Ezra 8

Luganda (BIBU1) (BIBULIYA ENTUKUVU)

← Chapter 7 Jump to: Chapter 9 →

1Bano be bakulu b'ennyumba za bajjajjaabwe n'amazadde gaabwe, abo abaayambuka nange okuva mu Babiloni mu biseera bya kabaka Arutakesasuta:

2Mu batabani ba Finekasi, Gerusomu; mu batabani ba Yitamari, Danyeli; mu bazzukulu ba Dawudi, Kattusi,

3mutabani wa Sekaniya; mu bazzukulu ba Parosi, Zakariya, awamu naye abasajja abaawandiikibwa kikumi mu ataano;

4mu bazzukulu ba Pakati-Mowabu, Eliyowenayi, mutabani wa Zerakiya, wamu naye abasajja ebikumi bibiri;

5mu bazzukulu ba Sekaniya, mutabani wa Yakaziyeli, awamu naye abasajja ebikumi bisatu;

6mu bazzukulu ba Adini, Ebedi mutabani wa Yonatani, awamu naye abasajja amakumi ataano;

7mu bazzukulu ba Elamu, Yesaaya mutabani wa Ataliya, awamu naye abasajja nsanvu;

8mu bazzukulu ba Sefatiya, Zebediya mutabani wa Mikayeli, awamu naye abasajja kinaana;

9mu bazzukulu ba Yowabu, Obadiya mutabani wa Yekiyeli, awamu naye abasajja ebikumi bibiri mu kkumi na munaana;

10mu bazzukulu ba Selomiti mutabani wa Yosifiya, awamu naye abasajja kikumi mu nkaaga;

11Mu bazzukulu ba Bebayi, Zakariya mutabani wa Bebayi, awamu naye abasajja amakumi abiri mu munaana;

12mu bazzukulu ba Azugadi, Yokanani mutabani wa Kakkatani, awamu naye abasajja kikumi mu kkumi;

13mu bazzukulu ba Adonikamu, abajja oluvannyuma, gano ge mannya gaabwe: Elifeleti, Yeweli, ne Semaaya, awamu naye abasajja nkaaga;

14mu bazzukulu ba Biguvayi, Wutayi mutabani wa Zakkuri, awamu naye abasajja nsanvu.

15Nabakuŋŋaanyiza ku mukutu oguyiwa ku Awava, ne tusiisira awo ennaku ssatu. Natunula mu bantu ne mu bakabona naye saasangamu bazzukulu ba Leevi.

16Kwe kutumya Eliyezeri, Ariyeli, Semaaya, Elunatani, Yaribu, Elunatani, Natani, Zakariya, Mesullamu abaali abakulembeze, ne Yowaribu ne Elunatani abasajja abakalabakalaba,

17ne mbasindika ewa Yiddo, omukulu mu kifo ky'e Kasifiya, nga mbagambye bagambe Yiddo ne baganda be, abakola ogw'obuweereza bw'Ekiggwa, abawe batuleetere abanaaweereza mu Kiggwa kya Katonda waffe.

18Kubanga omukono gwa Katonda waffe gwatuliko, ne batuleetera omusajja omugezi ennyo, omu ku bazzukulu ba Makuli mutabani wa Leevi, mutabani wa Yisirayeli; ye Serebiya, wamu ne bazzukulu be ne baganda be, abasajja kkumi na munaana;

19ne Kasabiya awamu naye Yesaaya, omu ku bazzukulu ba Merari, ne bazzukulu be ne baganda be, abasajja amakumi abiri.

20Baleeterako n'abaweereza b'omu Kiggwa, abo Dawudi n'abakungu be be baali batonzeewo okuyamba ku Baleevi; baali ebikumi bibiri mu abiri. Bonna ne bawandiikibwa amannya gaabwe.

21Eyo ku mugga Awava nalangiririrayo ekisiibo, twetoowaze mu maaso ga Katonda waffe, tumusabe atuwe, ffe, abaana baffe n'ebyaffe byonna, olugendo olulungi.

22Zo ensonyi zankwata ne sisaba kabaka bakuumi na beebagazi ku mbalaasi ab'okututaasa abalabe mu kkubo, kubanga twali tugambye kabaka nti: “Omukono gwa Katonda waffe omulungi guli ku bonna abamunoonya abakuume, naye obuyinza n'obusungu bwe bijjira abo bonna abamuvaako.”

23Twasiiba ne twegayirira Katonda waffe ku nsonga eno; Omukama n'awulira okwegayirira kwaffe.

24Mu bakulu ba bakabona ne njawulako kkumi na babiri, wamu ne Serebiya, Kasabiya, n'abalala kkumi okuva mu baganda baabwe,

25ne mbapimira ffeeza, zaabu n'ebintu kabaka, ab'olukiiko lwe, abakungu be, n'Abayisirayeli bonna abaaliwo, bye baali batonedde Ekiggwa kya Katonda waffe.

26Nabapimira mu mikono gyabwe ffeeza wa talenta lukaaga mu ataano, n'ebintu ebya ffeeza ebizitowa talenta kikumi; zaabu wa talenta kikumi,

27ebikompe ebya zaabu makumi abiri nga bivaamu dariki eza zaabu lukumi, n'ebibya eby'ekikomo ebimasamasa obulungi ennyo bibiri, eby'omuwendo nga zaabu.

28Ne mbagamba nti: “Mmwe muwongeddwa Omukama Katonda wa bajjajjaffe, era nga n'ebintu bino bwe biwongeddwa. Ffeeza ne zaabu bitoneddwa kyeyagalire Omukama Katonda wa bajjajjaffe.

29Mubirabirire, mubikuume okutuusa lwe munaabipimira mu bisenge by'Ekiggwa ky'Omukama mu maaso g'abakulu ba bakabona, Abaleevi n'abakulu b'ennyumba za bajjajjaabwe eza Yisirayeli mu Yeruzaalemu.”

30Bakabona n'Abaleevi ne batwala ffeeza ne zaabu n'ebintu ebyali bibapimiddwa, babituuse e Yeruzaalemu mu Kiggwa kya Katonda waffe.

31Ku lunaku olw'ekkumi n'ebbiri olw'omwezi omubereberye, ne tusitula okuva ku mugga Awava, tugende e Yeruzaalemu. Omukono gwa Katonda waffe gwatuliko, gwatuwonya abalabe n'abanyazi mu kkubo.

32Ne tutuuka mu Yeruzaalemu, ne tuwummulako awo ennaku ssatu.

33Ku lunaku olwokuna ffeeza, zaabu n'ebintu ebitukuvu ne tubipima mu Kiggwa kya Katonda waffe; twabikwasa Meremoti mutabani wa Wuriya kabona, yali ne Eleyazari mutabani wa Finekasi; abaali nabo ye Yozabadi mutabani wa Yeswa ne Nowadiya mutabani wa Binnuyi Omuleevi.

34Buli kintu kyabalibwa omuwendo gwakyo n'obuzito bwakyo; obuzito bwonna awamu ne buwandiikibwa ku olwo.

35Abawaŋŋangusibwa, abaali baakadda okuva mu busibe, ne baweereza Katonda wa Yisirayeli ebitambiro ebyokye: ente ennume kkumi na bbiri ku lwa Yisirayeli yenna, endiga ennume kyenda mu mukaaga, obuliga obulume nsanvu mu musanvu, embuzi ennume kkumi na bbiri ez'ekitambiro olw'ekibi. Byonna byaweerezebwa Omukama ng'ekitambiro ekyokye.

36Baatuusa n'ebiragiro bya kabaka eri abakungu be: abafuzi b'amatwale n'abaamasaza abafuga Emitala w'Omugga, bano ne bayamba abantu n'Ekiggwa ky'Omukama.

← Chapter 7 Jump to: Chapter 9 →