1 Chronicles 12

Lugbara (E’yo Siza Alatararu Munguniri BIBLIA)

← Chapter 11 Jump to: Chapter 13 →

1’Ba ’diyi’i yi ’ba emupi Daudi vu Zikilagia, erini nga i ziria Saulo Kisi mvi ma e’yosi ’diyi; yi ovu ’ba okporu eri ma aza kopi ombaa ’diyi ma eselia.

2Yi ’ba osu be ’diyi, azini yi eco yi ma dri ayuzaru irile irile, dri ndi dri eji be, oni ’bani ’bele bakasiri yazu, ’ye gbizu osusi indi; yi ’ba Saulo ma adripiru, suru Benyaminini.

3Ambo yini dri1eri Ahiezeri’i, vutinia Yoasi’i, yi anzi Semaa ’ba Gibeatinini; Yezieli pi, Peleti be, yi anzi Azimavetini; Beraka pi, Yehu ’ba Anatotiari be,

4Isimaya ’ba Gibeonini, eri ’ba okporu alu ’ba kali na ma eseliari, eri ’ba kali na nde ’diyi ma driliari’i; Yeremia pi, Yahazieli pi, Yohanani pi, Yozabadi ’ba Gederatini pi,

5Eluzai pi, Yerimoti pi, Bealia pi, Semaria pi, Sefatia ’ba Harufini pi;

6Elikana pi, Isia pi, Azareli pi, Yoezeri pi, Yasobeamu pi, yi ’ba Koranini;

7Yoela pi, Zebadia be, yi anzi Yerohamu ’ba Gedoriarini.

8Azini ’ba Gadini ’diyi ma eselia ’ba azini co yi ma esele muzu Daudi vu pari okporu roko driaria, ’ba okporu asi teza be, ’bani imbale a’di ’diza ma e’yosi ’bo ’diyi, ’ba ecopi gombere ombani ayupi aju be ra, yi ma andretini ovuzu ekile kami ma andretile ’diyi, yi ovu ongu be ekile oborojo oni dria ’diyi1e.

9Ezeri ’ba amboru yi driliari, ’ba iriri Obadia, nari Eliabu,

10suri Misimana, towiri Yeremia,

11aziari Atai, aziriri Elieli,

12arori Yohanani, oromiri Elizabadi,

13mudriri Yeremia, mudri drini aluri Makibanai’i.

14’Ba ’diyi anzi Gadini ma eselia yi asikari ongulumuru ma dri cepi ’diyiru, ’ba werearu si ’ba turule, ’ba amboru turi si ’ba alifu alule.

15’Ba ’diyi ’ba zopi mba okorisi Yoridania ’aa’dasi ’diyi, o’du yi ndeni tizu cirisi, yi fe ’ba ovupi e’bu alia ’diyini apazu dria ra, kala etuni efurialeruri pia etuni ’derialeruri be iri tro.

16Te anzi Benyaminini pi ma eselia Yudani be, ’ba azini emu pari okporua Daudi vu indi.

17Daudi mu dri fuzu yi be amve, omvi e’yo yi tia kini, Emi ka emu asi anzurusi ma vu ma aza kozu, ma asini nga i ekpa eminiri be; te emi ka emu ma o’di nyazu ari’ba mani dri, isu de e’yo inzoruni ma dria yo, Mungu ama a’bipini ma ndre e’yo ’dirini, ma ega e’yo nde ma dria.

18Orindi nga di esi Amasai ma dria ani, eri’i ’ba amboru ’ba kali na ma eseliari, eri ’yo ra kini, Ama mini, Daudi; ama kala miniria, mi Yese mvi’i! Asi anzuru, e, asi anzuru ma ovu mi vu, asi anzuru ma ovu ’ba mi aza kopi ’diyi vu indi! Mungu minirini mi aza kolerisi. Daudi nga di yi a’i ani ra, eri ’ba yi ’ba asikari ongulumuru ma dri cepi ’diyiru.

19’Ba Manaseni azini nga yi onze fizu Daudi vu, erini muria ’ba Filisitini be a’di ’dizu Saulo be; te yi koni yi ma aza ku, a’disiku opi ’ba Filisitiaa ’diyini ama e’yo, dro eri ani ra, kini, Eri nga i oja vile ambo ini Saulo vu, dra ejizu ama dria.

20Erini muria Zikilagia, ’ba Manaseni ’diyi onze yi fizu eri vu: Adina pi, Yozabadi pi, Yediaeli pi, Mikaeli pi, Yozabadi pi, Elihu pi, Ziletai pi, yi ’ba asikari Manaseni alifu alu ma dri cepi ’diyi.

21Yi ko Daudi ma aza asikari acipi afa opapi saaru ’diyi ma e’yosi; yini ovule dria ’ba okporu asi teza benirisi, yini ovule ’ba asikari ongulumuru ma dri cepirirurisi indi.

22O’du vusi o’du vusi ’ba yi emu Daudi vu eri ma aza kozu, kpere yini ecaria asikari ongulumuru, ekile asikari ongulumuru Mungunile.

23’Ba ’ba afa ombani supi ’diyi ma dri cepi omba alia, emupi Daudi vu Hebironia suru Sauloniri ojazu Daudiniru, ekile e’yo Yehovani ’yo1erile ’diyi ma kalafeni ’di.

24Anzi Yudani gombere ombani ’dupi aju be ’diyi alifu azia drini turu aro, yi ’ba yi edepi ombasi ’diyi.

25Anzi Simeonini ma eselia, ’ba okporu asi teza be omba ma e’yosi ’diyi alifu aziri drini turu alu;

26Anzi Levini ma eselia alifu su drini turu azia.

27Yehoyada ovu ’ba ori’ba Aronini ’diyi ma dri cepiri, ’ba eri be alifu na drini turu aziri.

28Zadoki karilau okporu asi teza beri pi ’ba asikari dri cepi ombaa ovupi eri ati ma ori’ba ma eselia ’diyi be kali In drini iri.

29Anzi Benyaminini ma eselia, Saulo ma adripiru ’diyi alifu na; a’disiku ecazu etu ’ disi esele amboru yini turi bi ori’ba Sauloni ma vuti.

30Anzi Efiraimuni ma eselia alifu kali iri drini turu aro, ’ba okporu ’ba asi teza be, ’ba endrezaru ori’ba yi ma atapini ma eselia ’diyi.

31Te suru ali Manaseni ma eselia alifu mudri drini aro, ’bani ecele rusi rusi emuzu Daudini ’bazu opiru ’diyi.

32Anzi Isakarini ma eselia, ’ba o’du onyiru ma e’yo vapi Israeli ma ’ye ngoni yari nipi ra ’diyi, ’ba yi ma dri cepi ’diyi turu iri; azini adripi yini dria eri azita yini.

33’Ba Zebulunini ma eselia, ’ba ecopi mupi asikari ongulumuru ma eselia ombaa ’diyi, omba nde ’bapi azita vusi, ovupi afa ombani ndu ndu be dria ’diyi, alifu kali towi: te yi ’ba ecopi omba ’bapi azita vusi ovupi asi iri be ku diyi.

34’Ba Nafutalini ma eselia ’ba asikari dri cepi ’diyi alifu alu, azini yi be ’ba gombere pi ’dupi aju be ’diyi alifu kali na drini aziri.

35’Ba Danini ma eselia ’ba omba ’bapi azita vusi ’diyi alifu kali iri drini aro drini turu azia.

36’Ba Aserini ecopi mupi asikari ongulumuru ombani ma eselia ra omba ’bapi azita vusi ’diyi alifu kali su.

37Azini kala Yoridanini ’aa’dasiria, ’ba Rubenini piyi ma eselia ’ba Gadini pie, suru ali Manaseni be, ’ba engapi alenia ovupi afa ombani ndu ndu ’bani muzu ombaa ’diyi be ’diyi dria alifu turu alu kali iri.

38’Ba ’diyi dria yi ’ba ombani, ecopi omba ’bapi azita vusi ’diyi, emu asi adarusi Hebironia Daudini ’bazu opiru Israeli dria ma drilia; ’ba Israelini acepi ’diyi dria ovu asi alusi Daudini ’bazu opiru indi.

39Yi ovu ’dale Daudi be o’du na afa nyaza nyaria azini mvuza mvuria, yi ma adripini afa edele yi dri ngonde ’borisi.

40Drinisi ’ba ovupi yi be ogogo cazu kpere Isakari pia, Zebuluni pie, Nafutali pie, eji enya akanya gaaru piyi ma dria, ngamia pie, akanya farasiru ’diyi pie, ranya pie, adani eji anyafura pi, elio efi ombale ngulu ngulu ’diyi pie, zabibu ’wiza pie, patiefi su pie, odu pie, ranya pie, kabilo be karakarau; ayikoni ovule Israeli ma aliarisi.

← Chapter 11 Jump to: Chapter 13 →