2 Samuel 18

Lugbara (E’yo Siza Alatararu Munguniri BIBLIA)

← Chapter 17 Jump to: Chapter 19 →

1Te Daudi nga ’ba ovupi eri be ’diyi la, eri nga ambo o’ba ’ba alifu alu ’diyi pi ma drilia ’ba turu alu ’diyi be.

2Te Daudi nga ’ba ongulumuru ’diyi ofu, esele alu nani ovu Yoabu ma dria, esele alu nani ovu Abisai Yoabu adri Zeruiya mvi ma dria, azini esele alu nani ovu Itai ’ba Gitiari ma dria. Te opi nga ’yo ’ba ’diyi ma tia kini, Ma ngulupini nga mu emi be ada.

3Te ’ba yi ’yo, Mi ma mu ama be ku. A’disiku ama ka apa ra, yi ngani e’yo amani ega ku. Ama egelepi azini ka odra ra, yi ngani e’yo amani ega ku, Te mi ovu ekile ama ma alifu mudrile; e’yo ’disi onyiruni agapiri mi ovu ngonde akua ama aza kozu.

4Te opi nga ’yo yi tia kini, E’yo ovupi onyiru emi ma milia agapiri, ma nga ’yeo Te opi nga pa so kalitile ageia, ’ba dria nga fu turu vusi azini alifu vusi.

5Te opi nga azi Yoabu pi ma tia Abisai pie Itai pie, ’yozu, Emi ma ’ye karilau Abisalomuni e’yere ma ma e’yosi. Te ’ba dria eri opini, erini ambo ’diyi dria aziria Abisalomu ma e’yosi.

6’Dini ’ba ongulumuru nga fu nyamu dria a’di ’dizu Israeli be; yi ’di a’di nde oce Efiraimuaria,

7Te ati’ba Daudini aga ’ba Israelini ’dale, o’du ndesi dri jaza amboru ovu ’dale, adaru ’ba alifu kali iri odra ra.

8A’di nde ere i angu dria ma alia; o’du ndesi oce nya ’ba aga sei sini nyaleri ra.

9Te drilebasi ati’ba Daudini nga dri fu Abisalomu be. Abisalomu ovu acizu akanya erini dria, te akanya nde fi pati amboru ma arakala yi ecipi ci ’diyi ma etiasi, dri erini su i kiri kiri pati nde eselia, akanya erini acizu driniari aga ra, ku eri ’izaru keleru pani cakokoru nyakua.

10Agu azini ne e’yo nderi, olu Yoabu tia kini, Mi ne, ma ne Abisalomuni ’izaru pati eselia.

11Yoabu ’yo agu e’yo olupi eri tiari ma tia kini, Mi ne eri ra Mi coni te eri, erini e’dezu nyakua va ku a’disi ya? Te’do ma fe mi dri dahabu efi mudri ’bo, baka opile anzuzuri be.

12Te agu nderi ’yo Yoabu ma tia kini, Ma ka tro dahabu efi alifu isu ma dria ti, ma econi ma dri ejuzaru opi mvi vu ku; a’disiku ama eri opini emi azizu Abisai pie, Itai pie, ’yozu, Emi ma mba emi ma ta, ’ba aluni kazu karilau Abisalomu ma rua elozu ku.

13Ka’dini yo te do ma ka idri erini ’ye lokirisi (e’yo aluni ovuni zizaru opi ma milia ku), te’do mi nga mi gbu ndu e’yo nderisi.

14Yoabu nga ’yo kini, Ma econi tezu mi be ’dini ku. Eri ’du oliri na i dria, eri oso Abisalomuni ani culua, erini ovuria nga idriru pati nde eseliaria.

15Te karile mudri afa suza ayaru ombani Yoabuni ejipi ’diyi yi ace Abisalomuni kuru kuru, co eri, fu eri ra.

16Vutinia Yoabu vu guka, ’ba nde ’diyi emvi kuzu Israeli ma vuti drozu ja; a’disiku Yoabu oga ’bani muko si.

17Yi ’du Abisalomuni, yi ’be eri ’bile amboru oce aliari ma alia, odro drinia oni ambo nguru; te Israeli dria apa alu alu hema yinia.

18Ewu erini ovuzu nga idrirurisi, Abisalomu ’du oni, edre eri piriru i ma ngulupi dri E’bu Opiniria, a’disiku eri ’yo, Ma ovuni agupimva be ’bani ngazu ma egazu ku; eri omve oni piriru nderi i ngulupi ma rusi, te ’ba omve eri oni Abisalomuni ’bani eri ma e’yo egazuri, ecazu kpere andru.

19’Di ma vutia Ahimaazi Zadoki mvi ’yo kini, Mi fe ma ma nzu curu’do, e’yo kuza jizu opi vu, ecezu Yehova ofe arioti erini ari’ba erini ’diyi dri.

20Te Yoabu ’yo eri tia, Mi ngani e’yo kuza ji andru ku, te mi nga e’yo kuza ji o’du azinisi, te andru mi ngani e’yo kuza ji ku a’disiku opi mvi dra ra.

21Te Yoabu nga ’yo ’ba Kusiari ma tia, Mi mu, e’yo mini neleri ece opi dri. ’Ba nde Kusiari avu Yoabu ma drilia raka, nga nzu ra.

22’Di ma vutia Ahimaazi Zadoki mvi ’yo Yoabu tia dika kini, E’yo yo, ka eca ngoni ti, mi fe ma ma nzu ’ba Kusiari ma vutia, ma matu ’ba mi vu, Te Yoabu ’yo, Mi ni ra mi ngani orodri isu e’yo kuzasi ku. Mi le nzu a’di e’yosi ya, ma mvi?

23Eri ’yo ra, E’yo yo, ma nga nzu ra. Te Yoabu ’yo eri tia, Mi nzu. Te Ahimaazi nzu geri angu senderuriarisi, eri ca ’ba Kusiarini oko.

24Te Daudi ovu rizu kalitile iri ’diyi ma eselia; te ’ba angu tepiri tu uru kali tile abi vuleruri ma dri senderuria, eri enga mile erini luzu, te mi ne, agu alu ovu enzuzu a’dule.

25’Ba angu tepiri oyu ’yozu opi Itia. Opi ’yo ra, Eri ka ovu a’dule, ka’dini e’yo kuza ovu eri ma tilia. Te eri enzu mbele, eca ogogo.

26’Ba angu tepiri ne agu azinini enzuria; te ’ba angu tepiri omve ’ba kalitile agei tepiri ’yozu, Mi ne, agu azini ovu enzuzu a’dule. Te opi ’yo, Eri vini e’yo kuza eji indi.

27’Ba angu tepiri ’yo, Ma ega ongu ’ba drilerini ovu ekile Ahimaazi Zadoki mvi ma ongule. Te opi ’yo ra, Eri ’ba onyiruni, eri e’yo kuza onyiru eji.

28Ahimaazi nga oyu opi tia kini, E’yo dria ovu onyiru. Eri avu va opi drilia, su i mile nyakua, ’yozu, Yehova Mungu mini ma ovu inzizaru, eri’i ’ba dri yini ejupi dri aruzu opi mani amboruri be ’diyi fepi ama driri.

29Te opi ’yo ra, Karilau Abisalomu ovu onyiru ya? Ahimaazi omvi e’yo kini, Yoabuni ati’bo opini ti pezuria, adaru ma’i ati’bo miniri, ma ne otrena amboru te ma nini a’di e’yoni yari ku.

30Opi ’yo ra, Mi oja mi kalaa pa sozu ’doa. Te eri oja i, eri so pa ciri.

31Te mi ne, ’ba Kusiari eca ra; ’ba Kusia nderi ’yo, E’yo kuza onyiru opi mani amboruri dri! A’disiku andru Yehova ofe arioti mini ’ba dria engapi mi ruaa ’diyi dri ’bo.

32Opi ’yo ’ba Kusiari ma tia, Karilau Abisalomu ovu onyiru ya? Te ’ba Kusiari omvi e’yo kini, Onyiru ari’ba opi mani amborurini ma ovu karilau nderile, ’ba engapi mi ruaa mi ’yezu onzi ’diyi be dria.

33Te candi amboru bi opini, eri nga tu jo kalitile driaria, nga awu wu; te: erini muria eri ’yo ’dini, Ma mvi Abisalomu la, ma mvi, ma mvi Abisalomu! Mani te drazu mi parianiri onyiru fo, Abisalomu la, ma mvi, ma mvi!

← Chapter 17 Jump to: Chapter 19 →