2 Samuel 16

Lugbara (E’yo Siza Alatararu Munguniri BIBLIA)

← Chapter 15 Jump to: Chapter 17 →

1Te Daudi ka oni dri mbiliri aga were, Ziba ati’bo Mefibosetiniri fu dri eri be akanya iri afa ejipi ’diyi be. Yi eji enya ovale ambo ’diyi turu iri, patiefi ’wiza nguluru turu alu pie, patiefi kapi elisi turu alu pie, enyi juruaru alu patiefi ma su ’be aleniari pie.

2Opi nga ’yo Ziba tia, Mi le afa ’diyisi a’du ’ye ya? Ziba omvi e’yo kini, Akanya ’diyi ovu ’ba ovupi opi vile joa ’diyi dri acizu drinia, enya pi patiefi kapi elisi ’diyi be, yi ovu karile dri nyazaru, patiefi ma su ovu ’ba andepi roko dria ’diyi dri mvuzaru.

3Opi nga ’yo, Opi miniri ma mvini ngoa ya? Ziba nga ’yo opi tia kini, Mi ne, eri ovu Yerusalemua; te eri ’yo, Andru suru Israelini nga opi nyaza ma atini omvi ma dri.

4Opi nga di ’yo Ziba tia kini, Mi ne, afa dria ovupi Mefibosetini ’diyi yi mini. Ziba nga ’yo ra, kini, Ma inzita fe; mi fe ma ma isu asi ndriza mi ma milia fo, opi mani amboruri la.

5Te opi Daudi ka eca Bahurimua ’bo, agu alu suru Sauloni aliari, runi Simei, Gera mvi’i, eri efu a’da o’dazu erini emuria.

6Eri o’be Daudi pi onisi, ati’ba opi Daudini ’diyi be dria; te ’ba dria, ’ba okporu ’diyi be dria, yi ovu eri ma dri ndia azini eri ma dri ejia.

7Simei ’yo ’dini erini a’data o’daria, kini, Mi mu, mi mu, mi ’ba ari adapiri, mi ’ba tokoari!

8Yehova omvi ari dria suru Saulo mini opi nyazu eri ma pariariniri mi dria ’bo; te Yehova fe opi nyaza mi mvi Abisalomu dri. Mi ne, lokiri mini isu mi ngulupi ’bo; mini ovule ’ba arinirisi.

9’Di ma vutia Abisai Zeruiya mvi nga ’yo opi tia kini, Oce avu ’dori opi mani amboruri o’da ’doni a’disi ya? Ma matu ’ba mi vu, mi fe ma ma mu drini li va.

10Te opi nga ’yo, Emi Zeruiya anzipi, e’yo mani emi vu ngoni ya? Eri ka a’daa o’da Yehovani ’yole eri tianirisi, Mi o’da Daudini, a’dini nga ’yo, Mi ’ye ’diniri a’di e’yosi ya?

11Te Daudi nga ’yo Abisai pi ma tia ati’ba ini ’diyi be dria kini, Emi ne, ma mvi efupi ma ruaari, eri nda ma fuzu; agapi turi ’ba, suru Benyaminini ’dori eco e’yo nde ’yezaru ra! Emi ku eri, eri ma o’da; a’disiku Yehova azi eri ’dini.

12Kani Yehovani nga e’yo onzi ’bani ’yele ma vuri ne, te kani Yehovani nga e’yo onyiru omvi ma dri o’data andru ’dori ma paria.

13’Dini Daudi pi ’ba erini ’diyi be yi mu geria, te Simei aci oni kalaasi otizaru eri be, a’daa o’da si erini muria, Daudini o’bezu onisi, eri oyizu irifurasi indio

14Te opi pi ’ba dria ovupi eri be ’diyi be yi ande tu; eri li ande ’daa.

15Te Abisalomu pi ’ba dria, ’ba Israelini ’diyi be, yi eca Yerusalemua, azini Ahitofeli ovu eri be.

16Te eri eca ’dini, Husai ’ba Arikiari, Daudi agyi ka eca Abisalomu vu ’bo, Husai nga ’yo Abisalomu ma tia, Opi ma rua ma adri ala! Opi ma rua ma adri ala!

17Te Abisalomu ’yo Husai ma tia, ’Di asi adaru mini mi agyi vuri ya? Mi muni mi agyi be ku a’di e’yosi ya?

18Te Husai nga ’yo Abisalomu ma ria, kini, Yo; te ’ba Yehova pini pele, ’ba erini ’diyi pie, ’ba dria Israelini ’diyi pieri, ma nga mani ovu ’ba eriniri, ma nga ovu eri be.

19Te dika, eri onyiru ma ma nga azi a’di dri ya? Mvi erini dri ku ya? Ekile mani azi ngale oko mi ati dririle, ma nga ’ye ’dini mi drilia.

20Te Abisalomu nga ’yo Ahitofeli ma tia kini, Mi ama ama dri e’yo ngori amani ngale ’yeleri.

21Ahitofeli nga ’yo Abisalomu ma tia kini, Mi fi oku ati’baru mi atini kule jo agei tepi ’diyi vu; te Israeli dria yi nga eri mi eca onzi tu mi ati ma milia, te ’ba dria ovupi mi be ’diyi ma drini nga eca okporu.

22E’yo ’disi yi aso hema Abisalomu ma dri jo dri senderuri ma dria; te Abisalomu nga fi oku ati’baru i ati vile ’diyi vu Israeli dria ma milia.

23Ewu nderisi e’yo amaza Ahitofelini erini ’yoleri ovu ekile ’bani zile Mungu ma tiarile; e’yo amaza Ahitofelini ovu ’dini Daudi vu azini Abisalomu vu indi.

← Chapter 15 Jump to: Chapter 17 →