John 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1De omu agaza ’ba drilesirini eceani nga ku, Yesuni niria etu ini nyaku ’diri kuzu muzu i Ati vuri eca ’bo, erini ’ba ini ovupi nyakua ’diyi leria, eri le yi avasi ’dani kpere asizaniria,

2Yini nyaka ondre beri nyaria, isu ’ba asu supiri ’ba e’yo Yudasi Isikariote Simoni mvi ma asia ’bo, eri ma nya o’di erini eri fezu,

3Yesuni niria i Ati fe afa dria i ma dria ’bo, azini kini i ibi enga Mungu vu, i mu Mungu vu indi,

4eri enga nyaka ondre beri ma tia, eri tro bongo ini ma azi, nga bongo rua lizuri ’du, nga a’di i opilia.

5Eri nga yi osu awala alia, nga ’ba ani ’ba erini imbale ’diyi ma pa oji, yi inizu bongo rua lizu erini a’dile i opiliarisi.

6’Dini eri nga eca Simoni Petero vu; eri ’yo tinia, Opi, mi ma pa oji ya?

7Yesu nga e’yo omvi, ’yo eri tia, E’yo mani ’yeleri mi nini curu’do ku, te mi nga va ndo.

8Petero nga ’yo eri tia, Mi ngani ma pa oji aluni ku kpere ’dani ’dani. Yesu nga e’yo omvi eri tia, Te ma ka mi oji ku, e’yo mini ovuni ma be ku.

9Simoni Petero nga ’yo eri tia, Opi, mi ma oji kiri ma pa a’dule ku, te ma dri ’diyi pi dri be indi fo!

10Yesu nga ’yo eri tia, ’Ba i rua ojipi ’bori leni ojita ku, te kiri pa ojizu’i a’dule, te eri rua dria ovu alaru; emi ovu alaru ra ’bo, te emi dria ku.

11Te eri ni ’ba ngapi eri ma o’di nyapi eri fezuri ra; eri nga ’yo ani, Emi dria ovuni alaru ku.

12Eri ka yi pa oji ’bo, eri nga di bongo ini e’du, nga ri va dika, nga ’yo yi tia, Emi ni e’yo mani ’yele emi vuri ra ya?

13Emi omve ma ’Ba ’ba Imbapiri’i azini Opi’i indi; emi e’yo ’yeke, tema ovu ’dini.

14Te ma’i Opini azini ’Ba ’ba Imbapiri’i, ma ka emi pa oji ra, onyiru emi ma oji emi agyi ma pa emi eselia indi.

15Te ma fe emi dri eceta ’bo, ’dini emi ma ’ye ani ekile mani ’yele emi dririle indi.

16Ma ’yo emi tia ndi ndi, ati’bo ovuni ambo aga opi iniri ku; ’ba ti peleri agani ’ba eri ma ti pepiri ku.

17Te emi ka e’yo ’diyi ni ra, emi ka di yi ’ye ra emi ovu ani drilebaru.

18Ma ’yoni emi dria ma e’yosi ku; ma ni ’ba mani opele ’bo ’diyi ra; te e’yo siza ma ’ye i ani, kini, ’Ba nyaka mani nyapiri ’du i ma paedu uru ma atuzu.

19Ma ’yo emi tia curu’do de nga ’yeni i ku, ’dini e’yoni ka nga i ’ye ra, emi ma a’i di ani ma eri’i beni.

20Ma ’yo emi tia ndi ndi, ’ba ’ba mani ti peleri a’ipiri eri a’i ma’i; azini ’ba ma a’ipiri eri a’i ’ba ma ti epepiri’i,

21Yesu ka ’yo ’dini ’bo, orindi erini nga oti oti, eri nze e’yo eti kini, Ma ’yo emi tia ndi ndi, ’ba alu emi eseliari nga ma o’di nya ma fezu,

22’Ba erini imbale ’diyi ’ba yi ondre milia milia, yini ’ba erini e’yo ’yozu erisiri nile kurisi.

23Isu ’ba erini imbale ’diyi ma azi alu Yesuni lele turi ri mesa tia i atizu Yesu ma agatia;

24Simoni Petero nga e’yo ece eri dri drisi, nga ’yo eri tia, Mi olu ama tia eri a’di ma e’yo ’yo ya?

25’Ba nde, erini i atiria Yesu ma agatia ’dini, nga ’yo eri tia, Opi, eri a’di’i ya?

26Yesu nga e’yo omvi ani kini, Eri ’ba mani enya tizu duzu a’isua fezu eri driri’i. Eri ka enya ti suzu a’isua ’bo, eri nga di eri fe Yudasi, Simoni Isikariote ma mvi dri.

27Enya tiza nderi ma vutia, Satani nga fi eri ma alia. Yesu nga di ’yo eri tia ani, E’yo mini ’yeleri, mi ’ye mbele.

28Te ’ba ripi mesa tia ’diyi ma aluni nini eri ’yo eri tia ’dini a’disi yari ku.

29’Ba azini ega kini Yudasini ovule okporo berisi, Yesu ’yo ani eri tia kini, Mi ie afa amani leleri omuniri; kani ma fe afa azini ’ba alioru dri.

30Eri ka eri va tiza a’i ’bo, eri fu perepere amve de angu bi di ’bo.

31Eri ka fu ’bo, Yesu nga ’yo ra, Curu’do Mvi ’bani isu diza ’bo, azini Mungu ovu vini dizaru eri alia indi;

32Munguni nga eri ’ba ovuzu dizaru i ma ngulupi alia, nga eri ’ba ovuzu dizaru coti.

33Anzi nyiri nyiri, o’du amani ovuzu emi be indiri ace werea. Emi nga ma ndru; te ekile mani ’yole ndra ’ba Yahudini ma tiarile, ’dini ma ’yo vini emi tia curu’do, Pari ma muzuria emi econi emuzaru ku,

34Ma fe emi dri azita o’dini, emi ma le emi emi eselia; mani emi lelerile, emi ma le emi emi eselia ’dinile.

35’Ba dria nga ni ani emi ’ba mani imbale ’diyiru, emini ovule leta ’be emi eselia ’dinirisi.

36Simoni Petero nga ’yo eri tia, Opi, mi mu ngoa ya? Yesu nga e’yo omvi eri tia, Mi econi ma vuti bizaru pari mani muzuria curu’do nga ku; te mi nga ma vuti bi vilerisi ndo.

37Petero nga ’yo eri tia, Opi, econi mani mi vuti bizaru curu’do ku a’disi ya? Ma nga idri mani ku va mi e’yosi.

38Yesu omvi e’yo ra, Mi nga idri mini ku va ma e’yosi ya? Ma ’yo mi tia ndi ndi, de nga a’nata ’beni cere ku, mi nga ma ga si pale na.

← Chapter 12 Jump to: Chapter 14 →