Zechariah 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1Emi zi ozoo Yehova ma tia ewu ozoo ewadri vilerini ma alia; emi zi Yehova ovi ma diza ’bapiri, eri nga yi dri ozoo fe ra, aseni duzu ’ba alu alu dri.

2A’disiku wura terafiniru ’diyini e’yo tokoru ’yolerisi, azini ’ba e’yo ondripi ’diyini e’yo inzoru ndrelerisi; yi olu orobi inzoru ma e’yo ra, yi omi ’ba asi ti. E’yo ’disi yi mu geri yinia kile kabilole; ’ba inza yi ra ’ba kabilo ocepirini ovule yorisi.

3Adra manini di ’ba kabilo ocepi ’diyi ma ruaa, ma nga panga fe ndriago piyi dri; Yehova asikari ongulumurunini kabilo ini o’biru suru Yudani ’diyi andrile ’borisi, eri nga yi ’ba akanya ini onyiru ombaarile,

4Eri ma alia oni jo ma kalatiniri ’ nga efuni, eri ma alia alo pie, eri ma alia osu ombani pie, eri ma alia ’ba opiru pie dria.

5Yi nga ovu kile ’ba okporu ’diyile, yi ma ari’ba otuzu va irifura gbokoari ma alia o’du ombanisi; yi nga a’di ’di Yehovani ovule yi berisi; ’ba nzupi akanyasi ’diyi ma avani nga oti ra ani.

6Ma nga okpo fe suru Yudani dri, ma nga suru Yusufuni pa ra. Ma nga yi omvi dika mani ovule yiki be yi vurisi, yi nga ovu kile ’ba ndra mani nga o’bele amve ku ’diyile; mani ovule Yehova Mungu yinirisi, ma nga yi eri ra.

7Te ’ba Efiraimuni ’diyi nga ovu kile ’ba okporule, asi yini nga ovu ayikosi kile patiefi susirile. Ada anzi yini nga ndre ra, yi nga ovu ayikosi indi, yi asi nga ovu ayikosi Yehova ma alia.

8Ma nga oli li yi omvezu, ma nga yi oku ra, mani yi onzele ’borisi, yi nga ezu dika kile yini ezule driorile.

9Ma nga yi ri orile suru ma eselia, yi nga e’yo mani ega angu re ’diyi ma alia, yi nga ovu idriru anzi yini be, yi nga emvi ra.

10Ma nga yi omvi dika engazu angu Misirini ma aliarisi, ma nga yi oku angu Asuria ma aliasi; ma nga yi eji ofi angu Gileadi pia Lebanoni be, angu ngani ca yisi ku.

11Te eri nga aga yi miri candiniri ma aliasi, eri nga yi mbupi mburi co miria ra, yi aliru Nilini dria nga nzu ra. Afu Asuriani nga ovu jizaru va, azini kali opiniri nga angu Misirini ku ra.

12Ma nga yi ’ba okporu Yehova ma alia, yi nga aci ’daa ’daa ma rusi, Yehova ’yoni.

← Chapter 9 Jump to: Chapter 11 →