John 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1E’yo ’diyi ma vutia omu ’ba Yahudini nga ovu indi; Yesu nga tu mu Yerusalemua ani.

2Isu de ’bile yini egazu aleniari lindi Yerusalemua kabilo vile kalitilia, yini omvele ’ba Yahudini ma tisi Betesida’iri, eri ovo jobileko eti be towi.

3’Ba azoru karakarau yi adri la jobileko eti ’diyia, ’ba mile odraza piyi, ’ba acozaru ’diyi pie, ’ba rua ondripi ondri ’diyi pie, yini osaza yini teria.

4Te ewu alu alu azinisi malaika Opiniri adri esi fi ’bile yini egazuria, fezu yini adizu; ka’dini ’ba fipi yia adiza ma vutia okori ma ruani nga eca alaru ra, azo ka ovu ngoni ti.

5Agu azini ’daa indi ovupi dra erini be eli kali na drini arori.

6Yesu ka ndre erini laria, erini niria ewu aga drinia izuru, eri ’yo eri tia, Mi le mi rua ma eca alaru ra ya?

7Agu rua azo beri nga e’yo omvi eri ria, Opi, yi ka adi ra, ’ba mani ma ’bepi yi egaza ma aliani yo, te mani nga emuria, ’ba azini nga si va mani oko.

8Yesu nga ’yo erini ria, Mi enga uru, mi ’du pari mini, mi aci.

9Perepere agu nde ma rua nga eca alaru ra, eri ’du pari erini, eri ’ba ad aci. De o’du ’dari sabatoni.

10E’yo ’disi ’ba Yahudini nga ’yo ’ba rua atizari ma ria, Andru o’du sabatoni, azita a’ini mini pari ’duzu ku.

11Te eri nga e’yo omvi yi ria, ’Ba ma rua atipi alaruri ’yo ma ria, Mi ’du pari mini, mi acirini.

12Yi zi eri ria, Agu ’yopi mi tia, Mi ’du pari mini, mi aciri a’di’i ya?

13Te ’ba ruanini atileri nini eri a’di’i yari ku; isu de Yesu nga ’daarisi ra, ’ba karakarauni ovule ’daa cirisi.

14Vilerisi Yesu nga eri isu hekalua, nga ’yo eri ria, Mi ndre, mi rua ati alaru ’di! Mi ma ’ye onzi dika ku, afa onzi agapiri kazu i ’yezu mi ruaa ku.

15Agu ’diri nga mu ’yo ’ba Yahudini ma ria kini ’ba i rua atipi alaruri eri Yesu’i.

16E’yo ’disi ’ba Yahudini e’do Yesuni inza, erini afa ’diri ’yele o’du sabatonisirisi,

17Te Yesu nga e’yo omvi yi ria, Ma Atini azi nga kpere curu’do, ma azi nga alu indi.

18E’yo ’disi ’ba Yahudini ndru eri fuzu aga okori ra, a’disiku erini e’yo sabatoni ezale a’dule kurisi, erini vini Mungu omvele i Ati’i, i ’bazu Mungu be trotrorisi.

19E’yo ’disi Yesu nga e’yo omvi ’yo yi tia, Ma ’yo emi tia ndi ndi, Mvi econi afa aluni ’yezaru i drisiku, te kiri afa erini ndrele Atani ’yeleri’i; te afa dria erini ’yele ’diyi, Mvini ’ye alu indi.

20Te Ata le Mvini, eri ece eri dri afa dria eri ma ngulupini ’yele ’diyi ra; eri nga eri dri azi ambo azi nde agapi ra ’diyi ece indi, emi asi ma osu ani.

21Ekile Atani ’ba draza engale idri fezu yi dririle, ’dinile indi Mvini, idri fe ’ba eri ma asini lele ’diyi ’dri,

22Te Ata lini e’yo ’ba aluni ma dria ku, te eri fe e’yo liza dria Mvi dri ’bo,

23’dini ’ba dria ma inzi Mvini ani, yini Atani inzilerile. ’Ba Mvini inzipi kuri inzini Ata eri ma ti epepiri ku.

24Ma ’yo emi tia ndi ndi, ’ba e’yo mani eripi, ’ba ma ti epepiri a’ipi indiri, ovu idri ’dani ’dani be, eri fini e’yo liza ma alia ku, te eri aga dra ma aliasi fi idri ma alia ’bo.

25Ma ’yo emi ria ndi ndi, etuni emu emu, eca di curu’do ’bo, eri etu ’ba draza ’diyini ngazu Mungu Mvi ma o’duko erizuri’i, te ’ba eripi ’diyi nga ovu idri be.

26Ekile Atani ovule idri be i ma ngulupisirile, ’dini eri fe vini Mvini ovuzu idri be i ma ngulupisi indi,

27azini eri fe okpo eri dri e’yo lizu, erini ovule Mvi ’banirisi.

28Emi asi ma osu e’yo ’dirisi ku; te etuni emu ra, etu ndesi ’ba dria ovupi nyadria ’diyi nga o’duko erini eri ra,

29yi di nga efu ra, ’ba azi onyiru ’yepi ’diyi nga fi engata idriniria, te ’ba azi dri fupi kuri ’yepi ’diyi nga fi engata e’yo lizaniria.

30Ma econi afa ’yezaru ma drisi aluni ku; ma e’yo li ekile mani erilerile; e’yo mani lileri eri kililiru, mani e’yo ma asini leleri ndrule ku te e’yo ’ba ma ti epepirini leleri ndrule’irisi.

31Te ma ka e’yo maniri ma eti nze, e’yo eti nzeza maniri ovuni adaru ku;

32’ba e’yo mani ma eti nzepiri eri ’ba azini, ma ni ra e’yo eti nzeza erini nzele masiri eri adaru.

33Emi pe ojiou ti Yohana vu, eri nze e’yo adaruri ma eti ’bo.

34Te e’yo eti nzeza mani a’ileri engani ’ba vu ku; te di ma e’yo ’diyi ’yo, emi ma ovu pazaru ani beni.

35Eri ovu tala ’izaru diza dipiri’i, emi asi le ndra ovuzu ayikosi ewu weresi diza erini ma alia.

36Te e’yo eti nzeza mani ovuzu eri beri aga Yohananiri ra; te azi Atani fele ma dri mani yi dezu ani, azi nde mani ’yele ’diyi yi e’yo mani ma eti nzeni, kini Ata epe ma tini.

37Ata ma ti epepiri eri nze e’yo mani ma eti ’boo Engazu drio emi erini nga eri ma o’duko ku, emi ndreni vini wura erini ku indi;

38emi ovuni e’yo erini be emi alia ku, emini ’ba erini tini epeleniri a’ile kurisi.

39Emi ndru e’yo siza ma alia, emini egale kini emi idri ’dani ’dani isu yi ma aliarisi; te e’yo siza nde ’diyi yi e’yo mani ma eti nzeni;

40te emi leni emu ma vu emini idri isuzu ku.

41Ma a’ini inzita ’ba vu ku.

42Te ma ni emi ra, kini emi ovuni leta Munguni be emi alia ku.

43Ma emu ma Ati ma rusi ’bo, te emi a’ini ma ku; ’ba azini ka emu i ma ngulupi ma rusi, emi nga eri a’i ra.

44Emi ’ba inzita a’ipi emi eselia ceni ceni ’diyi, emi eco ovuzaru a’ita be ngoni ngoni ya, de emi ndruni inzita engapi Mungu aluri vuri ku ya?

45Emi ma ega ma nga asu su emi ruaa Ata vu ’dini ku; ’ba asu supi emi ruaari Musa emini asi ’bale driniari’i.

46Te emi ka Musani a’i ra, emi te ma a’i indi, a’disiku eri si e’yo mani.

47Te emi ka e’yo siza eriniri a’i ku, emi nga e’yoi ’yoza mani a’i ngoni ngoni ya?

← Chapter 4 Jump to: Chapter 6 →