2 Samuel 20

Lugbara (E’yo Siza Alatararu Munguniri BIBLIA)

← Chapter 19 Jump to: Chapter 21 →

1Isu agu tokoa, runi Seba’i, Bikiri mvi, suru Benyamininiri ovu ’ dale; eri vu guka, eri ’yo ra, Esele amani Daudi ma alia yo, indi vini awuruso amani Yese ’ mvi ma alia yo; ’ba dria alu alu ma mvi hema yini ma alia fo, Israeli la!

2’Dini ’ba Israelini dria mu uru ku i Daudi vuti biko ja, yi bi seba Bikiri mvi ma vuti’i; te ’ba Yudani ’diyi yi bi opi yini ma vuti asi alusi engazu Yoridania cazu Yerusalemua.

3Te Daudi eca i vile joa Yerusalemua; eri o’du oku ati’baru mudri erini ndra kule jo ma ta mbazu ’diyi, ’ba yi arujoa, mba yi ma ta afa driasi, te fini yi vu ku. ’Dini yi funi ku cazu kpere o’du yini drazuria, yi ovu ekile awuziole.

4’Di ma vutia opi ’yo Amasa tia, Mi oku ’ba Yudani ’diyi ma vu ’doa de nga o’du pi pi na deni yi ku, te mi ngulupi ma ovu ’doa indi.

5’Dini Amasa nga mu ’ba Yudani omve ra; te eri awu ’dale aga o’du erini pele eri driri ra.

6Te Daudi ’yo Abisai tia kini, Curu’do Seba Bikiri mvini nga ama ’ye onzi aga Abisalomuni ndra ’yeleri ra; mi ’du ati’ba opi mini vile ’diyi, emi mu eri vuti drozu, eri kazu aku abi be okporu ’diyi bizu ku, kazu apazu ama miliasi ku.

7Te Yoabu pi fu ’ba Keretia ’diyi pie, ’ba Peletia ’diyi pie, ’ba ombaouru dria ’diyi pie, eri ma vutia; yi fu Yerusalemuasi Seba Bikiri mvi ma vuti drozu.

8Yi ka ca oni amboru Gibeoniaria, Amasa emu dri fuzu yi be. Te Yoabu su i ruaa afa ombani ayaru ’diyi, afa ’diyi ma dria su i opilia sei pi okporo eriniri be bakasi, te erini furia sei enze ira.

9Yoabu ’yo Amasa tia kini, E’yo mi vu onyiru ya, ma adri? Te Yoabu bi Amasa ma tibi dri ndisi, eri zizu o’bolo ndruzasi,

10Te Amasa egani e’yo seini ovuzu Yoabu ma driari ku; ’dini Yoabu so eri alia erisi, ’dini fini oda i va nyakua, soni eri dika ku; te Amasa dra ra. Te Yoabu pi adri Abisai be nga Seba Bikiri mvi ma vuti dro.

11Karilau alu Yoabuni so pa Amasa ageia, ’yozu kini, ’Ba Yoabuni lepi, ovupi Daudi driri, le te eri ma bi Yoabu ma vuti.

12Te Amasa la i o’bezu ari ini alia gbokoa. Te agu nde erini neria ’ba dria so pa ciri, eri ’du Amasani gbokoasi ji eri ase alia, ’be bongo eri dria ci, erini neria ’ba driani emuria agaria eri vusiria so pa ciri.

13Erini eri ’duzu gbokoasiri ma vutia, ’ba dria mu Yoabu ma vutia, Seba Bikiri mvi ma vuti drozu.

14Eri aga suruti Israelini ’diyi ma eseliasi dria cazu Abeli Betimaakaria, azini ’ba Bikiria ’diyi vu dria; te yi oku yi tualu, mu eri vutia indi.

15Te ’ba dria ovupi Yoabu be ’diyi yi emu eri acezu kuru Abeli Beti-maakaria; yi oku nyaku nguru aku nderi ageia, erini pa sozu abi kaliru ma ruaa; yi osi abi rua eri asuzu va.

16’Di ma vutia oku onduaru nga oyu aku alia ’yozu kini, Emi eri! Emi eri! Ma matu ’ba emi vu, emi ’yo Yoabu tia kini, Mi emu ogogo, ’dini ma ma ’yo mi tia ani.

17Te Yoabu emu eri vu ogogo; te oku nde nga ’yo, Mi Yoabu’i ya? Te eri omvi e’yo, Ma eri’i. Te oku nde nga ’yo eri tia, Mi eri e’yo ati’bo okuru minirini ’yole ’diyi. Eri omvi e’yo, Ma eri ra.

18Eri nga di ’yo kini, Ndra drio ’ba yi, adri ’yo, Ada, yi ma zi e’yo amaza Abeli ma alia; te yi ede e’yo ’dini.

19’Ba omba lepi ku, asi adaru be Israeli ma eselia ’diyi ma aluri ovu ma’i; mi nda aku andriru Israeli eseliari fuzu; mi le lonyi Yehovani oki a’di e’yosi ya?

20Te Yoabu nga e’yo omvi kini, Econi aluni ku! Econi mani kizaru kani dri jazaru aluni ku!

21E’yo ovuni ’dini ku. Te agu alu engazu angu oniru Efiraimuariari, runi Seba Bikiri mvi’i, nga dri ini eju opi dri aruzu, adaru opi Daudi’i; mi ofu eri, te ma nga nga aku ’doriarisi ra. Oku nde nga ’yo Yoabu ma tia kini, Mi ne, ama nga dri erini ’be mi vu abi kaliru driasi.

22’Di ma vutia oku nde nga mu ondua erinisi ’ba dria vu. Yi nga Seba Bikiri mvi ma ombe li, nga drini ’be amve Yoabu vu. Yoabu nga guka vu, yi nga yi ere akuasi, ’ba dria alu alu hema yinia. Te Yoabu nga mvi Yerusalemua opi vu.

23Te Yoabu ovu asikari ongulumuru Israelini ’diyi dria ma drilia; te Benaya Yehoyada mvi ovu ’ba Keretia pi ma drilia ’ba Peletia ’diyi be;

24te Adoramu ovu ’ba okule azia ’diyi ma drilia; Yehosafati Ahiludi mvi ovu ’ba suru ma e’yo sipiri;

25Seva ovu ’ba waraga sipiri; te Zadoki pi Abiatari be Yi kuhanini;

26te Ira ’ba Yairiari ovu kuhani Daudini.

← Chapter 19 Jump to: Chapter 21 →