Zechariah 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Mba aro, eli iri Darioni opi nyazuri ma alia, e’yo Yehovani eca nabi Zekaria Berekia do mvi ma; mvi vu kini,

2Yehova ovu ndra emi a’bipi vu aokosi tu.

3Ka’dini mi ma ’yo yi ma tia, Yehova asikari ongulumuruni ’yo ’dini: Emi atri dri ma vu, Yehova asikari ongulumuruni ’yo ra, ’dini ma nga di dri atri emi vu ani, Yehova asikari ongulumuruni ’yo ra.

4Emi ma ovu kile emi a’bipile ku, te nabi oko ’diyi wu ndra yi vu kini, Yehovai asikari ongulumuruni ’yo ’dini, Emi atri dri engazu geri emini onzi ’diyi ma aliasi, azini ’yeta emini onzi ’diyi ma aliasi indio Te yi erini ndra ku, kani coni bile ma vu ku indi,: Yehova ’yo ra.

5Emi a’bipi, yi i ngoa ya? Azini nabi, yi ovu idriru ’dani ’dani ya?

6Te e’yo mani suzini azita mani, mani azile ati’ba mani nabiru ’diyi ma tiari, yi isuni ndra emi a’bipi yi ku ya? Te yi oja yi ra, nga ’yo kini, Kile Yehova asikari ongulumuruni egale ’yezu ama vu, geri amani vusi, azini ’yeta amani vusirile, eri ’ye ama be ’dinile.

7Mba mudri drini aluri ma mbao’du kali iri drini susi, eri mba Sebati’i, eli iri Darioni opi nyazuri ma alia, e’yo Yehovani eca nabi Zekaria Berekia Ido mvi ma mvi vu, kini,

8Ma ndre inisi, te mi ne, ’ba alu nzu akanya ekaru ma dria, so pa pati icifi malaru ovupi e’bu etia ’diyi ma eselia; eri ma vutia akanya yi indi, ekaru, warawararu, azini emveru.

9Ma ’yo di ani, Opi mani la! ’diyi a’dini ya? Te malaika e’yo ’yopi ma beri kini, Ma nga mini yi a’dini yari ece ra.

10’Ba pa sopi mala pati ’diyi ma eseliari nga e’yo omvi ani kini, ’Diyi yi ’ba Yehovani ti epele acizu ’dale ’dole nyaku ma eselia ’diyi.

11Yi nga e’yo omvi malaika pa sopi mala pati ’diyi ma eseliari ma tia kini, Ama aci ’dale ’dole nyaku ma eselia dria ’bo, te mi ne, nyaku dria adri ndi, eri ava li.

12Malaika Yehovani nga di e’yo omvi kini, Yehova asikari ongulumuruni la! mi ngani ovu yikisi Yerusalemu pi vu aku ambo ambo Yudaa ’diyi be ku ewu ngopi ya, mini ovuzu yi be adrasi eli kali aziri ’dipi ’dini?

13Yehova nga malaika e’yo ’yopi ma beri ma tia e’yo omvi onyiru, ada e’yo ’ba asi omipi ra ’dini ’diyi.

14’Dinile malaika nde e’yo ’yopi ma beci ’yo ma tia, Mi oyu uru kini, Yehova asikari ongulumuruni ’yo ’dini: Ma ovu a’yasi Yerusalemu pi ma e’yosi Zioni be, a’ya amborusi.

15Ma ovu aokosi tu suru ava lipi ’diyi be; a’disiku ma ka ndra ovu aokosi were te yi ere candi nde drile ’drile.

16E’yo ’disi Yehova ’yo ’dini, Ma emvi yikisi Yerusalemu vu ’bo; jo mani nga ovu sizaru alenia, Yehova asikari ongulumuruni ’yoni, azini baka jo o’bizuri nga ovu ejuzaru trei Yerusalemu ma driasi ra,

17Mi oyu uru dika kini, Yehova asikari ongulumuruni ’yo ’dini: Aku amboru mani ’diyi nga ovu erezaru walaru afa dria onyiru ’diyisi; te Yehovani nga kiri Zioni ma asi omi ra, azini eri kiri nga Yerusalemuni pe ra indi.

18Ma nga di ma mile enga uru, ma ndre, te mi lu, o’yu su!

19Ma nga di ’yo malaika nde e’yo ’yopi ma beri ma tia, ’Diyi a’dini ya? Eri omvi e’yo ma tia kini, O’yu ’diyi yi o’yu Yuda pi erepi, Israeli pie, Yerusalemu pie ’bo ’diyi.

20Yehova ece vini ma dri onduou oka dipi ’diyi suo

21Ma nga di ’yo ani, ’Ba ’diyi emu a’di ’ye ya? Eri ’yo kini, ’Diyi yi ovu o’yu nde Yudani erepi ra, ’ba azini ani i ma dri engazu uru ku ’diyi; te ’ba ’diyi lemu uri fezu yi dri, suru nde yi ma o’yu engapi angu Yudani ma ruaa eri erezu ’diyi ma o’yu o’bezu va indi.

Jump to: Chapter 2 →