Ezekiel 20 — Krio (Krio Fɔs Oli Baybul)

1Di de we mek tɛn insay di mɔnt we mek fayv, insay di ia we mek sɛvin we Izrɛl bin de ɛgzayl, patikla bigman dɛn na Izrɛl bin kam fɛnɔt to PAPA GƆD, ɛn bin sidɔm bifo mi.

2Ɛn PAPA GƆD in wɔd bin kam to mi se;

3“Mɔtalman tɔk to dɛn bigman dɛn ya na Izrɛl, ɛn tɛl dɛn se, ‘Na dis Papa Gɔd we na Gɔd se, Na fɔ kam fɛnɔt to mi una kam? Papa Gɔd we na Gɔd se, wans mi de, una nɔ go fɛnɔt to mi.

4Yu go jɔj dɛm Mɔtalman, yu go jɔj dɛm? If na dat, lɛ dɛn no di bad bad tin dɛn we PAPA GƆD nɔ lɛk we dɛn fɔstɛmpapa dɛn du,

5ɛn tɛl dɛn se, na dis Papa Gɔd we na Gɔd se; di de wɛn a bin pik Izrɛl, a bin swɛ to Jekɔb in jɛnareshɔn. We a sho misɛf to dɛn na Ijipt, a bin swɛ to dɛm ɛn se, na mi na di PAPA GƆD we na una Gɔd.

6Da de de, a bin swɛ to dɛn se a go pul dɛn kɔmɔt Ijipt, kam na wan land we a dɔn fɛn fɔ dɛm, land we gud fɔ plant ɛn fɔ mɛn animal, we na di land we fayn pas ɔl.

7Ɛn a bin tɛl dɛn se, lɛ dɛn ɔl trowe dɛn tin dɛn we a et bad bad wan we dɛn at de pan, ɛn lɛ dɛn nɔ dɔti dɛnsɛf na mi yay wit Ijipt dɛn laylay gɔd dɛn; Mi na PAPA GƆD we na una Gɔd.

8Bɔt dɛn bin tɔn dɛn bak pan mi ɛn nɔ gri lisin to mi; dɛn ɔl nɔ bin gri trowe di tin dɛn we a et bad bad wan we dɛn at bin de pan, ɛn dɛn nɔ bin gri kɔmɔt biɛn Ijipt dɛn laylay gɔd dɛn. Dɛn a bin tink se a fɔ put mi vɛksteshɔn pan dɛn ɛn put mi krɔs pan dɛn na Ijipt.

9Bɔt a bin du so fɔseka mi nem, so dat dɛn nɔ go fityay mi bifo di neshɔn dɛn we dɛn bin tap, we na bifo dɛn a bin sho misɛf to dɛn bay we a bin pul dɛn kɔmɔt Ijipt.

10So a bin pul dɛn kɔmɔt Ijipt ɛn briŋ dɛn kam na di land we ɛmti ɛn natin nɔ de.

11A bin gi dɛm mi lɔ dɛm ɛn sho dɛm mi kɔmand dɛm, we na dɛnɔl mɔtalman we de na wɔl fɔ du.

12Pantap dat, a bin gi dɛm mi de fɔ blo ɛn rɛst as sayn bitwin mi ɛn dɛn, so dat dɛn go no se na mi PAPA GƆD de mek dɛn oli.

13Bɔt Izrɛl bin ribɛl agens mi na di say we ɛmti ɛn dray we natin nɔ de; dɛn nɔ bin du wetin mi lɔ se, bɔt tɔn dɛn bak pan mi kɔmand dɛm, we na we mɔtalman du dɛm dɛn go gɛt lɔŋ layf; dɛn disrɛspɛkt mi de fɔ blo ɛn rɛst bad bad wan. So a bin tink se a fɔ put mi vɛksteshɔn pan dɛn na di ɛmti ples we natin nɔ de, so dat dɛn ɔl go day.

14Bɔt a bin du so fɔseka mi nem, so dat dɛn nɔ go pwɛl mi nem bifo di neshɔn dɛm usay dɛn bin tap, we na bifo dɛn a bin sev dɛm.

15Ɛn na so a bin swɛ na di say we ɛmti ɛn dray we natin nɔ de, se, a nɔ go briŋ dɛm kam na di land we a bin dɔn gi dɛm, we gud fɔ plant ɛn fɔ mɛn animal, di land we dɛn de kɔle pan pas ɔl ɔda land,

16bikɔs dɛn tɔn dɛn bak pan mi kɔmand dɛm, ɛn nɔ waka bay aw mi lɔ dɛn se, ɛn nɔ rɛspɛkt mi de fɔ blo ɛn rɛst; dat na bikɔs dɛn at bin de to dɛn laylay gɔd dɛm.

17Pan ɔl dat, a bin mek lɛk a nɔ si dɛm, ɛn a nɔ bin nyakanyaka dɛm, ɔ mek dɛn day na di say we ɛmti ɛn dray we natin nɔ de.

18“Ɛn a bin tɛl dɛm pikin dɛm na di say we ɛmti ɛn dray we natin nɔ de se, Una nɔ du wetin una fɔstɛm-papa dɛn bin de du, ɛn nɔ biliv wetin dɛn bin biliv. Una nɔ dɔti unasɛf na mi yay wit dɛn laylay gɔd dɛn.

19Na mi PAPA GƆD na una Gɔd; una du wetin mi lɔ se, ɛn mek shɔ se una obe mi kɔmand dɛm,

20ɛn mek mi de dɛn fɔ blo ɛn rɛst oli so dat dɛn go bi sayn bitwin mi ɛn una, so dat una go no se, mi we na PAPA GƆD, na una Gɔd.

21Bɔt di pikin dɛn bin ribɛl agens mi; dɛn nɔ bin du wetin mi lɔ dɛn se, ɛn nɔ bin bisin bɔt mi kɔmand dɛm, we na we mɔtalman du dɛn, dɛn go gɛt lɔŋ layf, ɛn semwe dɛn nɔ bin rɛspɛkt mi de fɔ blo ɛn rɛst. “So a bin tink na mi at se a fɔ put mi bad bad vɛksteshɔn pan dɛm, ɛn put mi krɔs pan dɛm na di say we ɛmti ɛn natin nɔ de.

22Bɔt a bin ol mi at, ɛn a bin du so fɔseka mi nem, so dat dɛn nɔ go pwɛl mi nem to di neshɔn dɛm, we na bifo dɛn a bin sev dɛn.

23Pantap dat a bin swɛ to dɛn na di say we ɛmti ɛn natin nɔ de, se, a go skata dɛm na ɔl di difrɛn neshɔn dɛm, ɛn sheb sheb dɛm ɔlsay na di difrɛn difrɛn kɔntri dɛm,

24bikɔs dɛn nɔ bin kɛriawt mi kɔmand dɛm, bɔt bin dɔn tɔn dɛn bak pan mi lɔ dɛm ɛn nɔ bin rɛspɛkt mi de fɔ blo ɛn rɛst, ɛn dɛn bin dɔn put at to dɛn papa dɛn laylay gɔd dɛm.

25Pantap dat, a bin gi dɛn lɔ dɛm we nɔ gud ɛn kɔmand dɛm we go mek dɛn nɔ gɛt lɔŋ layf;

26ɛn a bin dɔti dɛm na mi yay wit dɛn yon yon prɛzɛnt dɛm, dat na we a mek dɛn sakrifays ɔl dɛn fɔs pikin dɛn na faya, so dat dɛn go fred bad bad wan; a du so, so dat dɛn go no se na mi na PAPA GƆD.

27“So mɔtalman, tɔk to Izrɛl ɛn tɛl dɛm se, na dis Papa Gɔd we na Gɔd se: na semweso so una fɔstɛmpapa dɛn pwɛl mi nem, bay we dɛn bin kɔmɔt biɛn mi.

28Bikɔs we a bin dɔn briŋ dɛm kam na di land we a bin dɔn swɛ se a go gi dɛm, ɛnisay we dɛn si ay il ɔ tik we gɛt bɔku lif, na de dɛn kin go mek dɛn sakrifays dɛn, ɛn kin gi wetin go mek mi at wam. Na de dɛn swit sɛnt kin kɔmɔt kam ɔp, ɛn na de dɛn kin tɔn dɛn drink ɔfrin dɛm.

29(A aks dɛn se, ‘wetin na dis ay ples we una kin go? So dɛn kɔl di ples Bama, te dis de.)

30So, tɛl di Izrɛlayt dɛn se, na dis Papa Gɔd we na Gɔd se: una go dɔti unasɛf na mi yay lɛk aw una fɔstɛmpapa dɛn bin du, ɛn go biɛn dɛn tin dɛn we a et bad bad wan?

31We una gi una prɛzɛnt dɛm ɛn sakrifays una bɔypikin dɛn na faya, una de dɔti unasɛf na mi yay wit ɔl una laylay gɔd dɛn te tide. Na una fɔ kam fɛnɔt to mi, una Izrɛl? Papa Gɔd we na Gɔd se, wans a de, una nɔ go ebul fɛnɔt to mi.

32“Wetin de na una maynd nɔ go ɛva bi - dat na we una kin tink se, “lɛ wi tan lɛk di neshɔn dɛm. Lɛ wi tan lɛk di fambul dɛn we de na dɛn ɔda kɔntri dɛn, ɛn wɔship bod ɛn ston!

33Papa Gɔd we na Gɔd se, wans a de, biliv mi, na wit mi pawaful an, ɛn wit mi an we rɛdi fɔ blo, ɛn na we a de du bad we a vɛks bad bad wan, A go bi kiŋ oba una.

34A go pul una kɔmɔt to di difrɛn difrɛn pipul dɛn, ɛn gɛda una kɔmɔt na di difrɛn difrɛn kɔntri dɛn we una skata wit mi pawaful an, mi an we rɛdi fɔ blo ɛn we a de du bad we a vɛks bad bad wan;

35ɛn a go briŋ una kam na di difrɛn pipul dɛn ples we ɛmti ɛn natin nɔ de; ɛn na de a go jɔj una fes to fes.

36Papa Gɔd we na Gɔd se, lɛk aw a bin jɔj una fɔstɛmpapa dɛm na di say we ɛmti ɛn natin nɔ de, na Ijipt, na so a go jɔj una.

37A go rul una traŋa wan ɛn tren una lɛk soja, ɛn mek una rɛspɛkt mi Kɔvinant we a mek wit una.

38A go pɔj di rebɛl dɛn ɛn di wan dɛn we de kɔmit sin kɔmɔt insay una; a go pul dɛn kɔmɔt na di land we dɛn tap, bɔt dɛn nɔ go go insay Izrɛl. Na datɛnde una go no se na mi na PAPA GƆD.

39“As fɔ una, una Izrɛl, na dis Papa Gɔd we na Gɔd se: if una nɔ de lisin to mi, lɛ ɔlman go sav in laylay gɔd frɔm naw sote go, bɔt una nɔ go ebul fityay mi nem igen wit una prɛzɛnt dɛn ɛn laylay gɔd dɛm.

40“Bikɔs na pan mi oli mawnten, pantap di ay mawnten na Izrɛl, na de di wanol Izrɛl, dɛn ɔl, go wɔship mi na di land; na de a go gri fɔ dɛm, ɛn aks fɔ una kɔntribyushɔn dɛm paopa, ɛn di bɛst wan dɛn pan una prɛzɛnt dɛn, ɛn ɔl una oli ɔfrin dɛm.

41A go gri fɔ una lɛk aw a kin gri fɔ fayn sɛnt we de mek a gladi, we a go briŋ una kɔmɔt to di difrɛn difrɛn pipul dɛn, ɛn gɛda una kɔmɔt na di difrɛn difrɛn kɔntri dɛn we una bin skata; ɛn a go sho mi olinɛs klia wan pan una, bifo di difrɛn neshɔn dɛm.

42Ɛn una go no se na mi na PAPA GƆD, we a briŋ una kam na Izrɛl, di land we a bin swɛ a go gi una fɔstɛmpapa dɛm.

43Ɛn na de una go mɛmba una bievyɔ dɛm, ɛn ɔl di tin dɛn we una bin de du, we una bin tek fɔ dɔti unasɛf; ɛn una go et unasɛf fɔ ɔl di bad bad tin dɛn we una dɔn du.

44Ɛn una go no se na mi na PAPA GƆD, we a go dil wit una, nɔto fɔ una bad bad tin dɛn we una de du, ɛn nɔto fɔ una kɔrɔpt bievyɔ o Izrɛl. Na so Papa Gɔd we na Gɔd se.”

45PAPA GƆD in wɔd kan to mi se:

46“Mɔtalman, tɔn yu fes na di sawt, ɛn prich agens di sawt, ɛn prɔfisay agens di fɔrɛst land we de na di sawt;

47tɛl di fɔrɛst we de na di sawt se, Yɛri PAPA GƆD in wɔd: Papa Gɔd we na Gɔd se, luk ya, a go layt faya pan yu, ɛn i go bɔn ɔl yu frɛsh ɛn dray tik dɛn; natin nɔ go ebul ɔt am ɛn ɔl udat de frɔn nɔt to sawt go fil di it.

48Ɔlman na wɔl go si se na mi PAPA GƆD layt di faya; natin nɔ go ɔt am.”

49Nain a se, “E Papa Gɔd we na Gɔd! Dɛn de tɔk bɔt mi se, “nɔto in ebul mekɔp stori dɛn we gɛt minin?”