Zechariah 7

Lugbara (E’yo Siza Alatararu Munguniri BIBLIA)

← Chapter 6 Jump to: Chapter 8 →

1Eri nga eca eli su opi Darioni opi nyazurisi ’dini, e’yo Yehovani eca Zekaria vu, mba oromiri ma o’du susi, ’di mba Kisilevi’i.

2Isu! de ’ba Betelia ’diyi pe Sarezeri pi ma ti Regemu-meleki be, ’ba yini ’diyi pie ’bo, matu ’bazu Yehova vu,

3azini e’yo zizu atalau edeta edepi; Yehova asikari ongulumuruniri vileria ’diyi pi ma tia nabi pie, kini, Ma ma wu nga mindresi mba towiri ma alia ’dani, mani ma esele coria, kile mani ’yele eli kakau ’diyisirile ya?

4’Dini e’yo Yehova asikari ongulumurunirini nga di eca ma vu kini,

5Mi ma ’yo ’ba dria angu ’diria ’diyi pi ma tia, atalau edeta edepi ’diyi pie kini, Emini ndra nyaka ’daria azini awu wuria mba towirisi azini mba aziririsi, kpere cazu eli kali aziri, emi ’da ndra nyaka masi, adani masi ya?

6Te emi ka nyaka nya, emi ka afa mvu, emi nyani emi ngulupisi ku, emi mvuni emi ngulupisi ku ya?

7Yerusalemuni ndra ovuria ’ba be tre azini drilebaru, aku ambo ambo ageinia ’diyi pie, o’du angu Uruleruri pini ovuzu eleri be ’ba be trerisi, ’di ovuni e’yo ndra Yehovani oyule geri nabi oko ’diyi ma tiarisiri’i ku ya?

8’Dini e’yo Yehovani nga di eca Zekaria vu kini,

9Yehova asikari ongulumuruni ’yo e’yo ’bo ’dini kini, Emi dria alu alu ma li e’yo liza kililiruri, ma ece yiki pi asi ndriza be emi adripi vu;

10emi ma inza awuzi pi imvoanzi pie, ani’bo pie, alio pie dria ku; azini emi azini aluni ma ega e’yo onzi i adripi ma ruaa i asia ku.

11Te yi ga bile coko si, onze yi ma gbudri, ase di yi ma bile ci ’dini yi ma eri ku beni.

12Ada, yi ’ba yi asi kile oni kongolokorurile, yi kazu azita pi erizu ku beni, e’yo Yehova asikari ongulumurunirini tini epele Orindi inisi geri nabi oko ’diyi vurisi ’diyi be. E’yo ’disi adra amboru ibi enga Yehova asikari ongulumuruni vu.

13Te eri nga di eca ’dini, ekile erini ndra oyuria te yini e’yoni erile kurile, ka’dini yi nga oyu o’duko urusi te ma ngani eri ku, Yehova asikari ongulumuruni ’yoni;

14te ma nga yi ere oliriko piriliarurisi suru yini nile ku ’diyi ma eselia dria. ’Dini angu nde ovu di andruru yi ma vutia, ’dini ’ba aluni agani kani emvini ’dasi ku; te yi eza di angu nde ndra ovupi ayikoruri andruru ra.

← Chapter 6 Jump to: Chapter 8 →