Ezekiel 14

Krio (Krio Fɔs Oli Baybul)

← Chapter 13 Jump to: Chapter 15 →

1Sɔm bigman dɛn na Izrɛl kam ɛn sidɔm bifo mi.

2Ɛn PAPA GƆD in wɔd kam to mi se:

3“Mɔtalman, dɛn man dɛn ya dɔn put dɛn lay lay gɔd na dɛn at, ɛn dɔn mek dɛn sin dɔn blɔk dɛn we; so mi fɔ lɛf misɛf mek dɛn kan aks mi ɛnitin?

4So, tɔk to dɛn ɛn tɛl dɛn se, na so Papa Gɔd we na Gɔd se: ɛni man we de na Izrɛl, we put in lay lay gɔd biznɛs nain at, ɛn put in sin we de blɔk am bifo in fes ɛn stil de kam to di prɔfɛt, na misɛf we na di PAPA GƆD go ansa am, fɔseka di bɔku bɔku lay lay gɔd we i gɛt;

5so a go ebul fɔ gɛt Izrɛl dɛn at, ɔl dɛn wan we dɔn tɔn dɛn bak pan mi fɔseka dɛn lay lay gɔd dɛn we dɛn de wɔship.

6“So tel di Izrɛlayt dɛn se: Papa Gɔd we na Gɔd se: una sɔri fɔ wetin una de du ɛn lɛf di lay lay gɔd dɛn; ɛn pul an pan dɛn bad bad tin dɛn we PAPA GƆD nɔ lɛk.

7Bikɔs ɛni wan pan di pipul dɛn na Izrɛl, ɔ pan di trenja dɛn na Izrɛl, we tɔn in bak pan mi, put in lay lay gɔd dɛn nain at ɛn put in sin we de blɔk am, bifo in fes, ɛn stil de kam to di prɔfɛt fɔ fɛnɔt bɔt insɛf to mi, na misɛf we na PAPA GƆD go ansa am;

8ɛn a go dil wit da pɔsin de; a go mek am ɛgzampul, ɛn dɛn go de tɔk bad bɔt am, ɛn a go pul am kɔmɔt kpatakpata midul mi pipul dɛn; ɛn una go no se na mi na PAPA GƆD.

9Ɛn if dɛn lay gi di prɔfɛt ɛn i tɔk ɛnitin, na mi PAPA GƆD nɔ go dɔn tɔk tru, ɛn a go dil wit am, ɛn a go kil am kɔmɔt midul mi pipul dɛn, we na Izrɛl.

10Ɛn dɛn go bia dɛn pɔnishmɛnt – di prɔfɛt in pɔnishmɛnt ɛn di wan we go fɛnɔt in pɔnishmɛnt go bi di sem –

11so dat Izrɛl nɔ go go astre kɔmɔt nia mi, ɛn nɔ dɔti dɛnsɛf igen igen wit ɔl dɛn sin dɛn we dɛn de kɔmit. Bɔt dɛn go bi mi pipul dɛn ɛn mi go bi dɛn Gɔd, na so Papa Gɔd we na Gɔd se.

12PAPA GƆD in wɔd kam to mi se;

13“Mɔtalman, wɛn wan kɔntri kɔmit sin to mi, bay we dɛn nɔ bin de du tin ɛn nɔ biliv mi, ɛn a dil wit dɛn ɛn mek dɛn nɔ gɛt natin fɔ it, ɛn a go sɛn bad bad aŋri pan am; ɛn a go mek nɔn mɔtalman ɔ animal nɔ tap de,

14i lɛk dɛn tri man ya, Noa, Daniɛl ɛn Job bin de de, na dɛn yon layf nɔmɔ dɛn go ebul sev, fɔseka we dɛn de waka tret wit PAPA GƆD, na so Papa Gɔd we na Gɔd se.

15If a mek dɛn wayl animal dɛn waka pas insay di land, ɛn dɛn pwɛl pwɛl am, we nɔbɔdi nɔ tap de, so dat nɔbɔdi nɔ go ebul pas de fɔseka di animal dɛn;

16i lɛk dɛn tri man ya bin de de, wans a de, PAPA GƆD swɛ se, dɛn nɔ go ebul fɔ sev nɔn bɔypikin ɔ gyal pikin; na dɛnsɛf nɔmɔ dɛn go ebul sev, bɔt di land go stil ɛmti.

17“Ɔ if a briŋ fɛt kan na di land, ɛn se lɛ di fɛt de ɔlsay na di land; ɛn mek nɔn mɔtalman ɔ animal nɔ tap de;

18ɔl we dɛn tri man ya bin de de, PAPA GƆD swɛ se, wans mi de, dɛn nɔ go ebul sev nɔn bɔy ɔ gyal pikin, bɔt na dɛn nɔmɔ go sev.

19Ɔ if a sɛn wan bad bad sik pan di land, ɛn put mi bad bad vɛksteshɔn pan am we blɔd go kɔmɔt, fɔ kil ɔl di mɔtalman dɛn ɛn ɔl di animal dɛn we de de,

20i lɛk Noa, Daniɛl ɛn Job bin de de, PAPA GƆD swɛ se, wans mi de, dɛn nɔ go ebul sev nɔn bɔy ɔ gyal pikin, pas dɛn yon layf nɔmɔ dɛn go ebul sev fɔseka we dɛn de waka tret wit PAPA GƆD.

21“Bikɔs Papa Gɔd we na Gɔd se, if na mi fo bad bad jɔjmɛnt akshɔn dɛn a sɛn naw, dat na wa, bad bad aŋri, ivul bist ɛn bad bad sik fɔ kil ɔl di pipul dɛn ɛn ɔl di animal dɛn!

22Pan ɔl dat, if ɛnibɔdi go ebul liv fɔ pul bɔypikin dɛn ɛn gyal pikin dɛn kɔmɔt de, wɛn dɛn kam to yu, ɛn yu si aw dɛn tan ɛn wetin dɛn de du, yu go bia go fɔ di bad bad tin we apin to Jerusɛlɛm; di tin dɛn we a mek apin to dɛn.

23We yu si aw dɛn tan ɛn wetin dɛn de du, yu at kol; datɛnde una go no se a nɔ du wetin a du na Jerusɛlɛm fɔ natin na so Papa Gɔd we na Gɔd se so.

← Chapter 13 Jump to: Chapter 15 →