2 Samuel 19

Lugbara (E’yo Siza Alatararu Munguniri BIBLIA)

← Chapter 18 Jump to: Chapter 20 →

1Yi olu Yoabu tia kini, Mi ne, Opi ovu awu wuna, ovuzu candisi Abisalomu ma e’yosi.

2Etu ndesi e’yo agaza oja i candiru ’ba dria dri; a’disiku etu ndesi ’ba eri kini, Opi ovu candisi mvi erini ma e’yosi.

3Etu ndesi ’ba yi fi akua ekile oguoule, ekile ’ba drinza be ’bani yi agale a’disi ’diyini adrile file oguoulerile.

4Te opi a’bu mile ini ci, oyu o’duko urusi kini, Ma mvi Abisalomu la, Abisalomu la, ma mvi, ma mvi!

5Te Yoabu nga fi opi vile Ijoa, nga ’yo kini, Andru mi fe drinza ati’ba mini dria ma milia ’bo, yi’i etu ’dorisi idri mini papi, agupianzi mini ma idri pie, ezoanzi mini ma idri pie, oku mini ’diyi ma idri pie, oku mini ati’baru ma idri pie ’diyi,

6a’disiku mi le ’ba mi ngupi onzi ’diyi te mi ngu ’ba mi lepi ’diyi onzi. Te mi ece kilili andru ’dini, opianzi ovu toko mi ma milia ati’ba pie; te andru ma va ra Abisalomu ka ovu idriru te ama dria ka odra andru ’bo, te’do e’yo nde nga ovu mi milia onyiru.

7E’yo ’disi curu’do mi nga, mi fu, mi ’yo e’yo asi omizaniri ati’ba mini ’diyi ma tia; a’disiku ma ’yo adaru Yehova rusi, mi ka fu ku, ’ba aluni ngani ace mi be ini ’dorisi ku; e’yo ’diri nga ovu onzi mi vu aga onzi mi ’yepi engazu ewu mini ovuzu karilaururia ecazu kpere andru ’diyi dria ra.

8’Di ma vutia, opi nga nga, nga ri kalitilia. Yi nga ’yo ’ba dria tia kini, Emi ne, opi ri kalitilia; te ’ba dria nga emu opi drilia, Te isu Israeli dria alu alu apa, hema yinia ’bo.

9Te ’ba dria suru sraelini ma eselia ’diyi yi ga agata ’yozu, Opi nde pa ndra ama ari’ba amani ma driasi ra, eri pa vini ama ’ba Filisitiaa ’diyi ma driasi ra; te curu’do isu eri apa angu ’diria ra Abisalomu ma e’yosi.

10Te Abisalomu, amani odu osule drinia ovuzu ama driliari, dra a’di alia ’bo E’yo ’disi emi ’yoni e’yo opini omvizu dikari ku a’disi ya?

11Te opi Daudi nga ’ba ti pe kuhani Zadoki pi vu Abiatari be, ’yozu, Emi ’yo ’ba ’wara Yudani ’diyi ma tia kini, Emi ovu vileru ’ba opini omvipi erinia ’diyi ma vutia a’di e’yosi ya, a’disiku e’yo Israeli dria ’diyini ’yole opini omvizu jo eriniari ku opi vu ’bo?

12Te emi adripi mani, emi fala mani, za ma ruaari be; ka’dini emi ovu vile e’yo opini omvizurisi a’di e’yosi ya?

13Emi ’yo Amasa tia kini, Mi ovuni fala mani, za ma ruaari be ku ya? Mungu ma ’ye ma vu ’dini, azini agapi rari indi, mi ka nga ovu ambo asikari drilia Yoabu ma paria ma milia ’daniri ku.

14Te eri ese ’ba Yudani ’diyi ma asi dria ekile ’ba alu ma asile; ’dini yi pe ’ba ti opi vu ’yozu, Mi emvi, ati’ba mini be dria.

15’Dini opi emvi ra, eca Yoridania; te Yuda eca Giligalia muzu dri fuzu opi be, opini ozozu Yoridaniasi.

16Te Simei, Gera mvi, suru Benyaminini ovupi Bahurimuari, ’ye mbele sizu va ’ba Yudani ’diyi be muzu dri fuzu opi Daudi be.

17Te ’ba Benyaminini alifu alu ovu eri be, azini Ziba, ati’bo azi ngapi ori’ba Sauloni driri, agupianzi erini mudri drini towi ’diyi pie, ati’ba erini kali iri eri be tualu ’diyi pie; yi zo Yoridani opi drilia oko.

18Te oguru ezo ’ba opi vile joa ’diyi ’duzu jizu ’aa’dasi, e’yo ovupi onyiru eri ma miliari ’yezu. Te Simei Gera mvi eco i va opi drilia, erini ’yeria Yoridanini zozuria.

19Eri ’yo opi tia kini, Opi ma fe e’yo ma ovu ma dria ku, indi vini opi ma ega e’yo ati’bo minirini ’yele aka o’du opi mani amborurini fuzu Yerusalemua ’darisiri dika ku; opi ma ega e’yo nderi i ma asia ku,

20A’disiku ati’bo miniri ni i ’ye onzi ’bo; e’yo ’disi, mi ne, ma eca di muzu sizu va dri fuzu opi mani amboruri be etu; ’dorisi ori’ba Yusufuni ’diyi dria ma drilia oko.

21Te Abisai Zeruiya mvi omvi e’yo kini, Te e’yo nderisi Simei ngani dra erini ndra ’ba Yehovani odu osule driniari o’dalerisi ku ya?

22Te Daudi ’yo, E’yo mani emi vu ngoni ya, emi anzi Zeruiyani, emini ovuzu ari’ba maniru andru? Yi nga ’ba azi fu andru Israeli ma eselia ra ya? Ma nini ku ya ma ovu andru opiru Israeli ma drilia?

23Te opi ’yo Simei tia, Mi ngani dra ku. Opi so oyo eri dri.

24Te Mefiboseti Saulo mvi esi va dri fuzu opi be; edeni i pa ku, of ani tibi ti ku, ojini vini bongo ini ku, engazu o’du opini dri kozurisi ecazu o’du erini emvizu asi ’yaasiria.

25Eri eca ’dini, eri ka eca Yerusalemua dri fuzu opi be, opi ’yo eri tia, Mifunindra tualu ma be kua’die’yosi ya, Mefiboseti?

26Eri omvi e’yo kini, Opi mani amboruri la, ati’bo mani ici ndra mani; a’disiku ati’bo mini ’yo ndra tinia, Mi ede enyi ma dri akanya dria, ma ma aci drinia ani muzu opi be. A’disiku ati’bo mini ma pa ovu acozaru.

27Eri su asu opi tia ati’bo mini ma ruaa. Te opi mani amboruri ovu ekile malaika ’Mungunile; ’dini mi ma ’ye e’yo ovupi onyiru mi ma miliarile,

28Te ori’ba ma atini dria ovu ndra ’ba drazale opi mani ma drilia; te ti, mi ’ba ati’bo mini ’ba nyaka nyapi mesa mi ngulupini ma tia ’diyi ma eselia. ’Dini e’yo azini mani wuzu opi vu dikari a’di e’yoni ya?

29Te opi ’yo eri tia, Mi e’yo mini ’yo dika a’di e’yosi ya? Ma ’yo kini, Emi Ziba be, emi ma awa angu.

30Te Mefiboseti ’yo opi tia kini, Ka’dini eri ma ’du dria, a’disiku opi mani amborurini emvi asi ’yaasi jo i ngulupi vileria ’borisi.

31Te Barizilai ’ba Gileadiari enga Rogelimua esizu va; eri mu opi be Yoridania, eri ozozu Yoridaniasi.

32Barizilai ovu mbazauni, eli be kali aro; eri fe nyaka opi dri ewu erini ovuzu Mahanaimuarisi; a’disiku eri ovu ’ba amboni afa be.

33Te opi ’yo Barizilai ma tia, Mi zo ma be, te ma nga mi ta mba ma vu Yerusalemua.

34Te Barizilai ’yo opi tia kini, Idri mani ma ewu ace eli si ya, ’dini mani muzu uru opi be Yerusalemua?

35Eli mani eca andru kali aro; ma eco onyi pi nizaru onzi be ra ya? Ati’bo mini eco nyaka mani nyaleri ma aji, kani afa mani mvuleri ma aji o’bizaru ra ya? Ma eco o’duko agupini ongo ngozuri azini okuni ongo ngozuri erizaru dika ra ya? Ka’dini ati’bo mini nga opi mani amboruri fe ande a’di e’yosi ya?

36Ati’bo mini le kiri Yoridanini zozu opi be. Opi ma ofe ma oya kalafe ’dipirisi a’di e’yosi ya?

37Ma matu ’ba mi vu, mi fe ati’bo, minini mvizu, ’dini ma ma dra aku ma ngulupini ma alia beni, nyadrini ma ati pini ma ageia ma andrini be. Te mi ne, ati’bo mini Kimihamuni ’do; mi fe eri ma zo opi mani amboruri be; mi ’ye eri vu ekile ovupi onyiru mi ma miliarile.

38Opi omvi e’yo kini, Kimihamuni nga zo ma be, te ma nga ’ye eri vu ekile ovupi onyiru mi ma miliarile; te e’yo ngoni ngori mini lele ma vuri, ma nga e’yo nde ’ye mi dri ra.

39Te ’ba dria nga Yoridanini zo ra, opi zo indi; te opi zi Barizilaini o’bolo ndruzasi, fe eri dri asi ndriza, eri mvi i vile angua.

40Opi nga zo cazu Giligalia, te Kimihamu zo mu leri be; te ’ba dria Yudani ’diyi azini ’ba Israelini ma esele azini ji opini ’aa’dasi.

41Te mi ne, agupi Israelini ’diyi dria eca opi vu, yi ’yo opi tia kini, Adripi amani ’ba Yudani ’diyi e’du mi ogusi, e’du opini ’ba dria opi vile joa ’diyi, be jizu Yoridania ’aa’dasi, ’ba dria Daudini ’diyi be a’di e’yosi ya?

42Te ’ba dria Yudani ’diyi yi omvi e’yo ’ba Israelini ’diyi ma tia kini, A’disiku opi ovu ama adri’i. ’Dini emi ovu aokosi e’yo ’disi a’di e’yosi ya? Ama nya afa opini jeleri ma alu ra ya? Eri fe ama dri feta ra ya?

43Te ’ba Israelini yi omvi e’yo ’ba Yudani ’diyi ma tia kini, Esele mudri opini eri amani, indi vini ama ovu e’yo be Daudi vu aga emi ra. Ka’dini emi ama onzo a’di e’yosi ya? Ama ’yoni e’yo opini emvizuri oko ku ya? Te e’yo ’ba Yudani ’diyini ’yole ’diyi ovu okporu aga e’yo ’ba Israelini ’diyini ’yole ’diyi ra.

← Chapter 18 Jump to: Chapter 20 →