Ezra 1

Luganda (BIBU1) (BIBULIYA ENTUKUVU)

Jump to: Chapter 2 →

1Mu mwaka ogusooka ogwa Kuuro kabaka wa Buperusi, okutuukiriza ekigambo ky'Omukama kye yali ayogedde ng'ayita mu Yeremiya, Omukama yasindika mu mutima gwa Kuuro kabaka wa Buperusi, n'ayisa ekirangiriro mu bwakabaka bwe bwonna, n'akiteeka mu buwandiike ng'agamba nti:

2“Kino Kuuro kabaka wa Buperusi ky'agamba: ‘Omukama Katonda w'eggulu ampadde obwakabaka bwonna obw'omu nsi; andagidde okumuzimbira ekiggwa mu Yeruzaalemu eky'omu Yuda.

3Buli yenna ow'omu ggwanga lye ali mu mmwe, Omukama Katonda we abeere naye; oyo ayambuke mu Yeruzaalemu mu Yuda, azimbe ekiggwa ky'Omukama Katonda wa Yisirayeli, Katonda ali mu Yeruzaalemu.

4Buli yenna eyasigalawo, eyo yonna gy'ali, ayambibwe abantu b'omu kifo gy'ali, nga bamuwa ffeeza, zaabu, ebintu, amagana ne bye banaaba batonye kyeyagalire olw'Ekiggwa kya Katonda mu Yeruzaalemu.’ ”

5Abakulu b'ennyumba za bajjajjaabwe mu Yuda ne Benyamiini, bakabona n'Abaleevi, na buli yenna Katonda gwe yasindika mu mutima, baasitukiramu ne bayambuka, bazimbe Ekiggwa ky'Omukama mu Yeruzaalemu.

6Ab'oku miriraano gyabwe bonna ne babadduukirira n'ebyokukozesa ebya ffeeza, ebya zaabu, ebintu ebirala, amagana, n'ebirabo ebirala eby'omuwendo nga tobaze bye baatonanga kyeyagalire.

7Ne kabaka Kuuro n'aggyayo ebintu by'omu Kiggwa ky'Omukama Nebukadunezzari bye yali aggye e Yeruzaalemu n'abiteeka mu kiggwa kya lubaale we.

8Kuuro kabaka wa Buperusi yatuma Mituredati omuwanika n'abiggyayo, n'abibalira Sesubazzari omufuzi wa Yuda.

9Guno gwe muwendo gwabyo: ebibya ebya zaabu amakumi asatu; ebibya ebya ffeeza lukumi; obwambe amakumi abiri mu mwenda; ebikompe ebya zaabu amakumi asatu;

10ebikompe ebya ffeeza ebikumi bina mu kkumi, n'ebintu ebirala lukumi.

11Byonna ebintu ebya zaabu n'ebya ffeeza byali enkumi ttaano mu ebikumi bina. Byonna Sesubazzari n'abitwala wamu n'abo abaali bambuka nga bava mu buwaŋŋanguse, bwe baali bava e Babiloni nga baddayo e Yeruzaalemu.

Jump to: Chapter 2 →