɛrayt de ɛn dɛn ɔl gɛda fɔ fala am.
15
Dɛn sɔrawnd Shiba we i de na Ebɛl Bɛth Maaka. Dɛn pak ston dɛn nia di siti in wɔl ɛn bin dɔn bigin bit bit di wɔl fɔ ib am dɔŋ.
16
Wɛn dɛn de tray fɔ ib di wɔl dɔŋ, wan sɛnsuman ala se lɛ dɛn tɛl Joab fɔ go to am bikɔs i wan tɔk to am.
17
We Joab go mit am i aks am if in na Joab. Joab ansa se yɛs nain. Di uman tɛl am fɔ lisin to wetin i wan tɛl am. Joab se i de lisin.
18
Di uman se fɔstɛm pipul bin de se we yu want gud advays fɔ ɛnitin, go na Ebɛl, yu go gɛt am. Na so dɛn tek tɔk di tɔk.
19
I se dɛn lɛk pis ɛn nɔ gɛt wan prɔblɛm pan ɔl di siti dɛn na Izrɛl ɛn aks Joab wetindu i wan pwɛl dɛn siti we na di mama fɔ Izrɛl. I se wetindu Joab wan fɔ ambɔg PAPA GƆD in prɔpati ɛn pwɛl am.
20
Joab se mek PAPA GƆD nɔ gri fɔ lɛ in pwɛl ɛnitin.
21
I se nɔto tru se dɛn wan pwɛl di ples. I se if dɛn kin an ova Shiba we na Bikray in bɔypikin ɛn wan man we kɔmɔt na ɔplayn na Ifrem, ɔltin go dɔn as na dis man ya wan tɔn bon na trot fɔ Kiŋ Devid. Di uman se dɛn go sɛn in ed oba di wɔl gi Joab.
22
So di uman go rawnd to ɔl di pipul na di siti ɛn tɛl dɛn bɔt di sɛns we i pul. Dɛn ɔl gri, so dɛn kɔt Shiba in ed ɛn sɛn am oba di wɔl to Joab. Dat mek i blo di trɔmpɛt dɔn ɔl in man dɛn lɛf fɔ fɛt. Dɛn ɔl skata ɛn tɔn bak go na dɛn os dɛn. Bɔt Joab in go bak to di kiŋ na Jerusɛlɛm.
23
Na Joab bin de inchaj ɔf di wanol Izrɛlayt ami; Bɛnaya we na Jeoyada in bɔypikin in bin de inchaj ɔf dɛn Kɛlɛthayt ɛn dɛn Pɛlɛtayt dɛn;
24
Adoniram bin de inchaj ɔf dɛn wan we dɛn de fos fɔ wok; dɔn Jɛoshafat we na Ailud in bɔypikin na bin di kiŋ in spoksman.
25
Shiva na bin di sɛktri, Zedɔk ɛn Abiata na bin man dɛn we de mek sakrifays fɔ pipul sin
26
ɛn Ayra sɛf we na Jeirayt na bin wan pan di man dɛn we Devid bin pik fɔ bin in yon man we de mek sakrifays fɔ pipul sin.
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 21 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24