2 Samuel 24

Lugbara (E’yo Siza Alatararu Munguniri BIBLIA)

← Chapter 23 Jump to:

1Adra Yehovani di dika Israeli vu, eri enga asi Daudini yi vu, ’yozu, Mi mu Israeli pi la Yuda be.

2Te opi ’yo Yoabu asikari ongulu-muru driliari ovupi eri beri ma tia kini, Mi mu curu’do acizu suruti dria Israelini ’diyi ma eseliasi, ngazu Dania cazu Beeri-sebaa, mi la ’ba, dini ma ma ni ’ba ma kalafe ovu ngopi ya ani.

3Te Yoabu ’yo opi tia kini, Yehova Mungu mini ma fe kalafe yini ezuzu pale turu, azini mile opi mani amborurini ma ne e’yo nderi; te e’yo ’dori ovu ayikoru opi mani amboruri ma milia a’di e’yosi ya?

4Te e’yo opini aga e’yo Yoabu pini ambo asikari ongulumuru drilia ’diyiniri ra. Te Yoabu pi ambo asikari ongulumuru drilia ’diyi pie fu mu opi vusi ’ba Israelini ’diyi lazu.

5Yi zo Yoridanini, yi aso hema yini Aroeria, aku ovupi e’bu ma agaduariari ma dri ndi Gadi vuleruria, cazu kpere Yazeria,

6Yi ca Gileadia, azini Kadesi angu ’ba Hitia ’diyiniria; yi ca Dania, engazu Dania yi ogo yi mu kalaasi cazu Sidonia,

7yi eca pari okporu Turoaria, azini aku dria ’ba Hivini pima ’ba Kananini pie; yi fu mu Yuda vu andraleru Beeri-sebaa,

8’Dini yi ka aga ’dale ’dole ’dale ’dole angu eseliasi dria, yi ca Yerusalemua mba oromi drinia o’du kali iriri ka yi de ra.

9Te Yoabu fe kalafe ’bani laleri opi dri: Israeli eselia ’ba ombaru sei nzepi ’diyi ovu alifu turu aro, te ’ba Yudani ’diyi ovu alifu turu towi.

10Erini ’ba lazuri ma vutia, asi Daudini mbu ’bala. Te Daudi ’yo Yehova tia, Ma eza tu e’yo mani ’yele ’dinirisi. Te curu’do ma matu ’ba mi vufo, Yehova la, mi wu e’yo onzi ati’bo minini; a’disiku ma ’ye e’yo azazaru tu.

11Daudini engaria o’bitisi, e’yo Yehovani eca nabi Gadi, ’ba e’yo ndreza ndrepi Daudi driri vu, ’yozu kini,

12Mi mu ’yo Daudi tia, Yehova ’yo ’dini, Ma ’ba mi drilia e’yo na; mi pe yi ma alu, ’dini ma ma ’ye e’yo nderi ani.

13’Dini Gadi eca Daudi vu, ece eri dri, ’yo eri tia kini, ’vii le eli aziri likini ’dezu angu minia ya? Kani mba na mini apazu ari’ba mini ma drilia yini mi vuti droria ya? Kani o’du na dra muanini ecazu ovuzu angu minia ya? Mi ega e’yo, mi pe e’yo ngoni mani nga omvi ’ba ma ti epepiri vu.

14Te Daudi ’yo Gadi tia kini, Eri ma dri ewaru tu aga ra; te mi fe ama ma ’de Yehova ma dria, a’disiku yiki erini ovu amboru; te mi fe ma ma ’de ’ba ma dria ku.

15’Dini Yehova pe dra muani ma ti Israeli vu, engazu o’bitisi cazu etu peleria; engazu Dania cazu Beerisebaa ’ba odra alifukali aziri.

16Te malaika nderi ka dri ini eju Yerusalemu vu eri dri jazu, Yehova omvi asi erini e’yo onzi kuzu ja, ’yo malaika ’ba dri japiri ma tia, Fudri ’bo; mi omvi di mi dri. Malaika Yehovani ovu pa sozu pari anya dizu Arauna ’ba Yebusini vileri ageia.

17Te Daudini malaika ’ba ofupiri neria, eri ’yo Yehova tia kini, Mi ne, ma eza ma’i, ma ’ye e’yo aka; te kabilo ’diyi ’ye a’dini ya? Ma matu ’ba mi vu, mi fe mi dri ma ovu ma dria, ori’ba ma atini ’diyi pie fo.

18Te Gadi nga emu Daudi vu etu nderisi, ’yo eri tia kini, Mi mu uru, mi ede pari edeta edezuri Yehova dri, pari anya dizu Arauna i’ba Yebusini vileria.

19Te Daudi mu uru ekile Gadini ’yolerile, ekile Yehovani azita felerile.

20Te Arauna lu amve, ne opi pini emuzu eri vu ati’ba erini ’diyi be; te Arauna fu, avu va opi drilia, mile erini suzu, va nyakua.

21Te Arauna nga ’yo kini, Opi mani amboruri emu ati’bo erini vu a’di e’yosi ya? Daudi ’yo kini, Pari anya dizuri jezu mi dri, pari edeta edezuri edezu Yehova dri ani, ’dini azo muani ma ku ’ba beni.

22Te Arauna nga ’yo opi tia kini, Opi mani amboruri ma ’du afa ovupi onyiru eri ma miliari, fezu edetaru Yehova dri; mi ne, ti ngale vele edetaru ’diyi yi ’di, azini afa anya dizu ’diyi pi kulumbu tini ’diyi pie yi,

23Opi la, Arauna fe afa ’diyi dria opi dri. Arauna ’yo vini opi tia kini, Yehova Mungu mini ma la’i mi.

24Te opi nga ’yo Arauna Itia kini, Yo, te adaru ma nga je mi dri ajesi; ma ngani vini edeta vezaru mani jele ajesi ku ’diyi fe Yehova Mungu mani dri ku indio ’Dini Daudi je pari anya dizuri, ti ’dayi pie, sekeli dahabuni kali towisi.

25Te ’daa Daudi ede pari edeta edezuri, Yehova dri, fe edeta vezaru ’diyi pi, edeta asi anzuruni ’diyi be. E’yo’disi Yehova nga zita angu ndesiri eri Ira, azo muani nga Israeli ku ani.

← Chapter 23 Jump to: