John 12

Lugbara (E’yo Siza Alatararu Munguniri BIBLIA)

← Chapter 11 Jump to: Chapter 13 →

1O’du azia de nga omu agaza ’ba drilesirini ecazu kuria, Yesu nga emu Betania, pari Lazaro Yesuni engale ’ba draza ma eselia rini ovuzuria.

2Yi a’di eri dri nyaka ondre beri omuru ’daa; Marita nga omu nde ma azini, te Lazaro ovu ’ba ripi eri be nyaka tia ’diyi ma azi.

3Mariamu nga lu’bu odu arikariru alaru ’bani jele aje ambosiri beri ’du, nga Yesu ma pa efi ani, eri nga pani ini dribi i ma driarisi; odu nde ma aji nga ga jo ma alia tre.

4Te Yudasi Isikariote, ’ba erini imbale ’diyi ma azi alu (’yepi eri ma o’di nyapiri) nga ’yo ra,

5Ozini odu ’diri silingi turu nasi fezu ’ba aliarioru ’diyi dri ku a’disi ya?

6Eri ’yoni e’yo ’diri erini ’ba alioru ’diyi lelerisi ku, te erini ovule oguounirisi, a’disiku erini ovuria jurua be, eri adri afa ’bale alenia ’diyi o’du ra.

7Yesu nga ’yo ani, Mi ku eri, eri ma mba eri ma ta kpere o’du ma sazuri tezu.

8Te ’ba alioru ovu emi be etuzu ’dani, te ma ovuni emi be etuzu ’dani ku.

9’Ba ongulumuru kakau ’ba Yahudini ma eselia ’diyi ka eri kini eri ’daa, yi emu ra, te Yesu ma e’yosi a’dule ku, te yi ma ndre Lazaro erini engale ’ba draza ma eseliari alu indi.

10Te ’ba kuhani amboru ’diyi yi ’ba e’yo otu Lazaroni fuzu indi,

11a’disiku erisi ’ba Yahudini kakau yi fu mu Yesuni a’izu.

12Drusi ’ba ongulumuru kakau emupi omua ’diyi ka eri kini Yesuni emu Yerusalemua,

13yi ’du ndende ma arakala, fu mu dri fuzu eri be, yi nga otre uru kini, Hosana! ’Ba emupi Opi ma rusiri ma ovu inzizaru, eri Opi Israeliniri’i!

14Te Yesu ka akanyamva isu ra, eri nga tu ri drinia; ekile erini ovule sizarurile,

15Mi ru ku, Zioni zi la; mi ndre, Opi mini emu emu erini riria akanyamva ma dria!

16’Ba erini imbale ’diyi vani e’yo diri okorisi ku; te Yesu ka diza ini isu ’bo, yi nga e’yo ega yi asia ndo kini e’yo ’diyi ovu sizaru eri ma e’yosi, azini kini yi ’ye e’yo ’diyi eri vu.

17’Ba ongulumuru ovupi eri be erini Lazaroni omveria gule aliarisi, azini erini eri engaria ’ba draza ma eseliarisi ’di yi nze e’yo eti erisi.

18E’yo ’disi ’ba ongulumuru yi fu mu dri fu eri be, yini erile kini eri ’ye eceta ’diri ’borisi.

19’Ba Farisaini nga ’yo yi eselia ani, Emi lu, emi ’yeni afa aza kozaruni ku; mi ndre, wudrikuru dria fu mu eri vutisi.

20Isu ’ba Girikini ma azi ’diyi indi ’ba tupi mupi ’diyi ma eselia, muzu Mungu inzizu omu nde ma alia.

21’Ba ’diyi emu Filipo engapi Betesaida Galiliari ma aliari vu, yi zi eri tia kini, Opi, ama le Yesuni ndre,

22Filipo emu e’yoni olu Andarea tia; Andarea pi emu Filipo be e’yoni oluzu Yesu tia.

23Yesu nga e’yo omvi yi tia kini, Etu eca ’bo, ’dini Mvi ’bani ma isu diza ani.

24Ma’yo emi tia ndi ndi, anyaefi ka ’de nyakua, ka dra ku, eri nga ovu a’dule; te eri ka dra ra, eri nga efi ka kakau.

25’Ba i ma idri lepiri, eri nga avi eri dri ra, te ’ba i ma idri ngupi nyaku ’doriari nga eri ma ta mba ecazu idri ’dani ’daniri vu.

26’Ba azini ka azi ’ye ma dri, eri ma bi ma vuti; azini pari mani ovuzuria, ’daa ’ba ma azi ’yepiri nga ovu alu indi; te ’ba azini ka azi ’ye ma dri, ma Atini nga eri inzi ra.

27Curu’do ma asini oti oti ma di ngori ’yo ya? Ata, mi pa ma etu ’dirisi. Te e’yo ’disi ma eca bani etu ’diri vu.

28Ata, mi fe mi ru ma ovu dizaru. O’duko nga di enga ’bua ani, kini, Ma ’ba eri dizaru ’bo, ma nga eri ’ba dizaru dika.

29’Ba ongulumuru pa osopi ogogo, o’duko nde eripi ’diyi, nga di ’yo kini ovi fini. ’Ba azini kini, Malaika ’yo e’yo eri beni.

30Yesu omvi e’yo ’yo ra, O’duko ’diri emuni ma e’yosi ku, te emi ma e’yosi.

31Curu’do e’yo liza nyaku ’diriniri indi, curu’do yi nga ambo nyaku ’dori ma dri cepiri ’be amve.

32Te ma’i, yi ka ma ’du uru, nyaku ma drilesi, ma nga ’ba dria ose ma ngulupi vu.

33Te eri ’yo e’yo ’diri, dra erini ’yezu drazuri ma e’Yo ecezu.

34’Ba ongulumuru omvi e’yo eri tia ani, Ama eri e’yo azita ma alia kini Kristoni ovu ’dani ’dani. Mi ’yo te ngoni ngoni kini yi ma nga Mvi ’bani ’du uru ya? Mvi ’bani ’diri eri a’di’i ya?

35Yesu nga ’yo yi ria ani, Ewu dizani ovuzu nga emi eselia indiri ace were. Emi ad de dizari nga emi vu indi, ini kazu emi isuzu ku; ’ba acipi ini aliari nini pari ini muzuri ku.

36De dizari nga emi vu indi, emi a’i diza nderi, ’dini emi ma oja emi anzi dizaniru beni. Yesu ka e’yo ’diyi ’yo ’bo, eri nga fu yi vurisi, mu i zizu ra.

37Te eri ka tro tali ’ye yi milia kakau ’dopi ti, yi a’ini eri ku;

38’dini e’yo nabi Isayani ’yoleri ma ’ye i paria ani, kini: Opi, a’di a’i e’yo amani olulerini ya? Dri Opini e’da i a’di dri ya?

39Te e’yo ’disi econi yini a’izaru ku, a’disiku Isaya ’yo dika kini,

40Eri obi yi ma mile ci, eri ’ba yi ma asi mbazaru ’bo, yi kazu ndrezu yi ma milesi ku, yi kazu e’yo nizu yi ma asisi ku, i yi kazu yi ojazu mani yi atizu ani i ku.

41Isaya ’yo ndra e’yo ’diri erini diza erini ndrelerisi, erini vini e’yo ’yole erisirisi.

42Ka adri ’dini ti, i ’ba ’waa ma eselia ’ba kakau a’i eri, ra te yi e’dani eri ku ’ba Farisaini ma urisi, yi kazu yi odrozu pari i ’bani yi okuzuria ku:

43te yi le diza ’bani feleniri aga diza Munguni feleniri ra.

44Te Yesu eri nga tre uru ’yo, ra, ’Ba ma a’ipiri, eri a’ini ma ku, te ’ba ma ti epepiri’i.

45Azini ’ba Ima ndrepiri eri ndre ’ba ma ti epepiri.

46Ma emu nyakua diza nyakuniru, ’dini ’ba dria alu alu ma a’ipiri ma ovu ini alia ’dani ku.

47Te ’ba azini ka e’yo mani ’yoleri eri ra, ka tani mba ku, ma lini e’yo erini ku; a’disiku ma emuni e’yo nyakuni lizu ku, te nyaku nde pazu.

48’Ba ma gapi si e’yo mani a’ipi kuri, ’ba e’yo lipi driniari indi; e’yo mani ’yoleri, e’yo nderi nga eri ma e’yo li o’du ewuni asizurisini.

49A’disiku ma ’yoni e’yo ma drisi ku; te Ata ma ti epepiri azi ma dri e’yo mani ngale ’yoleri pi e’yo mani ngale oluleri beni.

50Ma ni ra azita erini eri idri ’dani ’daniri. ’Dini e’yo mani ’yole ’diyi, ma ’yo ekile Atani ’yole ma tia ’borile.

← Chapter 11 Jump to: Chapter 13 →