Ezekiel 36

Krio (Krio Fɔs Oli Baybul)

← Chapter 35 Jump to: Chapter 37 →

1“Ɛn yu mɔtalman, prɔfisay to di Izrɛl mawnten dɛm ɛn se, O Izrɛl mawnten dɛm, yɛri wetin PAPA GƆD in wɔd se:

2na dis PAPA GƆD se: bikɔs di ɛnimi se bɔt una, ‘Aba’ ɛn ‘di lɔntɛm ay ples dɛm dɔn blant wi naw,’

3fɔseka dis, prɔfisay ɛn se, na dis PAPA GƆD se: bikɔs, yɛs, bikɔs dɛn mek una ɛmti, natin ɛn nɔbɔdi nɔ de de, ɛn so kwis una ɔlsay dat una blant di balans neshɔn dɛm, ɛn una kam bi udat dɛn de tɔk bɔt ɛn di ivul kongosa we di pipul de kongosa;

4fɔseka dis, O Izrɛl mawnten dɛm, yɛri wetin PAPA GƆD in wɔd se: na dis PAPA GƆD se to di mawnten dɛm ɛn di il dɛm, di watasay dɛm ɛn di vali dɛm, di ɛmti, yuslɛs ples we natin ɛn nɔbɔdi nɔ de, ɛn di big siti dɛm we nɔbɔdi nɔ de, ɛn we dɔn kam bi say we di balans neshɔn dɛn rawnd, de ambɔgin bad bad, ɛn laf, laf;

5fɔseka dat, na dis PAPA GƆD se; a de tɔk pan mi bad bad jɛlɔs we a gɛt pan di balans neshɔn dɛm ɛn pan ɔl Idɔm, we gi mi kɔntri to dɛnsɛf fɔ dɛn yon, ɛn gladi wit ɔl dɛn at, ɛn nɔ gɛt rɛspɛkt at ɔl, so dat dɛn go tek am fɔ dɛn yon ɛn pwɛl am pata pata.

6Fɔseka dat, prɔfisay bɔt di Izrɛl kɔntri, ɛn se to di mawnten dɛm, ɛn di il dɛm, di dip dip naro vali dɛm, di vali dɛnsɛf, se, na dis PAPA GƆD se; una lisin, a de tɔk pan mi jɛlɔs in bad bad vɛks wan, bikɔs una dɔn bia ɔl di disgres we di neshɔn dɛn briŋ pan una.

7Fɔseka dat, na dis PAPA GƆD se; a swɛ se di neshɔn dɛm we de rawnd una, dɛnsɛf go bia di sem disgres we dɛn bin briŋ pan una.

8Bɔt una, O Izrɛl mawnten dɛm, una go pul una an dɛm kɔmɔt na do, ɛn gi una frut to mi Izrɛl pipul; fɔ dɛn go kam om jis nɔ.

9Fɔ, una lisin, a de fɔ una ɛn a go tɔn to una, ɛn dɛn go dig ɛn plant pan una

10ɛn a go ad mɔ ɛn mɔ mɔtalman dɛn pan una, ɛn ɔl Izrɛl pipul, pan dɛn ɔl; dɛn go tap na di big siti ɛn bil bak ɔl di ples dɛn we bin dɔn yuslɛs.

11Ɛn a go ad mɔ ɛn mɔ mɔtalman, ɛn bist dɛm pan una; ɛn dɛn go plɛnti mɔ ɛn mɔ ɛn dɛn go bia bɔku frut dɛm; ɛn a go mek dɛn tap wit una lɛk aw dɛn bin de bifo, ɛn du mɔ gud pas wetin dɛn bin ɛva de du bifo, to una. Na datɛnde dɛn go no se na mi na PAPA GƆD.

12Yɛs, a go mek mɔtalman dɛn waka na una ples, ivin Izrɛl, in pipul; ɛn dɛn go tek una, ɛn una go bi dɛn prɔpati, ɛn una nɔ go kil dɛn pikin dɛn igen, igen

13So, na dis PAPA GƆD se: bikɔs mɔtalman dɛn se to una, ‘una de it mɔtalman dɛn awaŋɔt wan, ɛn una de kil una neshɔn pikin dɛn.

14Fɔseka dat, una nɔ go it mɔtalman dɛn awaŋɔt wan igen igen, ɛn una nɔ go kil una neshɔn pikin dɛn igen igen, PAPA GƆD tɔk se

15ɛn a nɔ go mek una yɛri igen igen di neshɔn dɛn kɔmplen, kɔmplen; ɛn una nɔ go bia di pipul dɛn disgres igen igen, ɛn nɔ mek una neshɔn bɔk in fut igen igen, PAPA GƆD tɔk se.

16PAPA GƆD in wɔd bin kam to mi se:

17“mɔtalman, wɛn Izrɛl pipul bin tap na dɛn yon kɔntri, dɛn bin dɔti am bay aw dɛn bin de biev ɛn wetin dɛn de du; dɛn bievyɔ bifo mi bin tan lɛk we uman nɔ ba klin wɛn in mun de ɔp.

18So a bin tɔn mi bad bad vɛks pan dɛm lɛk wata, fɔseka di blɔd we dɛn dɔn mek flo na di kɔntri, ɛn fɔseka di lay lay gɔd dɛm we dɛn tek dɔti mi.

19A bin skata skata dɛn pan di neshɔn dɛm, ɛn dɛn bin sheb sheb pan di difrɛn difrɛn kɔntri dɛm; a bin jɔj dɛm bay aw dɛn bin de biev ɛn wetin dɛn bin de du.

20Bɔt wɛn dɛn bin kam to di neshɔn dɛm, ɛnisay dɛn go, dɛn nɔ bin rɛspɛkt mi oli nem; ɛn we pipul de tɔk bɔt dɛn, dɛn de se, ‘dɛn wan ya, na PAPA GƆD in pipul, bɔt stil dɛn bin gɛt fɔ kɔmɔt nain kɔntri.

21Bɔt a bin kia fɔ mi oli nem, we di Izrɛl pipul kam mek di neshɔn dɛm usay dɛn bin go, luk dɔŋ pan.

22“Fɔseka dat, tɔk to di Izrɛl pipul se, na dis PAPA GƆD se: nɔto fɔ una sek, O Izrɛl pipul, mek a de kam akt o, bɔt na fɔ mi oli nem in sek, we una nɔ rɛspɛkt na di neshɔn dɛm we una go.

23Ɛn a go pruv di oli, we, mi pawaful nem oli, we dɛn nɔ rɛspɛkt na di neshɔn dɛm, ɛn we una nɔ rɛspɛkt dɛm; ɛn di neshɔn dɛn go no se na mi na di PAPA GƆD, wɛn a pruv, bifo dɛn yay, pan una, mi oli we a oli.

24Fɔ a go tek una kɔmɔt pan di neshɔn dɛm ɛn gɛda una kɔmɔt pan ɔl di kɔntri dɛm ɛn briŋ una kam insay una yon kɔntri.

25A go sprinkul klin wata pan una, ɛn una go klin pan ɔl una dɔti dɛm, ɛn a go was una klin pan ɔl una lay lay gɔd dɛm.

26A go gi una nyu at ɛn put nyu spirit insay una. Ɛn a go pul di ston at we de pan una bɔdi ɛn gi una at we mek wit flɛsh

27ɛn a go put mi yon spirit insay una, ɛn mek una waka bay aw mi lɔ dɛn se, ɛn mek una kiaful aw una de du mi kɔmand dɛm.

28Una go tap na di kɔntri we a bin dɔn gi una dadi dɛm, ɛn una go bi mi pipul, ɛn a go bi una PAPA GƆD.

29Ɛn a go sev una pan ɔl una dɔti dɛn, ɛn a go samɔns di sid dɛm ɛn mek dɛm plɛnti ɛn a nɔ go mek ɛni aŋribɛlɛ kam pan una.

30A go mek di tik dɛn bia bɔku bɔku frut, ɛn di fil dɛnsɛf go bia plɛnti plɛnti so dat una nɔ go bia di aŋri bɛlɛ disgres we una bin bia na di neshɔn dɛm igen igen.

31Dɛn una go mɛmba una ivul bievyɔ ɛn di tin dɛn we una bin de du we nɔ gud, ɛn una go et unasɛf fɔ una bad bad wikɛdnɛs ɛn di wikɛd tin dɛn we una bin de du we de briŋ etrɛd ɛn bad bad fred fred.

32Bɔt nɔto fɔ una sek a go akt, PAPA GƆD se; ɛn mek una no dat O Izrɛl pipul, una fɔ shem ɛn wɔri bɔt una bievyɔ dɛn.

33“Na dis PAPA GƆD se; da de we a go was una klin pan ɔl una wikɛd wikɛd tin dɛm, a go mek pipul kam tap na di big siti dɛm, ɛn dɛn go bil di yuslɛs ples dɛn bak.

34Ɛn di kɔntri we bin ɛmti, nɔbɔdi ɛn natin nɔ bin de de, dɛn go dig ɛn plant pan am, ɛn i nɔ tan igen lɛk di ɛmti ples we natin ɛn nɔbɔdi nɔ de, we i bin bi na ɔl dɛn wan we kin de pas de, dɛn yay.

35Ɛn dɛn go se, ‘dis kɔntri we bin ɛmti, natin ɛn nɔbɔdi nɔ de de, dɔn tan naw, lɛk di gadin na Idɛn, ɛn pipul dɛn dɔn tap na di big siti dɛm we bin ɛmti, nɔbɔdi ɛn natin nɔ de de ɛn bin dɔn pwɛl pata pata ɛn we bin yuslɛs; ɛn dɛn dɔn strɛnkin dɛm traŋa traŋa wan.

36Dɛn di neshɔn dɛn we lɛf rawnd una, go no se na mi, PAPA GƆD, dɔn bil bak di ples dɛn we bin dɔn pwɛl pata pata ɛn dɔn plant bak na di ples we bin ɛmti, natin ɛn nɔbɔdi nɔ bin de de.

37“Na dis PAPA GƆD se: na dis sɛf a go mek di Izrɛl pipul aks mi fɔ du fɔ dɛm: fɔ mek a ad mɔ ɛn mɔ to dɛn mɔtalman dɛn lɛk bɔku bɔku ship.

38Lɛk di bɔku ship fɔ sakrifays dɛm, lɛk di bɔku ship na Jerusɛlɛm we kin de, wɛn dɛn gɛt dɛn fist de dɛn, we dɛn bin dɔn chuz; so dat di big siti dɛm we bin yuslɛs, go ful wit bɔku bɔku mɔtalman dɛn lɛk bɔku bɔku ship. Na datɛnde dɛn go no se na mi na Papa Gɔd.

← Chapter 35 Jump to: Chapter 37 →