John 11 — Lugbara (E’yo Siza Alatararu Munguniri BIBLIA)

1Agu alu eri ndra azoru, runi Lazaro Betaniari, aku nderi! Mariamu pini amvi Marita beri’i.

2Mariamu ’diri Opi ma rua efipi odusi eri ma pa inipi dribisiri’i; Lazaro azo beri eri ma adri’i.

3E’yo ’disi amvipi erini pe ani ’ba’i ti eri vu ’yozu, Opi, mi ndre, ’ba mini leleri eri azoru,

4Te Yesu ka e’yo eri ra, eri ’yo ra, Azo ’diri eri ’bani drazuri’i yo, te diza Mungunisi, Mvi Munguni ma isu diza erisi ani beni.

5Te Yesu le Marita pi, amvi be, Lazaro pie avasi.

6Eri ka eri ani kini eri azoru, eri ovu di pari erini ovuzuria o’du iri.

7Vilerisi eri nga di ’yo ’ba erini imbale ’diyi ma ria, Ama mu Yudiaa dika.

8’Ba erini imbale ’diyi nga ’yo eri ria, Rabi, curu’do ’ba Yahudini yi ndru mi o’bezu onisi yare; mi mu ’dale dika ya?

9Yesu nga e’yo omvi, Etu o’du aluni ovuni mudri drini iri ku ya? ’Ba ka ad etusi, kumu ngani eri pa si ku, erini diza nyaku ’dirini ndrelerisi.

10Te ’ba ka aci inisi, kumuni nga eri pa si ra, dizani ovule eri alia kurisi.

11Eri ’yo e’yo ’diyi ra, te vilerisi eri ’yo yi tia, Ama agyi Lazaro ko o’du ’bo, te ma mu ra ma ma enga eri o’duasi beni.

12’Ba erini imbale ’diyi nga ’yo tinia ani, Opi, eri ka o’du ko ra, eri nga i pa ra.

13Isu de Yesu ’yo drata erini ma e’yo, te yi ega kini eri ava liza o’du kozasiri ma e’yo ’yo’i.

14Yesu nga di ’yo ani yi tia mgba kini, Lazaro dra ’bo.

15Ma ovu ayikosi emisi mani ovule ’daa kurisi, ’dini emi ma a’i ani beni; te ama mu di eri vu.

16Toma ’bani omvele Ejoruri ’yo ani i agyi Yesuni imbale ’diyi ma tia, Ama mu alu indi, amai ma odra eri be.

17Te di Yesu ka eca ra, eri isu de eri la gulea ca o’du su ’bo.

18Isu Betani ovu inyia Yerusalemu vu ogogo ekile mailo iri ’dipile

19’ba Yahudini kakau emu Marita pi vu Mariamu be, yi asi omizu adripi yini ma e’yosi.

20Marita ka eri kini Yesuni emu emu, eri nga mu dri fu eri be, te Mariamu ri nga ini joa ’dani.

21Marita nga ’yo Yesu tia ani, Opi, mi ka ndra ovu ’doa, te’do adripi mani drani ku.

22Te di curu’do ma ni ra kini e’yo ngoni ngori mini a’ile Mungu driri, Munguni nga fe mi drini.

23Yesu nga ’yo eri tia, Mi adrini nga enga dika.

24Marita nga ’yo eri tia, Ma ni ra eri nga enga dika engata o’du ewuni asizurisiri ma alia.

25Yesu nga ’yo eri tia, Ma engatani, ma idrini indi; ’ba ma a’ipiri, ka dra ti, eri nga ovu idriru;

26azini ’ba ovupi idriru ma a’ipiri ngani dra ’dani ’dani ku. Mi a’i ’diri ra ya?

27Eri nga ’yo eri ria, E Opi; ma a’i ra kini mi Kristo, Mvi Munguni, emupi nyakuari’i.

28Eri ka e’yo ’diri ’yo ’bo, eri nga fu mu i amvi Mariamuni omve ndindiru, kini, ’Ba ’ba Imbapiri eri ’doa ’do, eri mi omve.

29Eri’i eri ka eri ra, eri enga mbele, mu vunia.

30Te Yesu ecani nga de akua ku, te ovu nga ’dani pari te yini dri fuzu Marita beria.

31’Ba Yahudini ovupi Mariamu be joa, eri ma asi omipi ’diyi, ka eri ndre engaria mbele furia, yi bi eri vuti, yini osuria yi asia kini eri mu wuzu gulea ’daa.

32Mariamu ka eca ani pari Yesuni ovuzuria, eri eco i va Yesu ma palaa, kini, Opi, mi ka ndra ovu ’doa, te’do adripi mani drani ku.

33Yesu ka di ndre erini wuria, azini ’ba Yahudini emupi eri be ’diyini wuria indi, candi ga eri ma orindia tre, asini nga ota ota;

34eri ’yo ra, Emi ’ba eri ngoa ya? Yi ’yo eri tia, Opi, mi emu ndre.

35Yesu nga wu mindresi.

36’Ba Yahudini nga ’yo ani, Mi ndre, le eri’doni!

37Te ’ba azini yi eselia ’diyi ’yo ra, ’Ba ’ba mile kokoruri ma mile zipi ’diri, econi ndra erini e’yo ’yezaru ’ba ’dirini drazu ku, ’dinini ku ya?

38De candini garia eri ma asia tre ’dini, Yesu nga ca gulea. Eri ovu oni ojini, gu oni tilenia ci.

39Yesu ’yo ra, Emi gu oni amve. Marita, ’ba drapiri ma amvi, ’yo eri tia, Opi la, ngu curu’do ngu ngu avuni la ca o’du suni ’do.

40Yesu nga ’yo eri tia, Ma ’yoni te mi tia kini mi ka a’i ra, mi nga diza Munguni ndre rari ku ya?

41Yi nga di oni gu amve ani. Yesu nga i mile enga uru, nga ’yo ra, Ata, ma ’yo awa’difo mi dri mini ma erile rarisi.

42Ma ni ra mi ma eri etuzu, te ma ’yo ’ba ongulumuru pa osopi ageinia ’diyi ma e’yosi, yi ma a’i ani kini mi epe ma tini mi’i beni.

43Eri ka e’yo ’diyi ’yo ’bo, eri nga tre o’duko urusi kini, Lazaro, mi efu amve ’doa

44’Ba drapi ’bori nga efu ra, de drini pi pa be ovu nga otizaru bongo ’ba sazu ’biliarisi, oti vini mileni kitambalasi. Yesu ’yo yi tia, Emi ayu eri, emi ku eri ma mu.

45’Ba Yahudini kakau emupi Mariamu vu, e’yo erini ’yeleri ndrepi ’diyi a’i eri ra;

46te ’ba azini yi eselia nga fu mu ’ba Farisaini vu, nga e’yo Yesuni ’yeleri olu yi ria ra.

47Kuhani amboru piyi ’ba Farisaini be nga ’ba e’yo amapi ’diyi oku ani, yi ’yo ra, Ama a’di ’ye ya? A’disiku ’ba ’diri eri eceta ’ye kakau.

48Ama ka eri ku ’dini, ’ba dria yi nga eri a’i ra; ’ba Rumini yi nga emu ani, nga pari amani pi opa suru amani be ra.

49Te ’ba alu yi ma eselia, Kaifa’i, ovupi kuhani amboru eli ’dasiri ’yo yi ria, Emi nini e’yo aluni ku;

50azini emi egani vini aluni ku kini eri onyiru emi dri ’ba alu ma dra ’ba driasi, suru ma ja dri pi ku beni.

51Te eri ’yoni e’yo ’diri i ma ngulupi ma e’yosi ku, te erini ovule kuhani amboru eli ’dasirisi, eri e’yo Yesuni ’yezu drazu suru ndesiri ma e’yo ondri;

52azini suru nderisi a’dule ku, te eri ma oku anzi Munguni yi erepi ndu ndu ’diyi tualu indi.

53’Dini engazu o’du ’dasi yi nga di ’ba e’yo otu eri fuzu,

54E’yo ’disi Yesu acini mgboru ’ba Yahudini ma eselia dika ku; te eri nga ’daarisi fu mu angu roko ageiaria, kpere aku omvele Efiraimu’iria; eri ovu ’daa ’ba erini imbale ’diyi be.

55Isu ’ba Yahudini vile omu agaza ’ba drilesiri ovu ogogo; ’ba karakarau enga angu amveria, tu mu Yerusalemua de omu agaza ’ba drilesiri ecani nga ku, yini yi ’bazu alaru beni.

56Yi nga Yesuni ndru ani, yini pa osoria hekalu ma alia, yi ’yo yi eselia, Emi ega ngoni ya? Eri ngani emu omua ku ya?

57Isu kuhani amboru piyi ’ba Farisaini be fe azita ’bo, kini ’ba ka pari erini ovuzuri ni ra, eri ma ece e’yoni, ’dini yi ma bi eri ani beni.