Ezekiel 13

Krio (Krio Fɔs Oli Baybul)

← Chapter 12 Jump to: Chapter 14 →

1PAPA GƆD in wɔd bin kam to mi se:

2“Mɔtalman, prɔfisay agens di prɔfɛt dɛn na Izrɛl, prɔfisay ɛn tɛl di wan dɛn we de prɔfisay wetin dɛn yon maynd se: una yɛri PAPA GƆD in wɔd!

3Papa Gɔd we na Gɔd, se, swɛ go fɔdɔm pan dɛn fulish prɔfɛt dɛn we de fala dɛn yon spirit, ɛn dɛn nɔ si natin!

4E Izrɛl, una prɔfɛt dɛn bin dɔn tan lɛk fɔks dɛn we de na ples we dɔn broko broko.

5Una nɔ go usay di wɔl brok brok, ɔ bil wɔl fɔ Izrɛl, so dat i go tinap di tɛm we wa go bi, wɛn PAPA GƆD in yon de go kam.

6Dɛn dɔn tɔk wɔd dɛn we nɔto tru ɛn lay se tin go bi we nɔto tru; dɛn kin se ‘PAPA GƆD se;’ wɛn PAPA GƆD nɔ sɛn dɛn, stil dɛn de luk to PAPA GƆD fɔ du wetin dɛn se.

7Nɔto laylay vishɔn una kin si ɛn una kin gi laylay prɔfisi? Ɛnitɛm we una de tɔk, una de se, ‘Na so PAPA GƆD se’ ɔlwe a nɔ tɔk natin?”

8Fɔseka dat, Papa Gɔd we na Gɔd se: “bikɔs una bin dɔn de gi laylay prɔfisi dɛn ɛn si laylay vishɔn, fɔseka dat, a de agens una, na so Papa Gɔd we na Gɔd se.

9A go rɛdi fɔ dil wit dɛn prɔfɛt we de si laylay vishɔn ɛn we de gi laylay prɔfisi; dɛn nɔ go de na mi pipul dɛn kansul, ɛn dɛn nem nɔ go de na di rɛjista na Izrɛl, ɛn dɛn nɔ go go insay Izrɛl; ɛn una go no se na mi na Papa Gɔd we na Gɔd.

10Bikɔs, yɛs, bikɔs dɛn dɔn lay gi mi pipul dɛn, de tɛl dɛn se ‘pis de,’ wɛn nɔn pis nɔ de; ɛn bikɔs wɛn di pipul dɛn bil wan wɔl, di prɔfɛt dɛn dab dab am wit waytwɔsh;

11tɛl dɛn wan dɛn we dab di wɔl wit waytwɔsh se i go fɔdɔm. Big big ren go fɔdɔm ebi ebi wan ɛn broko broko ays go fɔdɔm ɛn ebi ebi briz go blo;

12ɛn wɛn di wɔl go fɔdɔm, dɛn nɔ go aks una se, ‘wetin di dab we una bin dab am min naw?’

13So, Papa Gɔd we na Gɔd se: a go mek wan ebi ebi briz blo bikɔs ɔf di vɛks we a vɛks; ɛn big big ren go kam bikɔs ɔf di vɛks we a vɛks; ɛn sɛf, insay di vɛks we a vɛks, big big broko broko ays go fɔdɔm fɔ pwɛl am.

14A go brok di wɔl we una dɔn dab wit waytwɔsh, ɛn briŋ am kam dɔŋ na grɔn, so dat in fawndeshɔn go lɛf ɛmti; wɛn i de fɔdɔm, una go day de; ɛn una go no se na mi na PAPA GƆD.

15Na so a go put mi vɛksteshɔn pan di wɔl ɛn pan dɛn wan dɛn we bin dab am wit waytwɔsh; ɛn a go tɛl una se, Di wɔl nɔ de igen, ɛn di wan dɛn we bin dab am, sɛf nɔ de igen

16di prɔfɛt dɛn na Izrɛl we bin prɔfisay bɔt Jerusɛlɛm ɛn bin si vishɔn bɔt pis fɔ am, wɛn nɔn pis nɔ bin de, na so Papa Gɔd we na Gɔd se.

17“Ɛn yu, mɔtalman, tɔn yu fes to yu pipul dɛn gyal pikin dɛn we de prɔfisay wetin dɛn yon maynd tɛl dɛn; prɔfisay agens dɛn,

18se, na dis Papa Gɔd we na Gɔd se: swɛ go fɔdɔm pan di uman dɛn we de mek majik tay tay put na ɔlman an, ɛn mek vel fɔ ɔl kayn pipul ed we de tray fɔ kech pipul sol! Una go tray fɔ kech mi pipul dɛn sol ɛn kip ɔdawan dɛn as una yon prɔfit.

19Una dɔn mek mi pipul dɛn nɔ rɛspɛkt mi, fɔseka koko ɛbɛ, de kil pipul we nɔ fɔ day, ɛn sev pipul we nɔ sɔpoz fɔ lib, wit di lay we una de lay gi mi pipul dɛn, we de lisin to di lay we una de lay.

20“So Papa Gɔd we na Gɔd se: a de agens una majik tay tay we una de tek fɔ kech sɔl dɛn, ɛn a go chɛr dɛn kɔmɔt na una an; ɛn a go mek di sol dɛn we una de ɔntin, go fri lɛk bɔd.

21A go chɛr una vel dɛn kɔmɔt ɛn fri mi pipul kɔmɔt na una an, ɛn dɛn nɔ go de na una an igen lɛk dɛn wan we dɛn kech na trap, ɛn una go no se na mi na di PAPA GƆD.

22Bikɔs una bin dɔn mek di wan we de waka tret, dɛn at pwɛl, ivindo mi nɔ pwɛl in at, ɛn una dɔn ɛnkɔrej di wikɛd pipul, so dat i nɔ go chenj fɔ ebul sev in layf;

23so una nɔ go si laylay vishɔn, ɔ praktis laylay prɔfisi igen; a go pul mi pipul dɛn kɔmɔt na una an. Na datɛnde, una go no se na mi na di PAPA GƆD.

← Chapter 12 Jump to: Chapter 14 →