1 Chronicles 15

Lugbara (E’yo Siza Alatararu Munguniri BIBLIA)

← Chapter 14 Jump to: Chapter 16 →

1Daudi si jo ndu ndu i dri aku amboru Daudini ma alia; ede vini pari sanduku Munguni dri, aso hema eri dri indi.

2Daudi ’yo di ani kini, ’Ba aluni ma ’du sanduku nde Munguniri ku te kiri ’ba Levini a’dule, Yehovani yi opele sanduku ini o’duzu azini azi ngazu i dri ’dani ’danirisi.

3Daudi oku ’ba Israelini dria Yerusalemua sanduku Yehovani ejizu i pari erini edele eri driria.

4Te Daudi nga Aroni anzipi piyi oku ’ba Levini be dria tualu:

5engazu anzi Kohatini ma eseiia, Urieli ’ba yi dri cepiri pi adripi erini ’diyi be turu alu drini kali iri;

6engazu anzi Merarini ma eselia, Asaya ’ba yi dri cepiri pi adripi erini diyi be turu iri drini kali iri;

7engazu anzi Gerisomuni ma eselia, Yoeli ’ba yi dri cepiri pi adripi erini ’diyi be turu alu drini kali na;

8engazu anzi Elizafanini ma eselia, Semaya ’ba yi dri cepiri pi adripi erini ’diyi be turu iri;

9engazu anzi Hebironini ma eselia, Elieli ’ba yi dri cepiri pi adripi erini ’diyi be kali aro;

10engazu anzi Uzielini ma eselia, Aminadabu ’ba yi dri cepiri pi adripi erini ’diyi be turu alu drini mudri drini iri.

11Daudi omve atalau edeta edepi ’diyi Zadoki pi Abiatari be, azini ’ba Levini Urieli pi, Asaya pie, Yoeli pie, Semaya pie, Elieli pie, Aminadabu pie dria,

12’yo yi ma tia, Emi ’ba ’wara ori’ba ’ba Levini ma a’bipini ma drilia ’diyi; emi ’ba emi alatararu emi adripi be, emi ma eji ani sanduku Yehova Mungu Israelinirini pari mani edele eri driri ma alia beni.

13Emini ndra eri ejile okorisi kurisi, Yehova Mungu amaniri anyo ani ama rugbu ’di, amani eri ndale azita vusi kurisi.

14Ka’dini atalau edeta edepi ’diyi ’ba Levini pie ede yi alatararu sanduku Yehovani ejizu, eri’i Mungu Israeliniri’i.

15Anzi Levini nga di sanduku Munguni ’du yi ma gbudria pati erini ’diyisi, ekile Musani azile e’yo Yehovani ’yo1eri vusirile.

16Daudi nga ’yo ’ba ’wara ’ba Levini ma dri cepi ’diyi ma tia adripi yini ongo ngopi ’diyi azizu afa yini ongo ngozu ’diyi be, afa zaburi ngozuri pi, o’di pie, aya cole cori pie, yi ma otre o’dukosi uru azini yi ma enga o’duko yini uru ayikosi ani.

17E’yo ’disi ’ba Levini yi pe Hemani Yoeli mvi pi; azini adripi erini ma eselia Asafu Berekia mvi pie; azini adripi yini ma eselia anzi Merarini Etani Kusaya mvi pie;

18te ’ba ’diyi be tualu yi pe adripi yini tindi iriri Zekaria pi, Beni pie, Yaazieli pie, Semiramoti pie, Yehieli pie, Uri pie, Eliabu pie, Benaya pie, Maaseya pie, Matitia pie, Elifelehu pie, Mikineya pie dria, azini Obedi-edomu pi Yeyeli be, ’ba jotile agei tepi ’diyi.

19Ka’dini yi pe di ’ba ongo ngopi ’diyi Hemani pi Asafu pie, Etani be, aya molaru cozu o’duko urusi;

20azini yi pe Zekaria pi, Azieli pie, Semiramoti pie, Yehieli pie, Uri pie, Eliabu pie, Maaseya pie, Benaya pie, ongo ngozu afa zaburi ngozu o’duko Alamotini vusirisi;

21yi ’ba Matitia pi, Elifelehu pie, Mikineya pie, Obediedomu pie, Yeyeli pie, Azazia pie, ’ba dri cezu o’di o’duko Seminitini vusirisi.

22Kenania ’ba ambo ’ba Levini so pa ongo ma driliani; eri ’ba imba ongosini, erini ovule onduarurisi.

23Berekia pi Elikana be, azi yini lotile ma agei tezu sanduku ma e’yosi.

24Sebania pi, Yosafati pie, Netaneli pie, Amasai pie, Zekaria pie, Benaya pie, Eliezeri pie, yi atalau edeta edepi ’diyi, yi guka vu sanduku Munguni ma driliani. Obedi-edomu pi Yehia be yi jotile ma agei te sanduku ma e’yosini.

25Ka’dini Daudi pi ’ba ’wara ’ba Israelini pie, ’ba asikari alifu dri cepi ’diyi be, mu di sanduku aziza Yehovanirini eji engazu Obedi, edomu vile joa ayiko be.

26Te eri nga eca ’dini, Mungu ka ’ba Levini sanduku aziza Yehovanirini ejipi ’diyi ma aza ko ra, yi oso monio aziri kabiloago aziri be edetaru Yehova dri.

27Daudi su bongo ndrizaru mile be nyiriri, ’ba Levini sanduku ejipi ’diyi pie dria, ’ba ongo ngopi ’diyi pie, Kenania ’ba ongo imbapiri pie, ’ba ongo ngopi ’diyi be; Daudi su de koti alinaru edele bongo mile be nyiririsiri i ma ruaa ci.

28’Dinile ’ba Israelini dria eji di sanduku aziza Yehovanirini oyuta pisi, o’duko ejelekoni pie, guka amboru ’diyi pie, aya cole cori pie, otrezu o’duko urusi, afa zaburi ngozuri cozu okposi o’di pie dria.

29Eri nga eca ’dini, o’du sanduku aziza Yehovanirini ecazu aku amboru Daudiniarisi, Mikali Saulo zi endre angu derisasi, ndre opi Daudini ongo turia azini aviria; onzo eri i asia ra.

← Chapter 14 Jump to: Chapter 16 →