John 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1Ma ’yo emi tia ndi ndi, ’ba fipi lico kabilo vileri ma tilesi ku te tupi geri azinisiri, ’ba nde eri oguouni azini ’ba afa opapiri indi.

2Te ’ba fipi tilenisiri eri ’ba kabilo ocepiri’i.

3’Ba tileni ma agei tepiri nga zi eri drini; kabilo yi nga o’duko erini eri ra, eri omve i ma kabilo ’diyi rusi rusi, eri ce yi dri amve.

4Eri ka kabilo ini ofu dria amve ’bo, eri mu yi drilia, kabilo nga eri ma vuti bi, yini eri ma o’duko nile rarisi,

5Yi ngani ani’bo ma vuti bi ku, te yi nga apa erisi, yini o’duko ani’bani nile kurisi.

6Yesu ’yo e’yo o’beza ’diri yi tia, te yi vani e’yo erini ’yole yi tia ’diyi ma eli ku.

7Yesu nga ’yo ani yi ria dika kini, Ma ’yo emi tia ndi ndi, ma jotile kabiloniri ma’i.

8’Ba dria emupi ma drilia oko ’diyi yi ogouni azini ’ba afa opapi ’diyi; te kabilo erini yi ku.

9Ma jotileni; ’ba azini ka fi ma vurisi, eri nga i pa ra; eri nga fi eri nga fu, eri nga iribi isu ra.

10Oguou emuni e’yo azinisii ku, emu kiri oguzu, ’ba ’dizu, ’ba dri jazu a’dule; te ma emu yi ma ovu ani idri be, yi ma ovu eri be tu aga ra.

11Ma ’ba kabilo ocepi bari. ’Ba kabilo ocepi bari idri ini ku kabilo ma e’yosi.

12’Ba azi ngapi oyasi ovupi ’ba kabilo ocepiri’i ku, kabiloni ovuzu eri ma ngulupini kuri, erini ’balau ndreta emuria eri ku kabiloni, eri apa apa, ’balauni nga yi obi, nga yi ere ra.

13Eri apa erini ovule kiri ’ba azi ngapi oyasiri’irisi, azini kabilo ma e’yoni eri vale kurisi.

14Ma ’ba kabilo ocepi bari; ma ni kabilo mani ra, mani ’diyi ni vini ma ra,

15ekile ma Atini ma nile ra, mani vini ma Atini nilerile; azini ma idri mani ku kabilo ma e’yosi.

16Kabilo azini mani indi ovupi kabilo jo ’dirini ku ’diyi; le ma ma eji yi indi, yi nga o’duko mani eri ra. Ngulumuniri nga ovu alu, ’ba ocepiri alu.

17E’yo ’dirisi ma Ati le ma ra, mani idri mani kule va, ’dini ma ma e’du eri dika benirisi.

18’Ba aluni pani idri mani ma driasi ku, te ma ’ba eri va ma drisi ceni. Ma okpo indi eri ’bazu va, azini ma okpo indi eri e’duzu dika. Azita ’diri ma a’i ma Ati dri,

19Agata nga efu dika ’ba Yahudini ma eselia e’yo ’diyisi.

20’Ba karakarau yi eselia ’yo ra, Eri orindi onzi be, eri aza aza; emi eri eri a’disi ya?

21’Ba azini yi ’yo ra, E’yo ’diyi ovuni ’ba orindi onzi berini ’yoleniri’i ku. Orindi onzi eco ’ba mile kokoruri ma mile zizaru ra ya?

22O’du ’dasi omu hekalu fezu Mungu driri Yerusalemua indi;

23isu eri ewu anguni ambizuri; azini Yesu aci hekalua Sulemani ma jobileko enasi.

24’Ba Yahudini ace eri agei kuru ani, nga ’yo eri tia kini, Mi fe nga ama asini aba ewu ngopi ya? Mi ka ovu Kristo’i, mi olu ama tia mgba.

25Yesu nga e’yo omvi yi tia kini, Ma-olu emi tia ra, te emi a’ini ku. ’Yeta mani ’yele ma Ati ma rusi ’diyi yi nze e’yo eti masini;

26te emi a’ini ku, emini ovule kabilo mani kurisi,

27Kabilo mani yi o’duko mani eri ra, ma ni yi ra, yi ma vuti bi indi;

28azini ma fe yi dri idri ’dani ’daniri; yi ngani dri ja ’dani ’dani ku, azini ’ba aluni ngani yi pa ma dria okposi ku.

29Ma Ati yi fepi ma driri aga dria; ’ba aluni ecopi vini yi papi ma Ati ma dria okposini yo.

30Ama ma Ati be alu.

31’Ba Yahudini nga di ani o’du dika eri o’bezu.

32Yesu nga e’yo omvi yi tia kini, Ma ece emi dri ’yeta onyi be kakau engapi ma Ati vu ’diyi; ’yeta ’diyi ma eselia emini ma o’bezu ani onisiri ngori ya?

33’Ba Yahudini nga e’yo omvi eri tia kini, Ama o’beni mi ’yeta onyi berisi ku, te o’datasi; te mi’i, de mi ’bani, tinini mi ’bale Mungu’irisi.

34Yesu nga omvi yi tia kini, Eri ovuni sizaru azita emini ma alia kini, Ma ’yo ra, emi munguni, ’dini ku ya?

35Te eri ka ’ba e’yo Mungunini ecazu yi vu ’diyi omve munguru (te e’yo siza econi ovuzaru i toko ku),

36emi di ’yo ’ba Atani ’bale alatararu, tini epele nyakuari ma e’yosi kini, Mi a’data o’da, ’dini, mani ’yale, Ma Mungu ma Mvi’i-risi ya?

37Ma ka ’yeta ma Atini ’ye ku, emi ma a’i ma ku;

38te ma ka yi ’ye ra, emi ka ma a’i ku ti, emi ma a’i ’yeta nde ’diyi; emi ma ni, emi ma va indi kini Ata eri ma alia, azini ma ovu Ata alia indi.

39Yi ndru eri bizu dika, te eri fu yi driasi ra.

40Eri fu mu dika Yoridani ma tia ’aa’dasi, pari ndra Yohanani baputizi fezu okoria, eri ovu ’daa.

41’Ba karakarau emu vunia; yi nga ’yo kini, Yohana ’yeni eceta aluni ku, te e’yo dria Yohanani ’yale ’ba ’diri ma e’yosi ’diyi yi adaru.

42’Ba karakarau a’i eri ’daa.

← Chapter 9 Jump to: Chapter 11 →