Ezekiel 6

Krio (Krio Fɔs Oli Baybul)

← Chapter 5 Jump to: Chapter 7 →

1PAPA GƆD in wɔd kan to mi se:

2“Mɔtalman, tɔn yu fes to di mawnten dɛn na Izrɛl ɛn tɔk wetin bad go apin to dɛn bambay,

3ɛn tɛl dɛn se, una we na di mawnten dɛn na Izrɛl, lisin wetin Papa Gɔd we na Gɔd se! Na so Papa Gɔd we na Gɔd se fɔ tɛl una di mawnten ɛn il dɛn, di dip vali ɛn di shala vali dɛm se: a de tɛl una, mi, misɛf sɛf go briŋ wa kam pan una, ɛn a go pwɛl usay una de wɔship dɛn laylay gɔd dɛn kpatakpata.

4Una ɔlta dɛm go ɛmti, ɛn di ɔlta dɛn we una de bɔn insɛns go brok kam dɔŋ pata pata. Ɛn a go kil una bifo una laylay gɔd dɛn.

5Ɛn a go le Izrɛl dɛn dedebɔdi bifo dɛn laylay gɔd dɛm; ɛn a go skata una bonbon dɛn rawnd una ɔlta dɛm.

6Ɛni big siti dɛn we una tap go ɛmti ɛn dray, ɛn una ples dɛn we una de go wɔship go pwɛl kpatakpata, so dat una ɔlta dɛn go ɛmti ɛn dray ɛn go pwɛl. Una laylay gɔd dɛn go brok ɛn pwɛl, ɛn una insɛns ɔlta dɛn we una de bɔn insɛns go fɔdɔm ɛn natin nɔ go lɛf at ɔl pan ɔl una wok we una dɔn du.

7Ɛn di dedebɔdi dɛm go fɔdɔm midul una ɔl, ɛn una go no se na mi na PAPA GƆD.

8“Bɔt stil, a go lɛf sɔm fɔ una. Wɛn una go gɛt sɔm pan una we nɔ day, ɛn wɛn una dɔn skata na difrɛn difrɛn kɔntri dɛn,

9dɛn una we rɔnawe go mɛmba mi, insay di difrɛn neshɔn dɛn we dɛn kech dɛn ɛn kɛr dɛn go as slev, wɛn a go dɔn pwɛl dɛn rare at we dɔn kɔmɔt pan mi, nɔ want mi igen, ɛn a dɔn blɛn dɛn yay we dɛn bin dɔn put bigyay wan pan dɛn laylay gɔd dɛn; dɔn dɛnsɛf go et dɛnsɛf fɔ ɔl di ivul tin dɛn we dɛn dɔn du, ɛn ɔl di bad bad tin dɛn we dɛn bin de du we a nɔ lɛk.

10Na datɛnde dɛn go no se mi na PAPA GƆD; a nɔ tɔk fɔ natin se a go du dis ivil tin to dɛm.”

11Na so Papa Gɔd we na Gɔd se: “una klap una an ɛn stamp una fut dɛm ɛn se eya! Fɔseka ɔl di bad bad tin dɛm we di Izrɛlayt dɛn bin de du we Gɔd nɔ lɛk; bikɔs dɛn go day bay wa, aŋri, ɛn bay bad bad sik dɛm.

12Di pɔsin we de fawe, na bad sik go kil am. Di wan we de nia, na wa i go day; di wan we go lɛf we nɔ day, na aŋri go kil am. Na so a go pul mi wamat pan dɛn.

13Una go no se mi na PAPA GƆD, wɛn di wan dɛm we dɔn day pan dɛn go lidɔn nia dɛn laylay gɔd dɛm, rawnd dɛn ɔlta dɛm, ɔp ɔl dɛn il dɛm, pantap ɔl dɛn mawnten dɛm, ɔnda ɔl dɛn grin tik dɛn, ɛn ɔnda dɛn kɔtintri dɛm we gɛt plɛnti lif, usay dɛn bin dɔn bɔn tin dɛm we de pul fayn fayn sɛnt to ɔl dɛn laylay gɔd dɛm.

14Ɛn a go pɔnish dɛm ɛn mek dɛn land ɛmti ɛn dray ɔl usay dɛn tap, frɔm di ɛmti land we pɔsin nɔ ebul tap, te rich Ribla. Na da tɛn dɛn go no se, na mi na PAPA GƆD.

← Chapter 5 Jump to: Chapter 7 →