John 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1Te Yesu mu oni Mizeituni dria.

2O’biti kula kula eri mu hekalua dika; ’ba ongulumuru dria emu eri vu, eri nga ri va yi imbazu.

3’Ba waraga sipi ’diyi ’ba Farisaini be nga oku alu yini bile ali ’bariari eji eri vu; yi ka eri fe pa sozu yi eselia,

4yi ’yo eri tia, ’Ba ’ba Imbapiri, yi bi oku ’diri erini ali ’baria birri.

5Isu azita alia Musa azi ama dri ’ba ’dinile ’diyi o’bezu onisi. Te mi te ’yo ngoni eri ma e’yosi ya?

6Yi ’yo e’yo ’diri eri o’bizu, yi ma isu e’yo azini asu suzu eri ma ruaa beni. Te Yesu avu va, si nyaku dria i dri drilesi,

7Te yi ka zi eri tia ’dani, eri edre i uru, nga ’yo yi tia, ’Ba emi eselia azi onzi kokoruri ma ’be eri onisi okoni.

8Eri avu va, si nyaku dria i dri drilesi dika,

9’Ba ’diyi ka eri ’bo, yi ’ba fu amve alu alu, e’dozu ’ba mbazaru ’diyisi cazu ’ba acepi vile ’diyisi, yi ku Yesu pi a’dule oku te pa sopi agaduari be.

10Yesu edre i uru, nga ’yo eri tia, Oku, yi ngoa ya? ’Ba aluni e’yo lipi mi dria onzini yo ya?

11Eri kini, ’Ba aluni yo, Opi. Yesu nga ’yo, Ma’i indi, ma lini e’yo mi dria onzi ku; mi mu, te mi asi e’yo onzi ’ye dika ku.

12Yesu ’yo yi tia dika, kini, diza nyakuni; ’ba ma vuti bipiri acini ini alia aluani ku, te eri ovu diza idriniri be.

13’Ba Farisaini nga di ’yo eri tia, Mi e’yo eti nze misi; e’yo mini etini nzeleri ovuni adaru ku.

14Yesu nga e’yo omvi ’yo yi tia, Ma ka tro e’yo eti nze masi ti, e’yo mani etini nzeleri eri adaru, a’disiku ma ni pari mani engazuri pi pari mani muzuri be ra; te emi nini pari mani engazuri ku, kani pari mani muzuri ku indi.

15Emi e’yo li ruasi; ma lini ’ba aluni ma e’yo ku.

16Te ma ka di e’yo li, e’yo mani lileri eri e’yo adani, a’disiku ma ovuni a’dule ku, te ma’i Ata ma ti epepiri be.

17Azini vini azita emini alia eri ovu sizaru kini e’yo eti ’ba iri ’diyini nzeleri eri adaru.

18Ma’i ma e’yo eti nze masi, Ata ma ti epepiri eri vini e’yo eti nze masi indi.

19Yi nga di ’yo eri tia ani, Mi Atini ngoa ya? Yesu omvi e’yo kini, Emi nini ma ku, emi nini vini ma Atini ku indi; emi ka te ma ni ra, te’do emi ni ma Atini indi.

20Eri ’yo e’yo diyi pari ’bani adrizu silingi ta mbazuria, erini ’ba imbaria hekalua; te ’ba aluni bini eri ku, eri ma etuni ecale nga kurisi.

21Eri nga di ’yo yi tia dika, Ma mu ra, te emi nga ma ndru ti, emi nga dra e’yo onzi emini ma alia; econi emini muzaru pari mani muzuria ku.

22’Ba Yahudini nga di ’yo, Eri nga i fu ceni ya, erini ’yole kini, Emi econi muzaru pari mani muzuria ku, ’dinirisi?

23Eri nga ’yo yi tia, Emi ’ba valeru ’diyi, ma ’ba uruleruni; emi ’ba nyaku ’dorini, ma ’ba nyaku ’dorini yo.

24Ma ’yo te emi tia ani kini emi nga dra e’yo onzi emini ’diyi ma alia; te emi ka a’i ma eri’i ku emi nga dra e’yo onzi emini ’diyi ma alia ra.

25Yi nga di ’yo eri tia, Mi a’di’i ya? Yesu ’yo yi tia, Bani e’yo mani e’dole ’yole emi tia okokeleri’i.

26Ma ovu e’yo be kakau ’yozu azini lizu emi dria; te ’ba ma ti epepiri eri ’ba adani, ma e’yo mani erile eri vu ’diyi olu nyaku ma tia’i.

27Yi nini eri Ata ma e’yo ’yo yi tia ku.

28Yesu nga ani ’yo, Emi ka Mvi ’bani ’du uru ’bo, emi nga di ni kini ma eri’i, azini ma ’yeni afa aluni ma drisi ku, te ma e’yo ’diyi ’yo ekile ma Atini ma imbalerile.

29’Ba ma ti epepiri eri ovu ma be; eri kuni ma a’dule ku, mani e’yo ovupi onyiru eri ma milia ’diyi ’yele etuzurisi.

30Erini e’yo ’diyi ’yoria, ’ba karakarau nga eri a’i ra.

31Yesu nga di ’yo ’ba Yahudini eri a’ipi ’bo ’diyi ma tia, Emi ka ovu e’yo mani alia ’dani, ’dini emi nga ovu ’ba mani imbale ’diyiru ndi ndi;

32emi nga e’yo adaru ni, e’yo adaru nderi nga emi otru ra,

33Yi nga e’yo omvi eri tia, Ama Iburahimu ma ori, engazu drio ama ovuni nga ’ba aluni ma ati’baru ku, Mi ’yo, Emi nga ovu truzaru, ’dini ngoni ngoni ya?

34Yesu nga e’yo omvi yi tia, Ma ’yo emi tia ndi ndi, ’ba dria alu alu e’yo onzi ’yepiri eri ovu ati’bo e’yo onziniri.

35Ati’bo ovuni joa ’dani ’dani ku, te mvini ovu joa ’dani ’danini,

36Ka’dini Mvi ka emi truni, emi nga ovu truzaru ndi ndi.

37Ma ni ra emi ovu Iburahimu ma ori; te emi geri ndru ma fuzu, e’yo manirini pari isule emi alia kurisi.

38Ma e’yo mani ndrele ma Ati vu ’diyi ’yo’i, emi alu indi emi e’yo emini erile emi ati vu ’diyi ’ye’i.

39Yi nga e’yo omvi, ’yo eri tia, Ata amani eri Iburahimu’i. Yesu ’yo yi tia, Emi ka te ovu anzi Iburahimuni, te’do emi azi Iburahimuni’ye’i,

40re curu’do emi geri ndru ma fuzu, ma’i agu e’yo ladaru mani erile Mungu vuri ’yopi ’emi tiari; Iburahimu ’yeni ndra ’dini ku.

41Emi ’yeta emi atini ’yeo Yi ’yo eri tia, Ama ovuni alianzini ku; ama Atini alu, Mungu’i.

42Yesu nga ’yo yi tia, Mungu ka te ovu emi Ati’i, emi te ma le a’disiku ma enga Mungu vu ma eca ’do’i; te ma emuni vini ma drisi ku, te eri pe ma tini.

43Emi vani ma ti ku a’disi ya? Emini ecole e’yo mani erile kurisi.

44Emi ovu emi ati ’ba asu supiri ma anzi, emi asi le li emi mtini ye indi. Engazu okokele eri ’ba ’ba fupiri, eri soni pa e’yo adaru ma alia ku, e’yo adaruni ovule eri ma alia kurisi. Eci ka e’yo inzoni ’yo, eri e’yo i ma ngulupini ovuzu eri beri ’yo’i, erini ovule ’ba inzo lipiri’i, azini inzo ma atinirisi indi.

45Te mani e’yo adari ’yolerisi, emi a’ini ma ku.

46Emi eselia ’ba asu supi ma ruaa e’yo onzini ma ndezu rari a’di’i ya? Ma ka e’yo adaru ’yo, emi a’ini ma ku a’disi ya?

47’Ba ovupi Munguniri adri e’yo Munguni eri raj e’yo ’disi emi erini ku, erruni ovule ’ba Munguni kurisi.

48’Ba Yahudini nga e’yo omvi ’yo eri tia, Ama ’yoni kini mi ’ba Samariani, azini mi orindi onzi be, ’diniri ’yeke ku ya?

49Yesu nga e’yo omvi, Ma ovuni orindi onzi be ku; te ma Atini inzi, te emi’i, emi inzini ma ku.

50Te ma ndruni diza maniri ku; ’ba alu e’yo ndrupi lipiri indi.

51Ma ’yo emi tia ndi ndi, ’Ba e’yo mani ma ta mbapiri ngani dra ndre ’dani ’dani ku.

52’Ba Yahudini nga ’yo eri tia, Curu’do ama ni ra mi orindi onzi be. Iburahimu dra ra, nabi pie; te mi kini, ’Ba ka e’yo mini ma ta mba ra, eri ngani dra ma aji ’bi ’dani ’dani ku.

53Mi ambo aga ama a’bi Iburahimu drapiri rari ra ya? Nabi yi odra indi! Mi ngulupi ’ba mi a’duru ya?

54Yesu nga e’yo omvi, Ma ka diza fe ma ngulupi dri, diza maniri eri toko; te ma Atini diza fe ma drini, eri’i emini ’yole eri Mungu eminiri’i

55De emi nini eri ku; te ma ni eri ra.! Ma ka te ’yo ra Ma nini eri ku, ma te nga ovu emile ’ba inzo lipiriru te ma ni eri ra, ma e’yo erini ma ta mba indi.

56Emi a’bi Iburahimu eri ovu ndra ayikosi erini o’du mani ndrelerisi; eri ndre ra, eri ovu ani ayikosi.

57’Ba Yahudini nga di ’yo eri tia, Eli mini cani nga kali towi ku ’di, te mi ndre Iburahimuni ra ya?

58Yesu nga ’yo yi tia, Ma ’yo emi tia ndi ndi, de nga Iburahimu osini ku, ma indi.

59Yi ’ba oni o’du eri o’bezu ani; te Yesu zi ira, fu hekaluarisi amve.

← Chapter 7 Jump to: Chapter 9 →

Recommended Reading

Commentary John Commentaries → Devotional John Devotional Guide → Get This Bible Lugbara (E’yo Siza Alatararu Munguniri BIBLIA) Study Bible →