2 Samuel 14

Lugbara (E’yo Siza Alatararu Munguniri BIBLIA)

← Chapter 13 Jump to: Chapter 15 →

1Te Yoabu Zeruiya mvi ni opi ma asisile ovu Abisalomu vu.

2Te Yoabu nga ’ba ti pe Tekoaa, e’du ’dale oku onduaru, ’yo eri tia, Ma matu ’ba mi vu, mi ’ye ekile ’ba ’ba wepirile, mi su koliba; mi efi mi rua odusi ku, te mi ovu ekile oku wupi izu ’ba drazasirile;

3te mi fi opi vu, mi ’yo eri tia ’dini. ’Dini Yoabu su oku nderi tia e’yo erini ngale ’yole ’diyi.

4Oku nde Tekoaari ka e’yo ’yo opi tia, eco iva, su mile ini nyakua inzita fezu, te eri ’yo, Opi la, mi ko ma aza fo.

5Te opi nga ’yo eri tia, A’dini mi ’yeni ya? Eri omvi e’yo kini, Adaru ma awuzioni, agupi mani dra ’bo.

6Ati’bo mini okururi ovu ndra agupianzi be iri, te yi iri tro ofu ndra yi yi eselia nyamukoa; ’ba aluni ’da yi esele awazu yo, te aluri co aziniri, eri dra ra.

7Te mi ne, curu’do ori’ba dria mani yi enga yi awazu ati’bo mini okururi be awa awa, te yi ’yo ra, Mi fe ama dri agu ndra i adrini fupiri, ’dini ama ma fu eri adripi erini, erini fuleri, ma arioti ofezu, ’dini yi le ’ba ngapi anyapa nyapiri fuzu indio ’Dini yi le aciolu mani acepi ma driri inyuzu, ’dini ru aluni kani ori’ba aluni kuzu ma agupi dri nyaku dria ku.

8Opi nga di ’yo oku nde tia, Mi mvi mi vile loa, te ma nga e’yo azi mi e’yosi.

9Oku Tekoaari ’yo opi ma tia kini, Opi mani inzileri la, e’yo liza ma ovu ma dria azini ori’ba mani ma dria; te opi pi oguna opiniri be yi ma ovu e’yo liza kokoru.

10Te opi ’yo ra, ’Ba ngapi e’yo ’yopi mi vuri, mi eji eri ma vu, eri ngani mi elo dika aluni ku.

11Te loku nde nga ’yo, Ma matu ’ba mi vu, opi ma ega Yehova Mungu miniri, i’dini ’ba arioti ofepiri ma ja ’ba dri dika ku, ’dini yi ngani mva maniri ma dri ja ku indio Te eri ’yo, Ekile Yehovani ovule idrirurile, dribi efi alu mi mvini ngani ’de nyakua ku.

12Te oku nde ’yo eri tia, Ma matu ’ba mi vu, mi fe ati’bo okuru miniri ma ’yo e’yo opi mani amboruri ma tia. Eri ’yo ra, Mi ’yo.

13Oku nde nga ’yo, Mi ega e’yo ’yezu ’ba Munguni vu ’dini a’di e’yosi ya? Te opini e’yo ’yozu ’dinirisi, eri ’ba e’yo liza i ngulupi ma dria, a’disiku opini ’ba erini ’bele amveri omvizu dika kurisi.

14Te dra ngani ama ku aluni ku, ama ovu ekile yi ’bani dale nyakua ’bani ecole ekole dika kurile; te Mungu ngani idri ’ba ’bele amverini nze ku, ’beni eri i vusi ku.

15E’yo ’disi curu’do ma eca e’yo ’dori ’yozu opi mani amboruri be, a’disiku ’bani uri mile ma asiarisi; te ati’bo mini okururi ega kini, Ma nga e’yo ’yo opi tia curu’do; kani opini nga e’yo ati’bo erinirini zile eri tiari ’ye ra yani.

16Te opini nga eri ra, nga ati’bo i erini pa agu lepi ma fupi ma mvi pie tualu ama kazu lonyi Munguni isuzu kuri ma dria.

17Ma matu ’ba mi vu, mi fe e’yo ’yoza opini ma omi asi mani; a’disiku opi mani amboruri ovu ekile malaika Munguni e’yo onyiru pi ma esele awapi e’yo onzi berile. Yehova Mungu miniri ma ovu mi be!

18’Di ma vutia, opi nga ’yo oku nderi tia kini, Mi oci e’yo mani ngale zile mi tiari aluni ku, ma matu ’ba mi vu. Oku nde nga ’yo, Opi mani amboruri ma ’yo e’yo curu’do.

19Opi nga ’yo kini, Yoabu ma dri ovu mi be e’yo dria ’diyi ma alia ra, ya? Te oku omvi kini, Ekile orindi minirini ovuzu idrirurile, opi mani amboruri, ’ba aluni econi e’yo opi mani amboruriniri onazu dri ndia kani dri ejia ku. Ati’bo mini Yoabu azi ma dri, eri ece vini e’yo ’yoza ’diyi dria ati’bo mini vu.

20Ati’bo mini Yoabu ’ye ’ dini e’yo nde ma mile Ojazu ndu. Opi mani ovu onduaru ekile malaika Mungunile, e’yo dria ovupi nyakuari nizu.

21Te opi nga ’yo Yoabu tia, Mi ne, curu’do ma li e’yo ’diri ’bo, ’dini mi mu karilau nde Abisalomuni omvizu.

22Te Yoabu eco iva, su i mile nyakua inzita fezu, eri inzi opini; te Yoabu ’yo, Opi mani inzileri, ati’bo mini ni andru eri isu asi ndriza mi ma milia ’bo, opini e’yo mani matu ’bazuri erile ’borisi.

23’Dini Yoabu enga, mu Gesuria, cii Abisalomuni Yerusalemua.

24Te opi ’yo ra kini, Eri ma oja i ngulupiniria, eri ma ne ma mile ku. ’Dini Abisalomu oja i jo i ngulupiniria, neni opi ma mile ku.

25Te Israeli ma eselia dria ’ba azini aluni runi idule idu ndrizasi Abisalomuleni yo; engazu pa agelia cazu dri olu’bua eri ovu nyebile kokoru.

26Te eri ka dribi erini li (eri li eri eli ma kalatia dria; li eri erini ovule nzizaru eri ma driarisi), o’bi nziza dribi nderini, te eri ovu sekele turu iri afa nziza o’bizu opinirisi.

27Ti Abisalomu dri agupianzi na, zamva alu, runi Tamara’i; eri oku ndrizaru tu.

28Te Abisalomu ovu eli pi pi iri Yerusalemua, te neni opi ma mile ku.

29’Di ma vutia Abisalomu pe ’ba ti Yoabuni omvezu, eri ti pezu opi vu; te Yoabu leni emu eri vu ku. Eri pe ’ba ti dika pale iri, te eri leni emu ku.

30E’yo ’disi eri ’yo ati’ba erini ’diyi ma tia kini, Mi ne, amvu Yoabuni ovu ogogo maniri be, anya erini be alenia; mi mu tini duo ’Dini ati’ba Abisalomuni ’diyi du amvu nderi ma ti acisi ra.

31Te Yoabu nga enga, emu Abisalomu vile loa, ’yo eri tia, Ati’ba mini du amvu mani ma ti a’di e’yosi ya?

32Abisalomu nga e’yo omvi Yoabu tia kini, Mi ne, ma pe ’ba ti mi vu ’yozu, Mi emu ’doa, ma nga mi ti pe opi vu beni, ’dini mi ma ’yo, Ma enga Gesuriasi ecazu ’doa a’di e’yosi ya? Eri onyiru aga ra ma! dri ovuzu nga ’dale. E’yo ’disi curu’do mi fe ma ma ne opi ma mile; te e’yo onzi ka ovu ma alia, eri ma fu ma.

33Yoabu nga di mu opi vu e’yo ’yozu eri tia; eri ka Abisalomuni omve ’bo, eri eca opi vu, avu va, su i mile: nyakua opi drilia; te opi nga Abisalomuni zi o’bolo ndruzasi.

← Chapter 13 Jump to: Chapter 15 →