Ezra 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Abalabe ba Yuda ne Benyamiini bwe baawulira nti abawaŋŋangusibwa bazimbira Omukama Katonda wa Yisirayeli ekiggwa,

2ne basemberera Zerubabbeli n'abakulu b'ennyumba za bajjajjaabwe, ne babagamba nti: “Tuzimbe wamu nammwe, kubanga naffe tuli nga mmwe, tunoonya Katonda wammwe; tubadde tumutambirira okuva mu budde bwa Esari-Kaddoni kabaka wa Assuri, eyatuleeta wano.”

3Naye Zerubabbeli, Yeswa n'abakulu b'ennyumba za bajjajjaabwe eza Yisirayeli ne babagamba nti: “Si buvunaanyizibwa bwammwe okuzimbira Katonda waffe ekiggwa wamu naffe, wabula ffe ffekka ffe tunaazimbira Omukama Katonda wa Yisirayeli, nga Kuuro kabaka wa Buperusi bwe yatulagira.”

4Ekyaddirira abantu ab'omu nsi ne batandika okuterebula abantu ba Yuda, ne babatawaanya mu kuzimba.

5Baaguliriranga abakiise mu nkiiko babalyolyome, babasobeze mu ntegeka zaabwe ebbanga lyonna nga Kuuro ye kabaka wa Buperusi n'okutuuka ku bufuzi bwa Dariyo kabaka wa Buperusi.

6Mu budde bwa Akasuwero nga yaakasooka okufuga, ne bawandiika nga bavunaana abantu b'omu Yuda ne Yeruzaalemu.

7Mu budde bwa Arutakesasuta, Bisulamu, Mituredati, Tabeeli n'abalala bwe baakolanga baawandiikira Arutakesasuta kabaka wa Buperusi; ebbaluwa yali mu mpandiika ya Kyarami n'olulimi Lwarami.

8Rekumu munnamateeka omukulu ne Simusayi omuwandiisi baawandiika ebbaluwa ewawaabira Yeruzaalemu ewa kabaka Arutakesasuta ng'esoma bw'eti ___

9Abaawandiika: Rekumu munnamateeka omukulu, Simusayi omuwandiisi, ne bannaabwe abalala abalamuzi n'abaami okuva mu Tulipoli, Buperusi, Ereci, Babiloni, Susa, kwe kugamba nti Abeelami,

10n'abalala mu mawanga oweekitiibwa Osunappari omututumufu be yawaŋŋangusa n'abassa mu bibuga bya Samariya ne mu bitundu ebirala Emitala w'Omugga __

11Ebbaluwa gye baamuweereza yali efaanana bw'eti: “Ya kabaka Arutakesasuta, okuva mu baweereza bo abali Emitala w'Omugga:

12tukutegeeza, ssebo Kabaka, nti Abayudaaya abajja eno mu ffe nga bava ewuwo, baatuuka mu Yeruzaalemu, era kati bali ku kuzimba ekibuga kino ekijeemu; bamaliriza bbugwe waakyo, era baddaabiriza n'omusingi.

13Ssebo kabaka, twagala omanye nti singa ekibuga ekyo kizimbibwa, n'ebbugwe waakyo n'amalirizibwa, bajja kulekera awo okuwa omusolo omugereke, n'ogw'ekikungo n'empooza, oluvannyuma kabaka ajja kufiirizibwa.

14Kubanga tulina obuvunaanyizibwa mu lubiri, tetwagala kulaba nga kabaka asoomoozebwa, kyetuvudde tuwandiika ne tubuulira kabaka,

15onoonyereze mu biwandiiko by'ebyafaayo bya bakitaabo. Ojja kuzuula mu biwandiiko ebyo nti ekibuga kino kibuga kijeemu, kiwakula ennyombo ku bakabaka n'ebitundu bye bafuga; obwedda n'obwedda kibuga kikozi kya bujagalalo. Eyo ye nsonga kyekyava kizikirizibwa.

16Tukubuulira, ssebo kabaka, nti ekibuga ekyo bwe kizimbibwa ne bbugwe n'amalirizibwa, tojja kusigaza kantu Emitala w'Omugga.”

17Kabaka n'aweereza okuddamu nti: “Ya Rekumu munnamateeka omukulu, Simusayi omuwandiisi ne bannaabwe abalala abali mu Samariya ne mu kitundu ky'Emitala w'Omugga. Mirembe.

18Ebbaluwa gye mumpandiikidde ngifunye, era ekyusiddwa n'esomebwa mu maaso gange.

19Nayisizza ekirangiriro ne banoonyereza, ne basanga ng'ekibuga ekyo okuva ddi kijeemera bakabaka, kisitukamu obujagalalo n'okutabangula abantu.

20Yeruzaalemu yafugibwako bakabaka ab'amaanyi, abaafuganga ensi eyo yonna eri Emitala w'Omugga, nga basasulwa omusolo omugereke n'ogw'ekikungo n'empooza.

21Muyise mangu ekirangiriro abantu abo bayimirize okuzimba; baleme kwongera kuzimba kibuga ekyo okutuuka nga waliwo ekirangiriro kye mpisizza.

22Mwekkaanye, ensobi eno temugigayaalirira. Lwaki akabi kano kandyeyongedde ne kagootaanya obwakabaka?”

23Ekiwandiiko ky'ebbaluwa ya kabaka Arutakesasuta olwasomerwa Rekumu munnamateeka omukulu, ne Simusayi omuwandiisi ne bannaabwe ne bagenda bunnambiro eri Abayudaaya mu Yeruzaalemu ne babakaka n'amaanyi okuyimiriza okuzimba.

24Bwe gutyo omulimu gw'okuzimba Ekiggwa kya Katonda ne guyimirira; gwayimirira okutuusa mu mwaka ogwokubiri ogw'obwakabaka bwa Dariyo kabaka wa Buperusi.

← Chapter 3 Jump to: Chapter 5 →