John 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Te Opi ka ni ra kini ’ba Farisaini eri kini Yesu oja ’ba kakau ’ba ini imbale ’diyiru aga Yohanani ra’i fe vini baputizi indi

2(te Yesu ma ngulupi adrini baputizi fe ku, te ’ba erini imbale ’diyi feni),

3eri ku Yudia, fu mu Galilia dika.

4Le eri ma aga trei Samariaasi.

5’Dini eri mu aku Samariaa omvele Sikari, ovupi angu Yakoboni mira fele i mvi Yusufu driri vu ogogoria.

6Yi a’di Yakoboniri ’daa indi; ’dini Yesuni andele tu erini acilerisi, ri di yi a’di ma tia. Isu de etu eca aziale.

7Oku Samariaari nga emu yi ku. Yesu nga ’yo eri tia, Mi fe ma dri yi mvu.

8De ’ba erini imbale ’diyi mu akua nyaka jezu ’bo.

9Oku Samariaari nga ’yo tinia ani, Mi’i, mi ’ba Yahudini, mi zi yi mvuza ma’i oku Samariouru ma tia ngoni ngoni ya? Te ’ba Yahudini piyi iyi adrini yi eci ’ba Samariaa ’diyi be ku.

10Yesu nga e’yo omvi, ’yo eri tia kini, Mi ka te feta Munguni pi ni, ’ba ’yopi mi tia, Mi fe ma dri yi mvu ’diniri eri a’di’i yari be ra, te’do mi zi eri tia azini eri fe mi dri yi idriniri ’bo.

11Oku nga ’yo eri tia, Opi, afa mi dri yi ekozuni yo, yi a’di ovu ’bile alirua; mi di ani yi idriniri isu ngoa ya?

12Mi aga ama a’bi Yakobo, ndra yi a’di ’diri fepi ama dri, eri ma ngulupi yi mvupi alenia, anzi pie, anyapa erini pieri ra ya?

13Yesu nga e’yo omvi ’yo tinia, ’Ba dria alu alu yi ’diri mvupiri, yi avijoni nga eri fu dika,

14te ’ba ka yi mani ngale fele eri driri mvu ra, yi avijo ngani eri fu ’dani ’dani ku; te yi mani ngale fele eri driri nga eca eri alia yi a’di egapi ega kpere idri ’dani ’daniri vuriru.

15Oku nga ’yo eri tia, Opi, mi fe ma dri yi ’diri, yi avijo kazu ma fuzu ku, ma kazu emuzu yi kozu kpere ’doa ku.

16Yesu nga ’yo eri tia, Mi mu agupi mini omve, mi emvi ’doa ndo.

17Oku nga e’yo omvi, ’yo eri tia, Ma agupi yo. Yesu nga ’yo eri tia, Mi ’yo, Ma agupi yo-ri ’yeke;

18a’disiku mi ale ndra agupi towi ’bo, mini ovuzu eri be curu’dori eri agupi mini yo; e’yo ’diri mi ’yo te adaru.

19Oku nga ’yo eri tia, Opi, ma va ra mi nabini.

20A’bi amani adri ndra Mungu inzi oni ’doria; te emi ’yo kini pari ecopi onyiru ’bani Mungu inzizuri eri Yerusalemu’i.

21Yesu nga ’yo eri tia, Oku, mi a’i ma, etuni nga eca Ira, etu ndesi emi ngani Atani inzi oni ’diria ku, kani Yerusalemua ku indi.

22Emi inzi afa emini nile kuri’i; ama inzi afa amani nile rari, te pata enga ’ba Yahudini vu.

23Te etuni nga emu ra, eca di curu’do ’bo, etu ndesi ’ba inzipi asi adarusi ’diyi nga Atani inzi orindisi azini asi adarusi; te Atani ’ba eri inzipi ’dinile ’diyi ndru.

24Mungu eri Orindini; ’ba eri inzipi ’diyi ma inzi eri orindisi azini asi adarusi.

25Oku nga ’yo eri tia, Ma ni ra Mesiani emu ra (yini omvele Kristo’iri); eri ka emu ra, eri nga afa dria ma e’yo olu ama tia.

26Yesu nga ’yo eri tia, Ma e’yo ’yopi mi tiari, ma eri’i.

27’Di ma vutia coti ’ba erini imbale ’diyi eca ra. Yi nga osu osu erini e’yo ’yole oku berisi, te ’ba aluni ’yoni, Mi a’di ndru ya? kani, Mi e’yo ’yo eri be a’disi ya? ’dinini ku.

28Oku nga imvu erini ku ani, nga fu mu aku amborua, nga ’yo ’ba nde ma tia,

29Emi emu ’ba afa dria mani ’yele ra ’diyi ma e’yo olupi ma tiari ndre. ’Ba ’diri eri Kristo’i yani?

30Yi efu akuasi, yi emu eri vu.

31E’yo ’diri ma eselia ’ba erini imbale ’diyi nga zi eri kini, Rabi, mi nya fo.

32Te eri ’yo yi tia, Nyaka mani nyazaru emini nile kuri indi.

33Te ’ba erini imbale ’diyi ’ba e’yo ’yo yi eselia, ’Ba azini eji nyaka eri dri ra ya?

34Yesu nga ’yo yi tia, Mani e’yo ’ba ma ti pepirini leleri ’yezu, azi erini dezuri, eri nyaka mani.

35Emi ’yoni kini, Ace mba su, ewu anya lozuri nga eca ra, ’dini ku ya? Te mi ndre, ma ’yo emi tia, Emi enga emi mile uru, emi ndre amvu, ’du drile ’wi curu’do lozaru ’bo.

36’Ba anya lopiri adri oya ini isu ra, eri efi kaza oku cazu idri ’dani ’daniria, ’dini ’ba ori ripiri ’ba anya lopiri be ma ovu ayikosi tualu.

37E’yo ’diri ma alia e’yo o’bezani eca adaru, kini, ’Ba aluri ori ri, ’ba aziniri anya lo.

38Ma pe emi ti anya emini azini ngale emi’i kuri lozu; ’ba azini yi nga azini, te emi fi azi yini ngaleri ma alia ’bo.

39’Ba Samariaa ’diyi ma azi kakau a’i eri e’yo eti okuni nzele eri ma e’yosi kini, Eri olu ma tia e’yo dria mani ’yele ’diyi rarisi.

40’Ba samariaa ’diyi ka emu eri vu, yi nga di a’i tinia ovuzu yi be; eri nga di ovu ’daa o’du iri.

41’Ba azini karakarau yi a’i eri e’yo ’yoza erinisi,

42Yi ’yo oku tia kini, Curu’do ama a’i ra e’yo mini ’yolerisi ku, te ama ngulupi eri amani ’bo, ama ni ra adaru ’ba ’diri eri ovu ’Ba ’ba nyakua ’diyi Opapiri’i ndi ndi.

43O’du iri ma vutia eri fu ’daasi mu Galilia.

44Te Yesu ma ngulupi nze e’yo eti kini, nabi ovuni inzizaru angu inia ku.

45Eri ka eca Galilia ’bo, ’ba Galilia ’diyi a’i eri ra, yini afa dria erini ’yele Yerusalemua omu ma alia ’diyi ndrelerisi; te yi alu indi, yi mu ndra omu ndea.

46Eri nga di ca dika Kana Galilia pari erini yi ojazu patiefi sururia. ’Ba alu ovupi meleki ageiari indi, mvi erini ovu azoru Kaperinaumua.

47Eri ka eri kini Yesu enga Yudiaarisi fi Galilia ’bo, eri mu vunia nga matu ’ba eri vu eri ma si va i mvi ma rua atizu, erini ’yele ebile ebirisi.

48Te Yesu nga ’yo eri tia ani, Emi ka eceta piyi ndre tali be ku, emi ngani a’i aluni ’de ku.

49’Ba ovupi meleki ageiari nga ’yo eri tia, Opi, mi si mu de nga mva mani drani ku fo!

50Yesu nga ’yo eri tia, Mi mu; mi mvini idriru. Agu nde a’i e’yo Yesuni ’yole i tiari ra, mu ra.

51Erini nga muria siria andraleru, ati’ba erini nga dri fu eri be, kini eri ma mvini idriru,

52Eri nga etu mva ma ruani ’bazu atizuri zi yi ria, Yi ’yo eri tia, Aje etu aziri rua driza ku eri ra.

53Atani nga ni ani etu nderi eri etu Yesuni ’yozu eri tia, Mi mvini idriruri’i; eri a’i eri ra, eri’i ’ba i vile joa ’diyi be dria.

54’Di tali Yesuni iriri, erini engaria Yudiaasi efiria Galilia ’boria.

← Chapter 3 Jump to: Chapter 5 →