2 Samuel 21

Lugbara (E’yo Siza Alatararu Munguniri BIBLIA)

← Chapter 20 Jump to: Chapter 22 →

1Ewu Daudinisi liki amboru ’de eli pi pi na esele ecekokoru; te Daudi nga mile Yehovani nda. Te Yehova ’yo tinia, Arioti ofeza ovu Saulo pi ma dria ori’ba eriniri be, erini ndra ’ba Gibeonia ’diyi ofuzurisi.

2’Dini opi omve ’ba Gibeonia ’diyi. ’Ba Gibeonia ’diyi ovuni ’ba Israelini ku, te yi ovu ’ba Amorini ma joloko acepiri; Israeli ka tro ndra oyo so yi pazu ti, te Saulo ndru yi ofuzu asi avaru erini Israeli pi vu Yuda berisi.

3Daudi nga ’yo ’ba Gibeonia ’diyi ma tia kini, Ma nga emi dri a’du ’ye ya? Ma nga emi ofe a’disi ’dini emi fe asi ndriza awuruso Yehovaniri dri ya?

4’Ba Gibeonia ’diyi ’yo eri tia kini, E’yo ovupi ama pi ma eselia Saulo be, kani ori’ba erini beri ovuni e’yo dahabuni, kani meleni ku; eri ovuni vini e’yo amani ’ba azini fuzu Israeli ma alia ku indio Eri nga ’yo yi tia, kini, E’yo emini ’yoleri, ma nga e’yo nderi ’ye emi dri ra

5Yi ’yo opi tia, kini, ’Ba ’yepi ndra ama inipi, e’yo otupi i asia ama ruaa ama dri jazu ama kazu acezu pari aluni Israeli ma lokiri ma eseliaria kuri,

6mi fe ama dri agupianzi aziri anzi ’ba nderini eselia ’diyi, ama nga yi o’i uru Yehova drilia Gibeonia oni Yehovaniri ma dria. Te opi ’yo ra, Ma nga yi fe ra.

7Te opi ku Mefiboseti, Yonatani Saulo mvi ma mvini, oyo Yehovani yini sole yi eseliarisi, Daudi pi ma eselia Yonatani Saulo mvi be.

8Te opi o’du agupianzi iri Rizipa Aya ma zi vile, erini tile Saulo dri ’diyi, yi Arimoni pi Mefiboseti be; azini agupianzi towi. Merabu Saulo zi vile, erini tile Adrieli Barizilai mvi ’ba Meholatiari dri ’diyi;

9eri fe yi ’ba Gibeonia ’diyi dri, yi o’i yi oni dria Yehova drilia, yi aziri ’diyi o’de dria tualu. Yi ofu yi o’du oko ’bani ’bazu anya lozu anya aziniri berisi.

10Te Rizipa Aya zi ’du koliba, aja eri kata dria i ngulupi dri, engazu o’du yini ’bazu anyalozurisi cazu ozoo ’buarini ’bazu ’dizu yi driarisi; etusi eri kuni aria ’bua ’diyini rizu drinia ku, inisi kuni anyapa rizu drinia ku indi.

11Yi olu Daudi tia e’yo Rizipa Aya zi, oku ati’boru Saulonirini ’yele ’bori.

12Te Daudi mu fala Saulo pini o’du mvi Yonatani be ’ba Yebesi-gileadia ’diyi ma driasi, yi’i fala nde ’diyi ogupi gboko Beti-saniaria pari ’ba Filisitiaa ’diyini yi o’izu o’du ’ba Filisitiaa ’diyini Sauloni fuzu Giliboarisi ’diyi;

13’dale eri o’du fala Saulo pini mvi Yonatani be; yi oku fala ’ba yini o’ile ’diyini indio

14Yi sa fala Saulo pini mvi Yonatani be angu Benyaminini Zelaaria, i ati Kisi ma nyadri ma alia; yi ’ye e’yo opini azile ’diyi dria. ’Di ma vutia Mungu eri zita angu ndesiri, Abisaini Daudini pazu ’ba ambotili ma azi ma driari

15Te ’ba Filisitiaa ’diyi ’di a’di Israeli be dika, te Daudi si va ati’ba lerini ’diyi be, ’di a’di ’ba Filisitiaa ’diyi be; te Daudi ande ra.

16Te Isibi-benobu, agu alu anzi ’ba ambotili ’diyini ma eseliari, alu erini ma nziza ovu sekeli turu na molani, su afa suza ayaru ombani o’diru ’diyi, eri ega Daudini fuzu.

17Te Abisai Zeruiya mvi emu eri pazu, eri co ’ba Filisitiaa nderi, fu eri ra. Vutinia ’ba Daudini nga oyo so eri tia kini, Mi ngani mu ama be a’dia dika ku, mi kazu diza Israelini inyuzu ku.

18Eri eca ’dini ’di ma vutia, a’di ovu dika ’ba Filisitiaa ’diyi be Gobua; Sibekai ’ba Husatiari fu Safi agu alu anzi ’ba ambotili nde ’diyini ma eseliari.

19A’di ovu dika Gobua ’ba Filisitiaa ’diyi be; Elihanani Yaare-oregimu mvi ’ba Betele-hemuari fu Goliato ’ba Gitia ovupi ajufe erini be ekile pati ’ba bongo capirinirileri,

20Te a’di ovu dika Gatua, pari agu izu turini ovuzuria, dri erini dria ovu drianzi be azia azia, azini pa erini dria ovu paanzi be azia azia, kalafeni kali iri drini su; ti eri indi ’ba ambotili nderi dri.

21Te eri ka Israeli onzo, Yonatani Simei mvi, Daudi adri, fu eri.

22Ti ’ba su ’diyi ’ba ambotili nderi dri Gatua; te yi o’de dri Daudi pinisi ati’ba erini ’diyi be.

← Chapter 20 Jump to: Chapter 22 →