1 Chronicles 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Etu ’dasi ’ba Israelini oku yi dria Daudi vu Hebironia, kini, Mi ne, ama fala mini za mi ruaari be indi.

2Andra Sauloni ovuzu opirurisi, eri ndra bani mi’i ’ba Israelini ofupi azini yi ofipiri; Yehova Mungu miniri ’yo ndra mi tia kini, Mi nga nyaka fe ’ba mani Israelini ’diyi dri, mi nga adri ’ba mani Israelini ma drilia opiru mi’i.

3’Dini ’ba ’wara Israelini yi emu dria opi vu Hebironia; Daudi nga aziza azi yi be Hebironia Yehova ma milia ani, yi osu odu Daudi ma dria ovuzu opiru ’ba Israelini ma drilia, ekile e’yo Yehovani ’yole Samueli ma tisirile.

4Te Daudi pi Israeli be dria nga mu Yerusalemua (di Yebusi’i), ’ba Yebusini, angu nde e’ipiru ’diyi de ’dale indi.

5’Ba angu e’ipiru Yebusia ’diyi ’yo Daudi ma ria, Mi ngani fi ’dia ku. Te ti, Daudi pa angu okporu Zioniniri ra, eri aku amboru Daudiniri’i.

6Daudi nga di ’yo, ’ba ngapi ’ba Yebusini ofupi okori nga adri opiru ’ba dri cezuni. Yoabu Zeruya mvi tu oko, ’ba di eri opiru ani.

7Daudi ri angu okporu ndea; omve di eri aku amboru Daudiniri ani.

8Si vini aku kalania dria, engazu Miloa, si ageiniasi kuru kuru; te Yoabu nga di aku nde ma azi acepi ’diyi edeni,

9Daudi fu amboru drile drile, Yehova asikari ongulumurunirini ovule eri berisi.

10’Ba ’diyi ’ba ’wara ’ba okporu Daudini ovuzu yi be ’diyi ma drilia, yi e’da yi okporu eri be opi nyaza erini ma alia eri ’bazu opiru, yi’i ’ba Israelini be dria, e’yo Yehovani ’yole Israeli ma e’yosirile.

11’Ba okporu Daudini ovuzu yi be ’diyi ma kalafe ’di: Yasobeamu ’ba Hakimonini ma mvi, opi ’ba kali na ’diyini; eri enga ndra aju ini a’di ’dizu ’ba turu na ’diyi be, ofu yi dria etu alu.

12Vutinia Eleazari Dodo mvi ’ba Ahohini, eri ’ba alu ’ba okporu na ’diyi ma eseliari.

13Eri ovu ndra Daudi be Pasi-damimua ra, ’ba Filisitiaa ’diyini yi okuria a’di ’diria ’dale. Isu de amvu indi ’daa anyani kazu alenia turi; ’ba nde yi apa ’ba Filisitiaa ’diyi dri apa apa.

14Te yi oso pa amvu nde ’diri ma alia agadua eri arizu, yi ofu ’ba Filisitiaa ’diyi ra, te Yehova opa yi pata amborusi.

15’Ba na ’ba kali na amboru ’diyi ma eselia si Daudi vu kata etia, oni oji Adulamuaria; isu de ’ba Filisitiaa ongulumuru ’diyi aso hema yini e’bu Refaimuaria.

16Daudi ovu yi be pari okporu ma alia nga ’dani, azini asikari ’ba Filisitiaa angu tepi ’diyi de Betelehemua.

17Yi avijo fu Daudini ra, kini, ’Ba ’diyi la! a’di ka mani yi a’di kalitile Betelehemuari ebe fe mani mvuni ya!

18’Ba na ’diyi efu asikari ongulumuru ’ba Filisitiaa ’diyini ma eseliasi, mu yi a’di kalitile Betelehemuari ebe, eji Daudi dri. Te Daudi leni eri mvu ku; osu eri va Yehovani,

19’yo ra kini, Mungu mani ma oga mani e’yo ’diri ’yeko ’dini si. Ma nga ’ba idri yini adipi dra dri ’diyi ma ari mvu ra ya? A’disiku yini idri yini adile dra dri eri ejizurisi. E’yo ’disi leni ndra ani yi nde mvuzu ku. E’yo ’diyi ’ba okporu na ’diyi ’yeni.

20Abisai Yoabu adrini ndra ambo ’ba na ’diyi ma driliani. Eri enga aju ini a’di ’dizu ’ba turu na be yi ofuzu, ru erini e’da ’ba na ’diyini ma eselia ani.

21’Ba na nde ’diyi ma eselia inzi eri aga ’ba iri ’diyi ra, ’ba eri yi ma drilia yi ma dri cezu ani; te eri cani ’ba na oko ’diyi ma paria ku.

22Benaya Yehoyada ’ba asi teza be Kabizeelia ’yeta okporu ’yepiri ma mvi, ofu Arieli Moabuari ma anzi iri ’diyi ra; eri si va indi fu kami alu ’bile ma alia o’du ozooni ’dizu si berisi.

23Fu vini ’ba Misirini alu, ’ba nde ’ba izuni, zozani wuale towi. ’Ba nde Misiria ’di ma dria isu de aju indi ekile bau afa ’bani bongo cazurinirile; te Benaya si vunia kali be, pa aju nde Misiriou ma driarisi ra, so eri ani aju nde eri vileri ma vusi.

24E’yo ’diyi Benaya Yehoyada mvi ’ye yini, runi ku ’ba na okporu nde ’diyi ma eselia ani.

25Mi ne, inzi eri aga ’ba kali na ’diyi ra, te eri cani ’ba na oko ’diyi ma paria ku. Daudi nga eri ’ba asikari i ma ngulupi ma agei tepi ’diyi ma drili

26’Ba okporu asikari ongulumuru ’diyi ma eselia ’diyi yi ’di: Asaheli Yoabu adri pi, Elihanani Dodo Betethlehemuari ma mvi pi,

27Samoti ’ba Harorini pi, Helezi ’ba Pelonini pi,

28Ira Ikesi ’ba Tekoni ma mvi pi, Abiezeri ’ba Anatotini pi,

29Sibekai ’ba Husatini pi, ai ’ba Ahohini pi,

30Maharai ’ba Netofatini pi, Heledi Baana ’ba Netofatini mvi pi,

31Itai Ribai Gibea Benyamini anziyiari mvi pi, Benaya ’ba Piratoni pi,

32Hurai yi nyiri Gaasi ma tiari pi, Abieli ’ba Aribatini pi,

33Azimaveti ’ba Baharumuni pi, Eliaba ’ba Saalibonini pi,

34Hasemuni ’ba Gizonini ma anzipi pi, Yonatani Sage ’ba Hararini mvi pi,

35Ahiamu Sakari ’ba Hararini mvi pi, Elifali Uri mvi pi,

36Heferi ’ba Mekeratini pi, Ahiya ’ba Pelonini pi,

37Heziro ’ba Karimelini pi, Naarai Ezibai mvi pi,

38Yoeli Natani adri pi, Mibihari Hagiri mvi pi,

39Zeleki ’ba Amonini pi, Naharai ’ba Berotini, gombere ombani Yoabu Zeruya mviniri ’dupiri pi,

40Ira ’ba Itirini pi, Garebu ’ba Itirini pi,

41Uria ’ba Hitini pi, Zabadi Alai mvi pie,

42Adina Siza ’ba Rubenini ma mvi, opiru ’ba Rubenini ma eseliari pi, azini ’ba kali na yi eri be,

43Hanani Maaka mvi pi, Yosafati ’ba Mitinini pi,

44Uzia ’ba Asiteratini pi, Sama pi Yeyeli be, yi Hotamu ’ba Aroerini ma anzi,

45Yediaeli Simiri mvi pi, adri Yoha ’ba Tizini pi,

46Elieli ’ba Mahavini pi, Yeribai pi, Yosavia be, yi Elinaamu ma anzi, Itima ’ba Moabuni pi,

47Elieli pi, Obedi pi, Yaasieli ’ba Mezobani pie dria.

← Chapter 10 Jump to: Chapter 12 →