1 Chronicles 26

Lugbara (E’yo Siza Alatararu Munguniri BIBLIA)

← Chapter 25 Jump to: Chapter 27 →

1Amuti ’ba jotile agei tepi ’diyini: ’ba Korani ma eselia, Meselemia Kore mvi, Asafu anzipi ma eseliari’i.

2Meselemia ovu ndra anzi be: mva okori Zekaria’i, iriri Yediyaeli’i, nari Zebadia’i, suri Yatiniei’i,

3towiri Elamu’i, aziari Yehohanani’i, aziriri Eliehoenai’i.

4Azini Obedi-edomu ovu ndra anzi be: mva okori Semaya’i, iriri Yehozabadi’i, nari Yoa’i, suri Sakari’i, towiri Netaneli’i,

5aziari Amieli’i, aziziri Isakari arori Peuletai’i; Munguni asi ndriza fele eri dririsi.

6’Dinile yi osi ndra agianzi Semaya mvi erini dri indi, yi’i ori’ba yi ma atini ma dri cepi ’diyi, yini ovule ’ba okporu asi teza berisi.

7Semaya anzipi: Otini pi, Refaeli pi, Obedi pi, Elizabadi pie, yi ma adripi Elihu pi Semakia be ovu ndra ’ba asi teza be ’diyi.

8’Ba ’diyi ndra dria Obedi-edomu anzipini, yi’i anzi yini pie, adripi yini be, ’ba ecopi ra okpo be azi ndesi diyi; kali azia drini iri Obedi-edomu vile’diyi.

9Meselemia ovu de anzi be adripi erini ’ba asi teza be ’diyi pie, yi mudri drini aro.

10Hosa indi, Merari anzipi ma eseliari ovu agianzi be: ambori Simiri’i (eri ka tro ndra ovu mva okori ku ti, kiri ati ’ba eri ovuzu ’ba amboruni),

11iriri Hilikia’i, nari Tebalia’i, suri Zekaria’i: anzi Hosani pi adripi erini be dria mudri drini na.

12Azi jotile agei tezu amutisiri ovu yini, adani ’ba amboru yi ma eselia nga azi nde amutisini tro tro yi ma adripile, azi ngazu jo Yehovani ma alia;

13yi ’be odrisi ’ba wereri pi amboruri pie tro tro, atapi yini ma ori’ba vusi ori’ba vusi, azi kalitile alu alunisi.

14Azi woko etuni efurialerurini ma odrisi ’de Selemia ma dria. Vutinia yi ’be odrisi mvi erini Zekaria ’ba e’yo amapi egata onyirusiri dri, azi erini isule odrisisiri ovu woko andraleruri.

15Obediedomuniri woko uruleruri’i, anzi erini dri jo afa ta mbazuri.

16Supimu pi dri Hosa be, woko etuni ’derialeruri, kalitile Saleketini vu ogogo, geri tuzaru ’bani e’dulule uru pari tezuri vusi pari tezuri vusiria.

17Etuni efurialeru ’ba Levini azia, kala andraleruria ’ba su o’du alu alu vusi, uruleruria ’ba su o’du alu alu vusi, jo afa ta mbazurisi ’ba iri iri;

18Paribari kala etuni ’derialeru geri ’bani e’dulule ururia ’ba su, azini Paribaria ’ba iri.

19Amuti aziniri ’ba jotile agei tepi ’diyini, yi ndra ’diyi; amuti nde ’diyi ovu Kora anzipi piyini Merari anzipi be.

20’Ba Levini ma eselia, Ahiya ovu ndra pari jo Munguni ma lonyi ta mbazu ’diyi ma driani, pari lonyi afa alatararu fele Mungu dri ’diyi ma ta mbazu ’diyi be.

21Ladani anzipi, Gerisoni anzipi ovupi ndra Ladanini, ’ba atapi yini ma ori’ba ovupi Ladani ’ba Gerisonini vile ’diyi ma dri cepi ’diyi: Yehieli piyi.

22Yehieli anzipi, Zetamu pi adripi Yoeli be, yi ovu pari lonyi jo Yehovaniari ma ta mbazu ’diyi ma dria.

23’Ba Amuramuni piyi ma eselia ’ba Iziharini ’diyi pie, ’ba Hebironini ’diyi pie, ’ba Uzielini ’diyi pie dria-

24Sebueli Musa mvi Gerisomu ma mvi ovu ’ba dri cezu pari lonyi ta mbazu ’diyi ma dria.

25Adripi erini ’diyi: Eliezeri ti mvi erini Rehabia, Rehabia ma mvi Yesaya’i, Yesaya mvi Yoramu’i, Yoramu mvi Zikiri’i, Zikiri mvi Selomoti’i.

26Selomoti ’diri adripi erini be, yi ovu ndra pari lonyi afa alatararu fele Mungu dri ’diyi ma ta mbazu ’diyi ma dria dria, afa ndra opi Daudi pini fele Mungu dri ’ba atapi yini ma ori’ba dri cepi ’diyi pie, ’ba ’ba alifu ma drilia ’diyi pie, ’ba turu drilia ’diyi pie, ’ba asikari ongulumuru ma dri cepi ’diyi pie ’diyi.

27Yi fe afa yini opale ombaa ’diyi ma azini Mungu dri jo Yehovani edezu ani.

28Azini afa dria Samueli ’ba e’yo ndreza ndrepiri pini, Saulo Kisi mvi pie, Abineri Neri mvi pie, Yoabu Zeruya mvi pie, yini ndra fele Mungu dri ’diyi-ka ndra ’ba ngoni ngoni ti ka afa azini fe Mungu dri, afa ’diri ovu ndra Selomoti pi ma dri alia adripi erini be.

29’Ba Iziharini ma eselia, Kenania pi, anzi erini be, yi ndra adri azi amveri nga Israeli ma drilia, ’ba dri cepi ’diyiru, azini e’yo lipi ’diyiru.

30’Ba Hebironini ma eselia, Hasabia pi adripi erini be, yi ’ba asi teza be alifu alu drini turu aziri, yi ovu ’ba Israelini ovupi Yoridani ma tia ’aa’dasi etuni ’derialeru ’diyi ma drilia yi ndrezu, e’yo Yehovaniri ’yezu dria azi opiniri be.

31’Ba Hebironini ma eselia, ’ba amboru Yeriya’i, ’ba nde Hebironini ma drilia a’bianzi yini vusi, atapi yini ma ori’ba vusi indio (Eli kali su Daudini angu nyazu opirurisi ’ba nda ndra yi ra, ’ba isu ’ba okporu asi teza be ’diyi yi ma eselia Yazeri Gileadiaria.)

32Azini adripi erini ’ba asi teza be ’diyi ovu ndra alifu iri drini turu aziri, ’ba atapi yini ma ori’ba dri cepi ’diyi, opi Daudini ’bale ’ba Rubenini piyi ma dri cezu ’ba Gadini pie, suru ali Manaseni be, e’yo dria Munguni ’diyisi azini e’yo opinisi indi.

← Chapter 25 Jump to: Chapter 27 →