1 Chronicles 19

Lugbara (E’yo Siza Alatararu Munguniri BIBLIA)

← Chapter 18 Jump to: Chapter 20 →

1Eri nga di cea ’dini, ’di ma vutia, Nahasi opi amboru anzi Amonini ma driliari nga dra ra, eri ma mvi nya angu eri ma pariani.

2Daudi nga di ’yo kini, Ma nga asi ndriza ece Hanuni Nahasi mvi dri, a’disiku eri ma atini ndra asi ndriza ecele ma dririsi. ’Dinile Daudi pe ’ba ti eri ma asi omizu ati ma e’yosi. Ati’ba Daudini fi di Amoni anziyi ma angua Hanni vu, eri ma asi omizu ani.

3Te ba ’wara Amoni anziyini ’diyi ’yo Hanuni ma tia kini, Mi ega Daudi inzi mi atini ra, epe ani ’ba ti emuzu mi asi omizu ’di ya? Ati’ba ’diyi emuni angu ondrezu, ezazu, angu ma orile gazu ku ya?

4Ka’dini Hanuni obi di ati’ba Daudini ’diyi ci, ofa yi ma dri’bi dria, oli yi ma bongo ti mburua mburua kpere oro tia oro tia, pe yi ma ti mvizu.

5Te ’ba azini nga mu e’yo ’yele ’ba nde ma ruaari olu Daudi ma tia. Eri nga ’ba ti pe muzu dri fuzu yi be ani; ’ba ’diyini ovule drinza be turisi. Te opi ’yo yi ma tia, Emi te Yerikoa kpere emi ti’bini duria, emi emvi ndo.

6Ka’dini Amoni anziyi ka ndre kini yi fe anguonzi yi ruaa Daudi be ’bo, Hanuni pi Amoni anziyi be yi pe onzi dahaburu alifu alu ma ti gari ombani omvezu ’ba nzupi akanyasi ’diyi be Mesopotamiaa, Aramumaakaa, azini Zobaa.

7’Dinile yi omve yini gari ombani alifu kali na drini iri, opi amboru Maakaari pi ’ba erini ’diyi be; ’ba ’diyi emu ri Medeba ma drilia. Amoni anziyi oku yi indi aku ambo ambo yini vusi emuzu ombaa.

8Daudi ka e’yoni eri ra, eri pe Yoabu ma ti ’ba okporu ongulumuru ’diyi be dria.

9Amoni anziyi efu ra, ti yi ombani aku amboru ma kalitilea; opi emupi ’diyi yi de yini nyamua amve a’dule.

10Te Yoabu ka ndre ’ba ’diyi ace i ombasi i driliasi azini i ma vutiasi, eri ope ’ba endreza dria Israelini ’diyi, oti yi omba gbizu ’ba Suriaa ’diyi be.

11Eri ku ’ba joloko acepi ’diyi Abisai i adri dri, oti yi omba gbizu Amoni anziyi be.

12Eri ’yo ra kini, ’Ba Suriaa ’diyi ka ovu okporu, ka ma aga ra, mi di nga ma aza ko ndo; te Amoni anziyi ka ovu okporu, ka mi aga ra, ma vini nga mi aza ko ra.

13Emi ma ovu asi tezasi onyiru, ama ma ’ye amani asi agupinisi ’ba amani dri azini aku ambo ambo Mungu amanirini dri indi; Yehova ma ’ye e’yo ovupi onyiru eri miliari’i.

14Ka’dini Yoabu pi ’ba ovupi eri be ’diyi be, yi esi ogogo ’ba Suriaa ’diyi ma drilia omba ’bazu; te ’ba nde apa eri ma driliarisi ra.

15Amoni anziyi ka vini ndre kini ’ba Suriaa ’diyi apa ’bo, ’dinile indi yi apa Abisai eri adri ma driliarisi ra, yi mu fi aku amborua. Yoabu nga di emu Yerusalemua ndo.

16’Ba Suriaa ’diyi ka ndre yi ovu ndezaru ’ba Israelini ma driliarisi ra, yi pe ’ba ti muzu ’ba Suriani ovupi Yi ara ma tia ’aa’dasi ’diyi omvezu; Sofaki ’ba asikari ongulumuru Hadarezerini ’diyi ma dri cepiri ovu yi ma drilia.

17’Ba olu e’yo ’diri Daudi ma tia; eri oku ’ba Israelini dria tualu, eri zo yi be Yoridanini, ’de yi ma dria, ti yi omba gbizu yi be. Daudi ka ’ba ti omba gbizu ’ba Suriaa ’diyi ’be ’dini ’bo, yi gbi di omba eri be.

18’Ba Suriaa ’diyi apa ’ba Israelini ma driliarisi ra; azini Daudi ofu ’ba Suriani nzupi gari ombani alifu azirisi ’diyi, azini ’ba acipi pasi ’diyi alifu kali su, fu vini Sofaki ’ba asikari ongulumuru dri cepiri indi.

19Ati’ba Hadarezerini ka ndre kini yi ovu ndezaru ’ba Israelini ma drilia ’bo, yi a’i asi anzuru Daudi vu, azi ngazu eri dri. ’Ba Suriaa ’eliyi asini eli Amoni anziyi ma aza ko dika ku.

← Chapter 18 Jump to: Chapter 20 →