John 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Okokele E’yo ovu indi, E’yo nderi ovu Mungu be, E’yo nderi Mungu’i.

2E’yo nderi ovu okokele Mungu be;

3eri ’ba ndra afa driani, afa ovupi ’bazaru ’diyi ma aluni ’bani i eri kokoru ku.

4Eri alia idri indi, idri nderi ovu diza ’bani.

5Dizani di ini ma alia, te ini nde bini eri ku.

6’Ba alu Munguni ndra tini epeleri indi, runi Yohana’i.

7’Ba nderi emu e’yo eti nzezu, eri ma nze e’yo dizani ma eti ani, ’ba dria yi ma a’i erisi beni.

8’Ba ’diri ovuni diza nderi’i ku, te eri emu diza nde ma e’yo eri nzezuni.

9Diza adaru dipi ’ba dria ma driari emu nyakua.

10Eri ovu nyakua, ’ba ndra nyakuni ti, te nyaku nini eri ku.

11Eri emu afa ini vu, te ’ba erini ’diyi a’ini eri wa’diru ku.

12Te ’ba dria eri a’ipi ’diyi, eri fe okpo yi dri yi azu anzi Munguniru, yi’i eri ma ru a’ipi ’diyi;

13’ba nde ovuni osizaru arisi ku, kani e’yo ruani lelerisi ku, kani e’yo ’bani lelenirisi ku, te Mungusi.

14E’yo nde ofu ’ba rua beriru, eri ovu ama eselia, ’yeta anzutiri be tre, e’yo ada be; ama lu diza erini vu, diza ekile Atani fele Mvi tile aluri dririle.

15(Yohana nze e’yo eti erisi, eri oyu uru kini, ’Ba ’diri eri ’ba mani e’yoni ’yoleri’i kini, ’Ba emupi ma vutiari eca ovu ma drilia, a’disiku erini ndra ovule mani okorisi.)

16Te ama dria a’i afa gapi eri ma alia tre tre ’diyi ma azi ra, ’yeta anzutiri ’yeta anzutiri ma dria.

17Azita ovu fezaru Musasi; ’yeta anzutiri pi e’yo adaru be emu Yesu Kristosi.

18Drio ’ba neni nga Mungu aluani ku kpere curu’do; Mvi tile alu ovupi Ata ma agatiari ece erini.

19’Di eri e’yo eti Yohanani nzeleri, ’ba Yahudini ka kuhani piyi ma ti epe eri vu ’ba Levini be, engazu Yerusalemua, Mi a’di’i yari zizu eri tia.

20Eri e’da e’yo ra, eri ocini e’yo ku, te e’da kini, Ma’i, ma Kristo’i yo.

21Yi nga di zi eri tia kini, Ka’dini te ngoni? Mi Eliya’i ya? Eri ’yo ra, Ma eri’i yo. Mi nabi nderi’i ya? Eri omvi e’yo kini, Yo.

22Yi nga di ’yo tinia, Mi di a’di’i ya? Ama ma omvi e’yo ’ba ama ti pepi ’diyi vu beni ’vii ’yo mi ngulupi ma e’yosi ngoni ya?

23Eri ’yo ra, Ma o’duko ’ba alu oyupi roko driarini, Emi ’ba leti Opini kililiru, nabi Isayani ’yolerile.

24De ’ba Farisaini pe yi tini.

25Yi nga e’yo zi, ’yo tinia, Mi ka ovu Kristo’i yo, kani Eliya’i yo, kani nabi nderi’i yo, mi di baputizi fe a’disi ya?

26Yohana nga e’yo omvi yi tia kini, Ma baputizi fe yisi; te emi eselia ’ba alu so pa indi emini nile kuri;

27eri ’ba emupi ma vutia, mani dri fuzu enyiriko eri ma paari ma baka ayuzu kuri’i.

28E’yo ’diyi ’ye yi Betania Yoridani tia ’aa’dasi, pari Yohanani baputizi fezuria.

29Dru ’dini eri nga Yesuni ndre emuria i vu, nga ’yo ra indi, Mi ndre, Kabilomva Munguni, e’yo onzi nyakuni wupiri!

30’Ba ’diri eri ’ba mani e’yoni ’yoleri, Ma vutia ’ba ovupi ma driliari emuni, a’disiku erini ndra ovule mani okorisi.

31Ma’i, ma nini ndra eri ku; te ma emu baputizi fezu yisi, eri ma ovu ecezaru ani ’ba Israelini vu beni.

32Yohana nze e’yo eti kini, Ma ndre Orindini esiria ’buarisi va ekile a’balaule; eri ri drinia.

33Ma’i, ma nini ndra eri ku; te ’ba ma ti pepi baputizi fezu yisiri ’yo ma tia, ’Ba mini Orindi ndrele esiria drinia rizu drinia ’daniri, ’diri ’ba baputizi fepi Orindi Alatararusiri’i.

34Ma ndre ra, ma nze e’yo etini ’bo kini ’ba ’diri eri Mvi Munguni.

35Drusi dika Yohanani de pa soria ’ba erini imbale ’diyi be iri,

36eri lu Yesuni aciria, eri ’yo ra, Mi ndre, ’di Kabilomva Munguni!

37’Ba erini imbale iri ’diyi nga e’yo eri, erini ’yoria, nga Yesu ma vuti bi.

38Yesu oja i, ndre yi yini i vuti biria, nga ’yo yi tia, Emi a’di ndru ya? Yi nga ’yo eri tia, Rabi (ojazaru efini ’dini, ’Ba ’ba Imbapiri), mi la ngoa ya?

39Eri ’yo yi tia, Emi emu, emi nga ndre ani. Yi nga di mu ani, nga pa erini lazuri ndre; yi nga la eri be o’du ’dasi; isu etu eca ekile mudrile.

40’Ba alu ’ba iri e’yo eripi Yohana tia, Yesu ma vuti bipi ’diyi ma eseliari, eri Andarea, Simoni Petero ma adri’i.

41Eri isu oko i adri Simoni’i, nga ’yo tinia, Ama isu Mesiani ’bo (ojazaru efini Kristo’i).

42Eri ji eri Yesu vu. Yesu lu vunia, ’yo kini, Mi Simoni Yohana mvi; yi nga mi omve Kefa (ojazaru efini Petero’i).

43Drusi ’dini eri nga le fu mu Galilia. Eri isu Filiponi; Yesu nga ’yo tinia, Mi bi ma vuti.

44Isu Filipo enga Betesaida, aku Andarea pini Petero beria.

45Filipo isu Natanielini, nga ’yo eri tia, Ama isu ’ba Musa pini e’yoni sile azita alia nabi be, Yesu Yusufu mvi Nazaretiari’i.

46Natanieli nga ’yo eri tia, Afa onyiruri eco engazaru Nazaretia ra ya? Filipo nga ’yo eri tia, Mi emu ndre.

47Yesu nga Natanielini ndre erini emuria i vu, nga ’yo erisi, Mi ndre, ’ba Israelini mgba, asia lokiri kokoruri ’di!

48Natanieli nga ’yo eri tia, Mi ni ma ngoa? Yesu nga e’yo omvi tinia kini, De nga Filipo omveni mi ku, mini de ovuria elio pati etia, ma ndre mi ’daa.

49Natanieli nga e’yo omvi tinia, Rabi, mi Mungu Mvi! Mi Israeli ma Opi’i!

50Yesu nga e’yo ori vi ’yo tinia kini, Mani ’yole mi tia, Mandremielio pati etia-risi mi a’i ra ya? Mi nga e’yo e’yo ’diyi agapi rari ndre.

51Eri ’yo vini tinia, Ma ’yo emi tia ndi ndi, emi nga ’bu ndre tile be zizaru mgboru, azini malaika Munguni yini turia azini esiria Mvi ’bani ma dria.

Jump to: Chapter 2 →