1 Chronicles 17

Lugbara (E’yo Siza Alatararu Munguniri BIBLIA)

← Chapter 16 Jump to: Chapter 18 →

1Eri nga eca ’dini, Daudini ovuria i vile joa, ’dini Daudi yo nabi Natani tia, Mi lu ma ovu jo sile mario patisiri ma alia, te sanduku aziza Yehovaniriniri ovu ’bongo ajale ajari ma etia.

2Natani nga di ’yo Daudi ma tia, Mi ’ye e’yo dria ovupi mi asiari’i, Munguni ovule mi berisi.

3Te eri nga i ’ye ini nde ’dasi ’dini, e’yo Munguni nga eca Natani vu kini,

4Mi mu mi ’yo ati’bo mani Daudi ma tia kini, Yehova ’yo ’dini: Mi ngani jo si ma dri mi’i mani ovuzu aleniani ku.

5A’disiku ma ovuni nga jo ma alia ku engazu o’du mani Israelini ofuzurisi cazu kpere andru, te ma aci hema vusi hema vusini ra, azini bere vusi bere vusi indi.

6Pari dria mani acizu alenia ’ba Israelini be driaria, ma ’yo e’yo azini ’ba e’yo lipi ’ba Israelini, mani azile yi ma fe nyaka ’ba mani dri ’diyi ma azi ma tia ra ya? ’yozu kini, Emi sini jo ma dri mario patisi ku a’disi ya?

7Ka’dini mi di nga ’yo ati’bo mani Daudi ma tia ’dini, Yehova asikari ongulumuruni ’yo ’dinile, Ma e’du mi kabilo ma licoarisi mini kabilo oceria, ’dini mi ma ovu opiru ’ba mani Israelirii ma drilia;

8ma ovu ndra mi be pari mini muzuria dria, ma ja ari’ba mini ma dri mi drilia dria; ma nga ru fe mi dri ekile ’ba ambo nyaku dria ’diyi ma rule.

9Ma nga pari pe ’ba mani Israelini ’diyi dri, ma nga yi isi, alenia ’dini yi ma ovu pari yi ma ngulupini ma alia, ma oja yi pari azinia dika ku; ’ba onzi ma anzi ngani vini yi eza okorile dika ku,

10ekile ndra engazu o’du mani ’ba e’yo lipi ’diyi azizu yi ma ovu ’ba mani Israelini ’diyi ma driarisirile; ma nga ari’ba mini nde dria ra. Drinisi ma olu mini kini Yehovani nga mi dri jo si ra.

11Eri nga eca ’dini, o’du mini ka yi de ra mini muzu mi atapi pi vu, ma nga mi ori enga mi vutia anzi mini ma eselia, te ma nga fe opi erini ma so pa kirikiri.

12Eri nga ma dri jo si ra, azini ma nga oguna erini opiniri fe pa sozu ’dani ’dani.

13Ma nga ovu eri ma ata, eri nga ovu ma mvaru; ma ngani yiki mani ’du eri vurisi ’de ku, ekile mani ndra eri ’dule ’ba mi drilia okori vurisirile,

14te ma nga fe eri ma ri ma vile joa azini suru ma vileria ’dani ’dani, azini oguna erini opiniri nga pa so kirikiri ’dani.

15E’yo ’diyi vusi dria azini ndreta ’diri vusi dria indi, Natani ’yo di e’yo Daudi ma tia ’dini.

16Opi Daudi nga di fi ri va Yehova ma milia, ’yo ra kini, Ma a’di’i ya, Yehova Mungu la, jo mani eri a’di afani, mini ani ma ejizu drile ecazu ’dopi ya?

17Te e’yo ’diri ovu te mi milia e’yo wererule, Mungu la; a’disiku mi ’yo te e’yo ati’bo mini ma jodrini ngazu ovuzu ewu izururi ra, azini mi ega e’yo mani trotro inzita ’ba amboru ’diyinile, Yehova Mungu la

18Daudi eco e’yo ngori ’yozu mi tia dika, inzita ovupi ’yezaru ati’bo mini vuri ma e’yosi ya? A’disiku mini ati’bo mini nile ’borisi.

19Yehova la, ati’bo mini ma e’yosi, ekile mi asini lelerile, mi ’ye azi ambo ’diyi, e’yo ambo ’diyi ’bazu nizaru ani.

20Yehova la, ’ba azi mileni yo, kani Mungu andini yo pe lu kiri mi’i, ekile e’yo dria amani erile ama bilesi ’diyile.

21Suru alu nyakua ekile ’ba mini Israelinileri ngo’i, Munguni ndra mule onzele i ma ngulupisi yi ’bazu ovuzu ’ba iniruri, mini mi ru ’bazu amboru ’yeta ambo uriuriru ’diyisi, mini suru drozu ’ba mini mini onzele Misiriasi ’diyi ma drilia ’diyi.

22Mi ’ba ’ba mini Israelini ’diyi ovuzu ’ba mi ngulupini ’diyiru ’dani; azini mi’i Yehova, mi efu Mungu yiniru.

23Yehova la, mi fe e’yo mini ’yole ati’bo mini ma e’yosi azini jodri erini ma e’yosi ’diyi ma so pa kirikiri ’dani, te mi ma ’ye yi ekile mini te ’yole ’borile fo!

24Azini mi fe ru mini ma so pa kirikiri, ovuzu inzizaru ambo ’dani ’dani, kini, Yehova asikari ongulumuruniri eri Mungu Israelini, e, Mungu Israeliniri’i; azini Daudi ati’bo miniri ma jodrini pa so kirikiri mi ma miliani.

25Mungu mani la, mini e’yo ecele ati’bo mini dri ’dini kini mi nga erini jodri idri rarisi; e’yo ’disi eri onyiru ati’bo mini ma asia e’yo zizu mi tia ani.

26Te di curu’do, Yehova la, mi Mungu’i, mi azi afa onyiru ’diri ati’bo mini ma tia ’bo;

27fe te ayiko mi asia indi asi ndriza fezu jodri ati’bo minini dri, eri ma ovu mi drilia ’dani ’dani ani; mi’i Yehova, mini asi ndriza fele drinia rarisi, eri ovu di asi ndriza be ’dani ’dani.

← Chapter 16 Jump to: Chapter 18 →