bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Krio
/
Krio (Krio Fɔs Oli Baybul)
/
Ezekiel 23
Ezekiel 23
Krio (Krio Fɔs Oli Baybul)
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 24 →
1
PAPA GƆD in wɔd kam to mi se:
2
“Mɔtalman, tu uman dɛm bin de, wan mami gyal pikin dɛm.
3
Dɛn bin de rare na Ijipt; dɛn bin de rare wɛn dɛn yɔŋ; na de dɛn bin kwis dɛn bɔbi dɛm ɛn ple wit dɛn vajin buzɔm dɛm.
4
Di big wan bin nem Oola, ɛn in sista bin nem Ooliba. Dɛn bin kam blant mi, ɛn dɛn bɔn bɔy ɛn gyal pikin dɛm. As fɔ dɛn nem dɛm, Oola na Sameria ɛn Ooliba na Jerusɛlɛm.
5
“Oola bin de rare we i blant mi; ɛn i bin de sho bɔku lɔv to in switat dɛn we na di Asirian dɛm,
6
fɛtman dɛn we de wɛr pɔpul klos, gɔvna dɛm ɛn kɔmanda dɛm, dɛn ɔl na yɔŋ man dɛn we tan lɛkɛ tin fɔ it, man dɛn we de rayd pan ɔs dɛm.
7
I bin rare, gi insɛf fri wan to dɛn, to ɔl di bɛtɛ wan pan di Asiria man dɛm. Ɛn i dɔti insɛf na mi yay wit ɔl di lay lay gɔd dɛm, we ɔl di wan we i de sho bɔku lɔv, bin gɛt.
8
I nɔ bin tap in rare layf we i bin dɔn de pan, frɔm we i bin de na Ijipt; bikɔs frɔm di tɛm we i bin yɔŋ, man dɛn dɔn de lidɔm wit am ɛn ol in vajin buzɔm, ɛn dɛn tɔn di want we dɛn want uman bad bad wan, to am.
9
So fɔseka dat, a bin put am nain switat dɛn, dat na di Asirian dɛm we i bin de sho bɔku lɔv.
10
Na dɛn kam sho in nekɛdnɛs na do; dɛn kapchɔ in bɔy ɛn gyal pikin dɛm; ɛn dɛn kil in wit sɔd; ɛn i bin kam bi wan we dɛn uman de tɔk bad bɔt, afta dɛn bin dɔn kɛri awt jɔjmɛnt pan am.
11
“In sista Ooliba bin si ɔl dis, stil in bin kɔrɔpt mɔ pas in sista, bay aw in bin de sho bɔku lɔv, ɛn pan in rare, we bin wɔs pas in sista yon.
12
I bin sho bɔku lɔv to di Asirian dɛn gɔvna dɛm, ɛn kɔmanda dɛm, dɛn fɛtman dɛm insay dɛn ful unifɔm fɔ fɛt, man dɛn we de rayd ɔs ɛn dɛn ɔl na yɔŋ man dɛm we fayn lɛk tin fɔ it.
13
Ɛn a bin si se in bin dɔti na mi yay; dɛn ɔltu waka di sem rod.
14
Bɔt Ooliba in bin rare pasmak; i bin si man dɛm we dɛn drɔ na wɔl, di Babilonian dɛn pikchɔ we dɛn drɔ wit rɛd pent;
15
dɛn tay bɛlt rawnd dɛn wes, ɛn gɛt big big tɔban we de flay na dɛn ed, ɛn dɛn ɔl luk lɛk ɔfisa dɛn, pikchɔ we sho tru Babilonian we bɔn na Chaldia.
16
Wɛn Ooliba bin si dɛm, i fɔl fɔ dɛm bad bad ɛn sɛn mɛsenja dɛn go to dɛm na Babilɔn.
17
Ɛn di Babilonian dɛn bin kan to am nain bed we i kin mek lɔv, ɛn dɛn dɔti Ooliba na Gɔd yay wit di bad bad want we dɛn want uman; afta dɛn dɔn dɔti am na Gɔd yay dɔn, i fil nasti ɛn in at kɔmɔt pan dɛn.
18
Wɛn i bin dɔn rare opin opin wan ɛn nɔ bisin aw i de sho in nekɛdnɛs, a bin fɛdɔp ɛn lɛf am to insɛf, lɛk aw a bin kɔmɔt biɛn in sista.
19
Na da tɛm de i bigin rare mɔ, de mɛmba di tɛm we i bin yɔŋ, we i bin de rare na Ijipt
20
we i bin de sho bɔku lɔv to in switat dɛn de, we dɛn prayvet na lɛk dɔnki yon, ɛn wɛn dɛn dischaj, i tan lɛk ɔs yon.
21
Na dat mek yu de mɛmba di rud we yu bin de biev we yu bin yɔŋ wɛn di Ijipshian dɛn de andul una buzɔm ɛn kwis una yɔŋ bɔbi dɛm.”
22
Fɔseka dat, E Ooliba, na dis Papa Gɔd we na Gɔd se: “Biliv mi, a go mek yu switat dɛm we yu dɔn fɛdɔp wit grap pan yu, ɛn a go mek dɛn atak yu ɔlsay:
23
Di Babilonian dɛm, ɛn ɔl di Chaldian dɛm, Pɛkɔd ɛn Shoa ɛn Koa, ɛn ɔl di Asirian dɛm de wit dɛm, yɔŋ man dɛm we fayn lɛk tin fɔ it, ɛn gɔvna dɛm, kɔmanda dɛm, ɔfisa dɛm, ɛn fɛt man dɛm, dɛn ɔl de rayd ɔs.
24
Ɛn dɛn go kɔmɔt na di nɔt kam atak yu. Dɛn go de rayd chariɔt ɛn trɔk dɛm, ɛn go kam wit bɔku bɔku pipul kan atak yu; dɛn go atak yu wit bɔkla, shild ɛn ɛlmɛt, ɛn a go lɛf di jɔjmɛnt na dɛn an, ɛn dɛn go jɔj una bay aw dɛn sabi jɔj.
25
Ɛn a go so put mi vɛksteshɔn pan una, so dat na wit bad bad vɛksteshɔn, dɛn go dil wit una. Dɛn go kɔt una nos ɛn una yes dɛm kɔmɔt, ɛn dɛn go kil una pikin dɛn wit sɔd. Dɛn go kapchɔ una bɔy ɛn gyal pikin dɛm, ɛn na faya go kil una pikin dɛm.
26
Pantap dat, dɛn go tek ɔl una klos dɛn, ɛn ɔl una juɛl dɛm.
27
Na so a go tap yu rudnɛs ɛn una rarelayf we yu briŋ kɔmɔt Ijipt; so dat yu nɔ go es una yay ɔp fɔ luk di Ijipshian dɛm ɔ ivin mɛmba dɛm igen
28
Ɛn na dis Papa Gɔd we na Gɔd se: Lisin, a go gi yu to di wan dɛn we una et, di wan dɛn we yu bin fɛdɔp wit ɛn bin kɔmɔt biɛn.
29
Ɛn dɛn go dil wit yu wit etrɛd, ɛn tek ɔl di tin dɛn we yu dɔn wok fɔ go, ɛn lɛf yu nekɛd ɛn ɛmti, ɛn di nekɛdnɛs pan yu rarelayf go mɔs kɔmɔt na do. Na yu rudnɛs ɛn yu rarelayf
30
dɔn briŋ dis kam pan yu, bikɔs yu bin de rare to di neshɔn dɛm, ɛn dɔti yusɛf na mi yay wit dɛn lay lay gɔd dɛm.
31
Yu dɔn waka di rod we yu sista bin waka, ɛn na so a go gi yu, yu sista in kɔp na yu an.
32
Na dis Papa Gɔd we na Gɔd se: “yu go drink na yu sista in kɔp we dip ɛn big. Dɛn go laf yu ɛn tek yu mek lafin stɔk bikɔs di kɔp gɛt bɔku tin insay;
33
Na drɔŋɔ drɔŋɔ ɛn sɔri layf yu go de. Yu sista Sameria in kɔp, na kɔp we gɛt bad bad fred fred ɛn distrɔkshɔn;
34
yu go drink am, ɛn dɔn ɔltin, ɛn yu go jɔg jɔg yu ia, ɛn chɛr chɛr yu bɔbi dɛm Papa Gɔd we na Gɔd se, bikɔs na mi dɔn tɔk am.
35
Fɔseka dat, na dis Papa Gɔd we na Gɔd se: Bikɔs una dɔn fɔgɛt bɔt mi ɛn dɔn trowe mi, una lisin wetin go apin to una fɔseka una rudnɛs ɛn rare layf.”
36
PAPA GƆD bin tɛl mi se: “Mɔtalman, yu go jɔj Oola ɛn Ooliba? Dɛn, tɛl dɛm di tin dɛn we dɛn du we a et bad bad wan.
37
Bikɔs dɛn dɔn kɔmit adɔltri, ɛn blɔd de na dɛn an; dɛn dɔn kɔmit adɔltri wit dɛn lay lay gɔd dɛm; sɛf dɔn gi mi bɔypikin dɛn we dɛn bɔn fɔ mi to lay lay gɔd fɔ it.
38
Semweso, na dɛn tin ya dɛn dɔn du mi: dɛn dɔti mi ples we dɛn de pre to mi ɛn luk dɔŋ pan mi de fɔ blo ɛn rɛst di sem de.
39
Bikɔs dɛn dɔn kil dɛn pikin dɛm as sakrifays to dɛn lay lay gɔd dɛn, di sem de, dɛn de kam insay mi ples we dɛn de pre to mi kam dɔti am. Fɔ tru, na dis dɛn de du na mi os.
40
Dɛn bin ivin sɛn mɛsenja go kɔl man dɛn we de fawe fɔ kam, ɛn biliv mi, dɛn kam. Fɔseka dɛm, yu bin was yusɛf, pent yu yay dɛm, ɛn drɛs yusɛf wit ɔlkayn riŋ chen ɛn baŋuls.
41
Ɛn yu bin sidɔm pan wan ɔfishal kawch, we bin gɛt tebul, we prɛd wit fayn fayn tebul klos, ɛn na de yu bin dɔn put mi insɛns ɛn mi ɔyl.
42
Di nɔys we pipul we nɔ bisin bɔt ɛnitin kin mek, bin de wit am; ɛn dɛn bin briŋ dɛn chip chip drɔŋɔ drɔŋɔ pɔsin dɛn kɔmɔt na di dray ɛn ɛmti ples; ɛn di uman dɛn wɛr baŋuls na dɛn an, ɛn fayn fayn krawn na dɛn ed.
43
“Nain a aks se, man dɛnsɛf nɔ de kɔmit adɔltri wɛn dɛn de rare wit am?
44
Bikɔs dɛn dɔn lidɔm wit am, lɛk we man dɛn de go fɛn rare gyal, na so dɛn de go fɛn Oola ɛn Ooliba fɔ go du rudnɛs.
45
Bɔt dɛn man dɛn we de waka tret na Papa Gɔd in yay, go pas jɔjmɛnt pan am wit di sɛntɛns dɛn we dɛn kin sɛntɛns dɛn uman we kɔmit adɔltri, ɛn wit di sɛntɛns we dɛn kin pas pan uman dɛn we kil ɛn mek blɔd flo; bikɔs dɛn na uman we de kɔmit adɔltri ɛn we blɔd de na dɛn an.’
46
Bikɔs na dis Papa Gɔd we na Gɔd se: briŋ wan big big krawd kan mit dɛm, ɛn a go mek dɛm pipul we fɔ de du bad ɛn tin fɔ kapu kapu.
47
Ɛn di bɔku krawd go ston dɛm ɛn kil dɛm wit dɛn sɔd dɛm; dɛn go kil dɛn bɔy ɛn gyal pikin dɛm ɛn bɔn dɛn os dɛn kan dɔŋ.
48
Ɛn na so a go tap rudnɛs na di kɔntri, sɔntɛm dat go mek ɔl uman dɛn tek wɔnin ɛn nɔ kɔmit rudnɛs lɛk aw una dɔn du.
49
Ɛn una go gɛt di pe fɔ una rudnɛs, ɛn una go bia una pɔnishmɛnt fɔ di adɔltri we una kɔmit we na sin, ɛn una go no se na mi na di Papa Gɔd we na Gɔd.”
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 24 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48