1 Chronicles 20

Lugbara (E’yo Siza Alatararu Munguniri BIBLIA)

← Chapter 19 Jump to: Chapter 21 →

1Eri nga eca ’dini, eli o’diru ka eca ra, ewu opi amboru yini adrizu muzu ombaarisi, Yoabu nga ’ba okporu asikari ongulumuru ma eselia ma dri ce amve, angu Amoni anziyini ezazu, yi emu aku Rabani acezu indio Te Daudi ovu de ini Yerusalemua. Yoabu ja Raba ma dri ra, ogu eri va indi.

2Daudi pa oku opi yi vilerini eri ma driarisi ra, o’bi eri ma nziza, isu eri nzi onzi meleru aluri pi, oni aje nyapi tu ’diyi ovu ruania indi; yi su ani eri Daudi ma dria. Eri ofu afa yini opale ’diyi kakau tu engazu aku amboru nde ma alia.

3Eri ofu ’ba ndra ovupi alenia ’diyi, eri asi yi soosi azini aya si be nzangarurisi, oga yi ogarasi indi; Daudi ’ye aku ambo ambo Amoni anziyini ’diyi dria ’dinile. Daudi pi ’ba erini be dria atri di dri mvizu Yerusalemua ndo.

4Eri nga eca e’yo ’diri ma vutia ’dini, omba enga Gezeria ’ba Filisitiaa ’diyi be; o’du ’dasi Sibekai ’ba Husatini fu Sipai anzi ’ba izururini ma azi; aga di yi ani ra.

5Omba azini enga vini dika ’ba Filisitiaa ’diyi be; azini Elihanani Yairi mvi fu Lami Goliatu Gitiari ma adrini, ’ba nde ma aju pati ovu ekile pati alale bongo cazurile.

6Omba azini enga ndra dika Gatu pari ’ba izururini ovuzuria, drianzi erini paanzi pie dria kali iri drini su, drianzini azia, azia, azini paanzini azia, azia; ’ba izururi ti ndra erini.

7Eri ka ndra ’ba Israelini o’da ra, Yonatani Simea Daudi ma adripi ma mvi fu eri ra.

8’Ba ’diyi ’ba izururini otile Gatua ’diyi; yi o’de Daudi ma drisi azini ati’ba erini ’diyi ma drisi indi.

← Chapter 19 Jump to: Chapter 21 →