2 Samuel 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1’Di ma vutia eri eca ’dini, Amoni anzi ma opi dra ra, te mvi erini Hanuni nya opi eri ma pariani.

2Te Daudi ’yo, Ma nga ’ye onyiru Hanuni Nahasi mvi vu, ekile atini ’yele onyiru ma vurile. ’Dini Daudi pe ati’ba erini ma ti, asi erini omizu ati ma e’yosi. Te ati’ba Daudini eca angu Amoni anzinia.

3Te opi anzi Amoni anzini ’yo opi yini Hanuni ma tia kini, Mi ega Daudi le mi atini inzi ra ya, erini ’ba asi mini omipi ’diyi ti pezu mi vurisi? Eri peni ati’ba erini ma ti aku ’eli ma orile gazu, eri agazu beni ku ya?

4’Dini Hanuni o’du ati’ba Daudini, fa yi ma tibi ega alua ega alua, li yi ma bongo agadua oro vusi kpi, fe yi dri geri ra.

5Yi ka e’yo nderi olu Daudi tia, eri pe ’ba ti muzu dri fuzu yi be, toko ku ’ba ’diyi ovu drinza be tu. Te opi ’yo, Emi te Yerikoa, cazu tibi eminini duzuria, emi nga emvi ndo.

6Amoni anzi ka ne e’yo yini eca onzi Daudi ma milia ’bo, Amoni anzi ’nga ’ba ti pe silingi be ’ba Suriaa Beti-rehobua ’diyi pi ofezu ’ba Suriaa Zobaa ’diyi be, yi alifu kali iri acipi pasi ’diyi, opi Makaari pi ’ba alifu alu ’diyi pie, ’ba Tobua alifu mudri drini iri ’diyi pie.

7Daudi ka e’yo nderi eri ra, eri pe Yoabu pi ma ti asikari okporu ongulumuru ’diyi be.

8Amoni anzi nga efu, otu yi a’di ’dizu pari ’bani fizu kalitiliaria; te ’ba Suriaa Zobaa ’diyi pi Rehobua ’diyi be, ’ba Tobua ’diyi pi ’ba Makaa ’diyi be, yi ovo nyamukoa yi’i a’dule.

9Te Yoabu ka ne a’di ovu otuzaru eri drilia azini eri ma ngukua, eri ope ’ba dria opele Israeli ma, eselia ’diyi ma azi, oti yi a’di ’dizu ’ba Suriaa ’diyi be;

10eri ’ba adri Abisaini ’ba acepi ’diyi ma drilia, oti yi a’di ’dizu Amoni anzi be.

11Te eri ’yo kini, ’Ba Suriaa ’diyi ka ’ba ma aga ra, ka’dini mi nga ma aza ko; te Amoni anzi ka ’ba mi aga aga, ma nga mu mi aza ko.

12Emi ru ku, emi ovu asi agupinisi, ’ba amani ’diyi pi ma e’yosi aku Mungu amanirini ’diyi be; te Yehova ma ’ye e’yo ovupi onyiru eri ma miliari.

13’Dini Yoabu pi ’ba ovupi eri be ’diyi be nga mu ogogo a’di ’dizu ’ba Suriaa ’diyi be; te yi nga apa eri ma drilia.

14Te Amoni anzi ka ne ’ba Suriaa ’diyi apa ’bo, yi nga vini apa Abisai drilia indi, yi fi aku alia. Te Yoabu nga Amoni anzi ku ra, nga mvi Yerusalemua.

15Te ’ba Suriaa ’diyi ka ne ’ba Israelini aga yi ’bo, yi oku yi tualu.

16Te Hadadezeri pe ’ba ti, ’ba Suriaa ovupi Yi Ufirate tia ’aa’dasi ’diyi omvezu; yi eca Helamua, Sobaki ambo asikari ongulumuru Hadadezerini ’diyi ma driliari aci yi drilia.

17Yi ka e’yo nderi olu Daudi tia ’bo, eri oku Israeli dria tualu, yi zo Yoridanini ca Helamua. ’Ba Suriaa ’diyi otu yi Daudi dri aruzu, ’di a’di eri be.

18Te ’ba Suriaa ’diyi nga apa Israeli ma drilia; te Daudi ofu ’ba Suriaa gari dria ’diyi turu aziri, azini akanya dria ’diyi alifu kali su, te eri fu Sobaki ambo asikari ongulumuru yini driliari, ’dini eri dra ’dale.

19Te opi dria emupi azi ngapi Hadadezeri dri ’diyi ka ne Israeli aga yi ’bo, yi ’ye aziza asi anzuruni tualu Israeli be, yi eca ati’ba yiniru. ’Dini ’ba Suriaa ’diyi ru di ci, koni Amoni anzi ma aza dika ku.

← Chapter 9 Jump to: Chapter 11 →