Zechariah 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Te ma nga ma mile enga uru, ma lu, te mi ndre, ’ba alu ovupi baka afa o’bizuri be i ma driari!

2Ma ’yo tinia, Mi mu ngoa ya? Eri nga ’yo ma tia, Yerusalemuni o’bizu, ndrezu kani walani pi oconi be ngopi yani.

3Te mi lu, malaika te e’yo ’yopi ma beri fu ra, malaika azini fu mu dri fuzu eri be,

4nga: ’yo tinia, Mi nzu ’yo karilau ’di ma tia kini, ’Ba nga ovu Yerusalemua ekile aku kali kokoruri ma aliarile, ’bani ovule alenia karakarau anyapa pierisi.

5Mani ngale ovule abi i aciniriru eri ma ageia kuru, azini dizaniru eri ma aliarisi, Yehova ’yo ra.

6’Ba ’diyi la! emi apa engazu angu andraleruasi, Yehova ’yo ra; mani emi erele ’bo angu ndu ndu ma alia kite oli su ’bua ’diyilerisi, Yehova ’yo ra.

7Mi Zioni la! mi pa mi, mi’i ovupi Babuloni ezopi pieri.

8Te Yehova asikari ongulumuruni ’yo ’dini: Eri pe ma ti suru nde emi ezapiri vu diza isuzu; a’disiku ’ba emi elopiri elo eri ma mile efi ra.

9Te mi lu, ma nga ma dri oya oya yi ma dria, te yi nga ovu afa opale ombaarile ’ba azi ngapi yi dri ’diyi dri; azini emi nga ni ani kini Yehova asikari ongulumuruni epe ma tini.

10Mi ngo ongo, mi ovu ayikosi, mi Zioni zi la; te mi ne, ma emu, ma nga adri mi eselia, Yehova ’yo ra.

11Suru kakau nga yi eci Yehova vu o’du nde ’dasi, yi nga ovu suru mani; ma nga adri mi eselia, te mi nga ni ani kini Yehova asikari ongulumuruni epe ma ti mi vuni.

12Yehovani nga Yudani ’du i ma yilaru angu alatararu ma alia, te eri nga kiri ’ Yerusalemuni pe ra.

13Emi ’ba rua be ’diyi dria, emi; adri ciri Yehova ma milia; erini engale uru angu ini alatararuri ma alia ’borisi.

← Chapter 1 Jump to: Chapter 3 →